الماتىداعى ق.ساتباەۆ اتىنداعى ۋنيۆەرسيتەتتىڭ گەولوگيا كافەدراسى قاراجار ورتا مەكتەبىنە قۇندى تارتۋ جاسادى. وقۋ ۇيىمىنا ءتۇرلى تاۋ جىنىسى مەن مينەرالدار, عىلىمي ادەبيەتتەر بەرىلىپ, وقۋشىلار تۇڭعىش اكادەميك ىزدەپ تاپقان قازبا بايلىقتارمەن كەڭىنەن تانىسۋعا مۇمكىندىك الدى.
كوللەكتسيادا 78 ۇلگى بار. ولاردىڭ ارقايسىسىنا مەتاللوگەنيالىق سيپاتتاما جاسالعان شاعىن كىتاپشا دا كافەدرا وقىتۋشىلارى تاراپىنان تارتۋ ەتىلدى. ۋنيۆەرسيتەت رەكتورى مەيرام بەگەنتاەۆ: «بۇل توپتامانى ۇلت ماقتانىشى, باياناۋىلدان شىققان ۇلى عالىم, تۇڭعىش اكادەميك قانىش ساتباەۆ اتالارىڭىزدان مەكتەپ وقۋشىلارىنا سىيلىق دەپ قابىلداڭىزدار» دەگەن سالەمىن جولدادى.
باياناۋىل اۋداندىق ءبىلىم بەرۋ ءبولىمىنىڭ باسشىسى مەرەكە ابدىكارىموۆتىڭ ايتۋىنشا, گەولوگيالىق تاستاردىڭ اراسىندا شوگىندى جىنىستار, كريستالدار, مەتامورفتى مينەرالدى قۇرىلىس زاتتارى, ءمارمار, جالپى, ەلىمىزدە كەزدەسەتىن پايدالى قازبالاردىڭ ۇلگىلەرى بار.
– مۇنداي گەولوگيالىق رەسۋرستاردىڭ مول قورى ءبىزدىڭ وڭىردەگى مەكتەپتەردە جوق. ەرەكشە قۇندى سىيلىق ءار وقۋشىنىڭ گەولوگيا عىلىمىنا دەگەن قىزىعۋشىلىعىن ارتتىرىپ, عالىم اتامىز ۇستاعان تاستاردىڭ قاسيەتى قابىلەتتەرىن ۇشتايدى دەگەن ۇمىتتەمىز. اكادەميكتىڭ مۇراسىن وقۋشىلارىمىزدىڭ ءبىلىمىن ارتتىرۋعا قولدانامىز. تاۋ جىنىستارىن قولمەن ۇستاپ, كوزبەن كورىپ, شىنايى سەزىنۋگە مۇمكىندىك بەرگەن ۋنيۆەرسيتەتتەگى كافەدرا ۇجىمىنا مەكتەپ اتىنان ەرەكشە العىس ايتامىز. ەندى مەكتەپ ۇستازدارى گەوگرافيا ساباعىندا تاۋ جىنىستارى, پايدالى قازبالار تاقىرىپتارىن وتكىزگەندە پراكتيكالىق تۇردە وقۋشىلارعا كورسەتە الاتىنى انىق. ءارى بۇل ۇلگىلەردى بيولوگيا, جاراتىلىستانۋ, تاريح پاندەرىندە پايدالانۋعا دا بولادى, – دەيدى ول.
ايتىپ وتەيىك, قاراجار اۋىلىندا بيىل دەمەۋشىلەر قاراجاتىنا 100 ورىندىق زاماناۋي مەكتەپ سالىندى. كەرەگەسى كەڭەيگەن ءبىلىم بەرۋ ۇيىمىنىڭ ءوزى ەندى نەگىزگى مەكتەپتەن ورتا ءبىلىم بەرۋ جۇيەسىنە اۋىستىرىلادى دەپ كۇتىلىپ وتىر. ال ءبىلىم ورداسىندا بۇگىندە 72 وقۋشى ءبىلىم الىپ جاتىر.
پاۆلودار وبلىسى,
باياناۋىل اۋدانى,
قاراجار اۋىلى