بىرىككەن اراب امىرلىگىنىڭ دۋباي قالاسىندا سور 28 جاھاندىق كليماتتىڭ وزگەرۋىنە قاتىستى كونفەرەنتسيا ءوتىپ جاتىر. الەمنىڭ 197 ەلىنەن 70 مىڭنان استام قاتىسۋشى جينالعان كونفەرەنتسيادا پلانەتاداعى تەمپەراتۋرانىڭ ءوسۋىن 1,5°C-قا دەيىن شەكتەۋگە جانە 2050 جىلعا قاراي شىعارىندىلاردىڭ نولدىك دەڭگەيىنە قول جەتكىزۋ جايى تالقىلانىپ جاتىر, دەپ جازادى Egemen.kz.
سور 28 كونفەرەنتسياسى 30 قاراشا - 12 جەلتوقسان ارالىعىندا وتەدى.
دۇنيەجۇزىلىك مەتەورولوگيالىق ۇيىم 2023 جىل رەكوردتىق ەڭ ىستىق جىل بولعانىن حابارلاپ, بۇل الەمگە ۇلكەن قاۋىپ توندىرەتىنىن ەسكەرتتى.
سور 28 كونفەرەنتسياسىنىڭ اشىلۋىندا بۇۇ-نىڭ كليماتتىڭ وزگەرۋى تۋرالى نەگىزدەمەلىك كونۆەنتسياسىنىڭ اتقارۋشى حاتشىسى سايمون ستيلل «الەم ءبىز كەزدەسەتىن كۇردەلى كليماتتىق اسەرلەرگە ەڭ جاقسى جاۋاپ بەرۋ شارالارىن ازىرلەۋ ءۇشىن تىم باياۋ ارەكەت ەتىپ جاتىر», دەپ مالىمدەدى.
سونداي-اق بۇۇ باس حاتشىسى انتونيو گۋتەرريش سور 28 اشىلۋىندا «الەم ناقتى ۋاقىتتاعى كليماتتىق كۇيرەۋدى باستان وتكەرۋدە جانە ونىڭ سالدارى جويقىن ەكەنىن ايتىپ, الەم ەلدەرىنىڭ كوشباسشىلارىن ماسەلەگە دەن قويۋعا شاقىردى.
«ەستەرىڭىزگە سالا كەتەيىك, 2015 جىلى پاريجدەگى كليماتتىڭ وزگەرۋى جونىندەگى 21-ءشى كونفەرەنتسيادا 2100 جىلعا قاراي جاھاندىق تەمپەراتۋرانىڭ يندۋسترياعا دەيىنگى دەڭگەيدەن 1,5°C-قا دەيىن كوتەرىلۋىن شەكتەۋ ءۇشىن جاھاندىق ۇجىمدىق ارەكەتتەردى جۇمىلدىرعان پاريج كەلىسىمىنە قول قويىلدى. سونداي-اق قۇجات كليماتتىڭ وزگەرۋىنىڭ بۇرىننان بار سالدارىنا بەيىمدەلۋ بويىنشا شارالار قابىلداۋدى كوزدەيدى. 2023 ادامزات ءۇشىن ەڭ ىستىق جىل بولدى. بۇرىن سوڭدى بولماعان رەكوردتار جاڭارتىلدى. كليماتتىڭ جاھاندىق جىلىنۋىنا قارسى جۇمىلا جۇمىس ىستەۋ كەرەك», دەدى بۇۇ باس حاتشىسى انتونيو گۋتەرريش.