پاۆلودارلىق ءتارتىپ ساقشىلارىنىڭ اۆتوپاركى جاڭا 215 كولىكپەن تولىقتى. پوليتسيا قىزمەتكەرلەرىنىڭ جۇمىسىن جەدەلدەتە تۇسۋگە مۇمكىندىك بەرەتىن تەمىر تۇلپارلاردىڭ كوبى اۋىلدىق اۋماقتارداعى ينسپەكتورلارعا بۇيىرىپ وتىر.
قۇقىقتىق ءتارتىپتى قامتاماسىز ەتۋدىڭ باستى شارتتارىنىڭ ءبىرى – تۇرعىنداردىڭ ءتارتىپ ساقشىلارىنا دەگەن سەنىمى. مەملەكەت باسشىسى قاسىم-جومارت توقاەۆ: «پوليتسيا قىزمەتكەرلەرى, ەڭ الدىمەن, ءوز ەلىنە, ءوز حالقىنا ادال قىزمەت ەتۋى كەرەك», دەپ اتاپ وتكەن بولاتىن ىشكى ىستەر مينيسترلىگىنىڭ القا ماجىلىسىندە. وڭىردە قۇقىق قورعاۋ سالاسىنىڭ ماتەريالدىق-تەحنيكالىق بازاسىن جاقسارتۋ ءۇشىن ءتيىستى قادامدار جاسالىپ جاتىر. ال جاڭا كولىكتەردىڭ كوپشىلىگى العاش رەت اۋىلدىق ەلدى مەكەندەرگە جىبەرىلگەنى قۋانتىپ وتىر.
«JAC», «Kia» جانە «Chevrolet Cobalt» ماركالى قىزمەتتىك اۆتوكولىكتەر ۋچاسكەلىك پوليتسيا ينسپەكتورلارىنا جانە پاترۋلدىك پوليتسيا باتالونى مەن روتاسىنىڭ ينسپەكتورلارى, سونداي-اق قالالىق, اۋداندىق پوليتسيا باسقارمالارى مەن بولىمدەرى اراسىندا تاراتىلدى. اۆتوكولىكتەر بەلگىلەنگەن ستاندارتتارعا ساي, بارلىق قاجەتتى تەحنيكالىق قۇرالمەن جابدىقتالعان جانە قۇقىق قورعاۋ ورگاندارىنا قوعامدىق ءتارتىپتى بۇزعاندارعا جەدەل دەن قويۋعا مۇمكىندىك بەرەدى», دەپ اتاپ ءوتتى وڭىرلىك پوليتسيا دەپارتامەنتى وكىلدەرى. تەحنيكالار «ونەركاسىپتى دامىتۋ قورى» اق-نىڭ ليزينگتىك باعدارلاماسى بويىنشا ساتىپ الىنعان.
«جۇرتقا جاقىن پوليتسەي» قاعيداسىن ۇستانعان كەرەكۋلىك ءتارتىپ ساقشىلارى بيىل رەسپۋبليكادا العاشقى بولىپ سەرۆيستىك قىزمەت كورسەتەتىن ۋچاسكەلىك پوليتسيا پۋنكتتەرىن قولعا الدى. ناتيجەسىندە, جەرگىلىكتى پوليتسيا پۋنكتتەرىن وڭتايلاندىرۋ ءجۇرىپ جاتىر. پاۆلودار قالاسىندا بۇرىن ولاردىڭ سانى 23 بولسا, قازىر نەبارى 16 پوليتسيا پۋنكتى جۇمىس ىستەپ تۇر. مۇنداي سەرۆيستەر جۋىق ارادا ەلىمىزدىڭ وزگە دە قالالارىندا اشىلادى دەپ جوسپارلانىپ وتىر. «پوليتسيانىڭ سەرۆيستىك مودەلى» جوباسى اياسىنداعى جۇيەنى دامىتۋ جالعاسىن تاۋىپ جاتىر. ءتارتىپ ساقشىلارىنىڭ جۇمىسىن تۇرعىندار ءۇشىن ءتيىمدى ەتە ءتۇسۋدى كوزدەيتىن جوباعا پوليتسيانىڭ ساپالى قىزمەتى, كليەنتكە باعدارلانۋ, ۇكىمەتتىك ەمەس ۇيىمدارمەن, مەملەكەتتىك مەكەمەلەرمەن تۇراقتى سەرىكتەستىك جاساۋ باعىتتارى ەنگەن.
پاۆلودار وبلىسى