وتە سيرەك كەزدەسەتىن دەرت: دارىگەرلەر تۋا ءبىتتى اۋىراتىن ءبىر جاسار بالاعا وتا جاسادى

دەنساۋلىق ساقتاۋ مينيسترلىگىنىڭ مالىمەتىنشە, ءبىر جاسار قىزدىڭ اناسى الماتى قالاسىنداعى №2 قالالىق بالالار كلينيكالىق اۋرۋحاناسىنىڭ حيرۋرگتارىنا جۇگىنگەن.

اۋرۋحانانىڭ ءباسپاسوز قىزمەتى مالىمەتىنشە, دياگنوزدى تەكسەرۋ ءۇشىن قۋىققا ۋلترادىبىستىق زەرتتەۋ, تسيستوگرافيا جاسالعان. زەرتتەۋ ناتيجەسىندە بالادا ۋراحۋستىڭ تولىق ەمدەلمەگەنى انىقتالىپتى.

«ۋراحۋس - نەسەپاعار, ول ادەتتە ەمبريوندىق كەزەڭدە عانا بولادى جانە قۋىقتىڭ جوعارعى بولىگىن كىندىكباۋمەن بايلانىستىرادى. جاتىرىشىلىك كەزەڭنىڭ شامامەن 5-7 ايىندا ول بىتەلەدى. الايدا بەلگىلى ءبىر جاعدايلاردا تۇتىك قاباتتاسپايدى, ناتيجەسىندە ونىڭ اۋىتقۋلارى پايدا بولادى. بۇل - جاتىرىشىلىك كەزەڭدەگى وبليتەراتسيا پروتسەسىنىڭ بۇزىلۋىمەن بايلانىستى وتە سيرەك كەزدەسەتىن تۋا بىتكەن پاتولوگيا. حيرۋرگياداعى 30 جىلدان اسا تاجىريبەمدە مەن وسىنداي 3 جاعدايدى عانا كەزدەستىردىم», دەپ ءتۇسىندىردى №2 مكاد حيرۋرگيالىق بولىمشەسىنىڭ مەڭگەرۋشىسى مارات قاپتاعاەۆ.

قۇرامىندا تاجىريبەلى حيرۋرگتارى مەن انەستەزيولوگتارى بار توپ 30 مينۋت ىشىندە نەسەپ شىعارۋ جولىن الىپ تاستاپ, بالانى وسى انوماليادان ءبىرجولا قۇتقارعان.