الماتىداعى مەملەكەتتىك ورتالىق مۋزەيدە فوتوسۋرەتشى, ساياحاتشى تايماس نۇرتاەۆتىڭ «جەر شارى: بۇل الەم قانداي عاجاپ!» اتتى جەكە فوتوكورمەسى اشىلدى.
مادەنيەت وشاعى قالا تۇرعىندارى مەن قوناقتارىن الەمنىڭ اسەمدىگىن پاش ەتەتىن اسەرلى فوتوسۋرەتتەرمەن تانىستىردى. تايماس نۇرتاەۆ جەر شارىنىڭ تۇكپىر-تۇكپىرىن ارالاپ, ۇمىتىلماس ساياحاتتاردىڭ جارقىن ەستەلىكتەرىن تاريحقا تاسپالاعان.
سۋرەتشىنىڭ گالەرەياسىندا ساحارا ءشولى, الەمدەگى ەڭ ەرەكشە ارالداردىڭ ءبىرى – گرەنلانديا, تاريحى تەرەڭ يتاليا, يسلانديانىڭ «مۇز ەلى» ايرىقشا كورىنىس تاپقان.
فوتوگەر قىتاي ەلىنە ساپارى بارىسىندا تۇسىرگەن تسزيۋچجايگوۋ ۇلتتىق ساياباعىنىڭ, حۋانلۋنگ كوگىلدىر كولدەرىنىڭ كوركەم پەيزاجدارىنىڭ ورتاسىندا اعىپ جاتقان جاسىل-سارى لي وزەنى, اۆاتار تاۋلارىنىڭ فوتوسۋرەتتەرى كورەرمەندى بىردەن باۋرايدى.
ول 2017 جىلى شپيتسبەرگەن ارالىنان سولتۇستىك ەندىكتەرگە ساپارى ناتيجەسىندە وسى ارالدىڭ تاڭعاجايىپ جانە ەرەكشە تابيعاتى مەن جانۋارلار الەمىن سۋرەتكە تۇسىرگەن. ونىڭ وبەكتيۆىنە ىلىنگەن اق ايۋلار, يتبالىقتار, مورجدار مەن كيتتەر جانۋارلار الەمىنە قىزىعۋشىلاردىڭ نازارىن اۋداردى.
فوتوسۋرەتتەردەگى ارگەنتينا مەن برازيليانىڭ كوركەم تابيعاتى, گاۋچو شاباندوزدارى, تورەس-دەل-پاين ۇلتتىق پاركى, گرەي كولى جانە پاين ءماسسيۆى تارتىمدىلىعىمەن باۋرايدى. اۆتور افريكانىڭ باي فاۋناسىن تۇسىرگەن الەمگە ايگىلى مااساي مارا ۇلتتىق قورىعىنا دا ات باسىن بۇرعان. كامچاتكانى تىكۇشاقپەن اينالىپ ءوتىپ, ايگىلى كورياك, اۆاچينسكي, كوزەلسكي جانارتاۋلارىن دا ءساتتى تاسپالاي العان.
كورمەنىڭ ەرەكشە بولىگىن ەلىمىزدىڭ كوركەم تابيعاتىن بەدەرلەگەن «قازاقستان تابيعاتىنىڭ مارجاندارى» اتتى فوتوجۇمىستار قۇرايدى. وندا اۆتور, تۋعان ولكەسى مەن ىلە الاتاۋىنىڭ اسەم جەرلەرىن, الماتى مەن الماتى وبلىسى اۋماعىن, كولساي, حان-ءتاڭىرى, شارىن كولى مەن شارىن شاتقالى, «التىنەمەل» ۇلتتىق قورىعى, «باياناۋىل» ۇلتتىق ساياباعى, جاسىباي, مارقاكول, بۋراباي, زايسان, قارا-سۋ, قارا-كول, قايىڭدى, ۇلكەن الماتى وزەنى, بۇقتىرما سۋقويماسى, كاسپي تەڭىزى, كين-كەرىش تاۋلارى, اق-تاۋ, شاكەلمەس, ايعايقۇم, ماڭعىشلاق, ءۇستىرت شاتقالى, شاقپاق پاي ساي شاتقالى, ۇشقوڭىر جايلاۋى, اقكەرگەشىن, اقتولاعاي قىرقاسى جانە ت.ب. تۇسىرگەن فوتوجۇمىستارىن ۇسىنعان.
تايماس نۇرتاەۆ بىشكەك قالاسىندا دۇنيەگە كەلگەن, بىراق 60-جىلداردىڭ اياعىنان باستاپ الماتى قالاسىنىڭ تۇرعىنى. ءبىلىمى بويىنشا قۇرىلىسشى, بىراق فوتوونەرگە دەگەن سۇيىسپەنشىلىك ونىڭ ەكىنشى ماماندىعىنا اينالعان.