قازتالوۆتاعى جاڭا مەكتەپ

شىنى كەرەك, مەكتەپتىڭ جاڭا عيماراتىن اۋىل حالقى كوپ كۇتتى. بۇرىنعى مەكتەپ ءۇيى اپاتتى دەپ تانىلعان سوڭ, 600 ورىندىق جاڭا عيماراتتىڭ قۇرىلىسى 2019 جىلى باستالعان ەدى. 1,5 جىل ىشىندە اياقتالۋعا ءتيىس قۇرىلىس تىم سوزىلىپ كەتتى. اۋەلى پاندەميا, كەيىن قىمباتشىلىق بۇيىردەن قىستى. وقۋشىلار قيىندىق كوردى. جاستار ورتالىعى, ساز مەكتەبى, كىتاپحانا سەكىلدى ءتۇرلى مەكەمەگە ءبولىنىپ وقىدى. مەردىگەرگە دە وڭاي بولمادى. ايتەۋىر, ابىروي بولعاندا ءبارى جاقسىلىقپەن اياقتالدى. اۋىلدىڭ كىرە بەرىسىندە ءۇش قاباتتى ءبىلىم سارايى ەسىگىن ايقارا اشتى. جاپ-جارىق بولمەلەر سىڭعىر كۇلكىگە, باقىتتى بالاعا تولدى.

جاڭا مەكتەپتىڭ اشىلۋ سالتاناتىنا قازتالوۆ اۋدانىنىڭ اكىمى اسلانبەك سارقۇلوۆ, وبلىستىق قۇرىلىس باسقارماسىنىڭ باسشىسى الىبەك انتازيەۆ, وبلىستىق ءبىلىم باسقارماسى باسشىسىنىڭ ورىنباسارى بيسەنبەك ناسيمۋللين, قۇرىلىستىڭ مەردىگەرى «جيەنباي» كومپانياسىنىڭ ديرەكتورى الەك­ساندر قاراعويشين, الما وراز­باە­ۆانىڭ تۋىسى, بوكەي ورداسى اۋدانى حان ورداسى اۋىلى جاڭگىر حان اتىنداعى ورتا مەكتەپتىڭ قىزمەتكەرى رينات وراز­باەۆ باس­تا­عان­ قوناقتار, بارشا اۋىل تۇرعىنى ارنايى كەلدى.

«ۇلت ۇستازى احمەت بايتۇر­سىن­ ۇلىنىڭ: ء«بىلىمدى بولۋعا وقۋ كەرەك. باي بولۋعا كاسىپ كەرەك. كۇشتى بولۋعا بىرلىك كەرەك. وسى كەرەك­تەردىڭ جولىندا جۇمىس ىستەۋ كەرەك», دەپ ايتقان قاناتتى ءسوزى بارشامىزدىڭ ەسىمىزدە «جەتى ءتۇرلى ءىلىم بىلەتىن» ۇرپاق تاربيەلەۋ – قازىرگى كۇننىڭ نەگىزگى مىندەتى. بۇگىنگى قۋانىشتى جاڭالىق مەك­تە­­بىمىزدىڭ اشىلعانىنا 155 جىل جانە قوعام قايراتكەرى الما ورازباەۆانىڭ تۋعانىنا 125 جىل تولۋىمەن قاتار كەلدى. مەك­تە­بى­مىز­دىڭ قۇرىلىسىن تولىق اياق­تاۋعا قول­داۋ كورسەتكەن بارشا ازا­ماتقا, قۇرىلىس جۇمىستارىن سوڭىنا دەيىن جەتكىزگەن مەردىگەر كوم­پانيانىڭ ۇجىمىنا العىس بىلدىرەمىن», دەدى اۋدان اكىمى اسلان­بەك سارقۇلوۆ.

مەكتەپ باسشىسى ءىنجۋمار­جان ادىلگەرەيقىزىنا جاڭا نىسان­نىڭ رامىزدىك كىلتى تابىس ەتىلگەن سوڭ, ارداگەر ۇستاز گۇلجيان عاريف­قىزى, الما ورازباەۆانىڭ تۋى­سى­ رينات يۋسۋپ ۇلى, مەكتەپ ماق­تا­نىشى, وليمپيادا جۇلدەگەرى, «التىن بەلگىگە» ۇمىتكەر ءاليحان جانىبەكوۆ جانە وبلىستىق ءبىلىم باسقارماسى باسشىسىنىڭ ورىنباسارى بيسەنبەك ناسيمۋللين مەكتەپ لەنتاسىن قيىپ, مەيمانداردى ىشكە شاقىردى. ءىس-شارادا باتىس قازاقستان وبلىسى اكىمى ناريمان تورەعاليەۆتىڭ قۇتتىقتاۋى وقىلىپ, جاڭا مەكتەپكە ءوڭىر باسشىسى اتىنان LED ەكران سىيعا تارتىلدى.

جاڭا مەكتەپتىڭ ءىشى زامان تالابىنا ساي بەزەندىرىلىپ, تولىق جابدىقتالعان. مەكتەپتە ءار بالاعا ارنالعان 600 شكاف ورناتىلعان. عيمارات ءىشى جارىق ءارى جىلى. وقۋشىلاردىڭ الاڭسىز ءبىلىم الۋى­ن­ا تولىق مۇمكىندىك بار.

اۋىلدا 2018 جىلى اشىلعان الما ورازباەۆانىڭ ءبيۋستى دە وسى كۇنى جاڭا مەكتەپتىڭ الدىنان ورىن تاپتى. ەسكەرتكىشكە گۇل شوعى قويىلىپ, اينالاسىنا تەرەك كوشەتى ەگىلدى.

تاريحقا كوز سالساق, ىشكى بوكەي ورداسىنا قاراعان تالوپكە قيسى­مىندا ستارشىندىق مەكتەپ 1868 جىلى سالىنىپ, العاش شاكىرت قابىلداعان ەكەن. ونىڭ اشىلۋىنا سول كەزدەگى قامىس-سامار مەن تالوۆ بولىمدەرىن باسقارعان تاريحي تۇلعا مۇحامەد-سالىق باباجانوۆ مۇرىندىق بولىپتى. ال 1959 جىلى اقپاندا مەكتەپكە قوعام قايراتكەرى الما ورازباەۆانىڭ ەسىمى بەرىلگەن. سيمبيرسكىدە چۋۆاش مەكتەبىن, وردادا قىزدار مەكتەبىن بىتىرگەن, كەيىن ۇشجىلدىق مۇعالىمدەر كۋرسىن اياقتاعان الما دىنمۇحامەدقىزى جاڭاقازان اۋى­لىندا مۇعالىم بولعان العاشقى قازاق قىزدارىنىڭ ءبىرى ەدى.

باتىس قازاقستان وبلىسى