بەلارۋستىڭ باس شاھارى مينسكىگە ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەر سىرتقى ىستەر مينيسترلەرى كەڭەسى, قورعانىس مينيسترلەرى كەڭەسى, ۇجىمدىق قاۋىپسىزدىك تۋرالى شارت ۇيىمى مۇشەلەرى - مەملەكەتتەر قاۋىپسىزدىك كەڭەستەرى حاتشىلارى كوميتەتىنىڭ بىرلەسكەن وتىرىسىنا قاتىسۋ ءۇشىن قازاقستاننىڭ قورعانىس ءمينيسترى گەنەرال-پولكوۆنيك رۋسلان جاقسىلىقوۆ باردى, دەپ حابارلايدى Egemen.kz اتالعان ۆەدومستۆونىڭ ءباسپاسوز قىزمەتىنە سىلتەمە جاساپ.
ورتالىق وفيتسەرلەر ۇيىندە ەكى ەلدىڭ قورعانىس مينيسترلەرى گەنەرال-پولكوۆنيك رۋسلان جاقسىلىقوۆ پەن گەنەرال-لەيتەنانت ۆيكتور حرەنيننىڭ كەزدەسۋى ءوتىپ, 2024 جىلعا ارنالعان ىنتىماقتاستىق جوسپارىنا قول قويىلدى.
گەنەرال-پولكوۆنيك رۋسلان جاقسىلىقوۆ اسكەري ىنتىماقتاستىق سالاسىنداعى قازاقستان-بەلارۋس قاتىناستارىنىڭ دەڭگەيى ارتىپ كەلە جاتقانىن العا تارتتى. «قازاقستان تىنىشتىقتى جاقتايتىن مەملەكەت رەتىندە بەيبىتشىلىكتى ساقتاۋعا, ءارى ۇقشۇ-نىڭ جاۋاپكەرشىلىك ايماعىنداعى قاۋىپسىزدىكتى قامتاماسىز ەتۋدە بىرلەسكەن جۇمىستارعا مۇددەلى», دەپ اتاپ ءوتتى.
قازاقستاننىڭ قورعانىس ءمينيسترى «جەڭىس» مونۋمەنتىنە گۇل شوقتارىن قويۋ راسىمىنە قاتىستى.
سونداي-اق بەلارۋس رەسپۋبليكاسى اسكەري اكادەمياسىنىڭ قارۋلى كۇشتەرى باس شتابىنىڭ فاكۋلتەتىندە بريفينگ ءوتتى. وندا قازاقستان دەلەگاتسياسى وقۋ ورنىنىڭ اسكەري كادرلارىن دايارلاۋ قۇرىلىمىمەن, مىندەتتەرىمەن, جۇيەسىمەن تانىستى.
قورعانىس ۆەدومستۆوسىنىڭ باسشىسى گەنەرال-پولكوۆنيك رۋسلان جاقسىلىقوۆ بەلارۋس اسكەري اكادەمياسىندا وقيتىن قازاقستاننىڭ اسكەري قىزمەتشىلەرىمەن دە كەزدەستى. ول ءبىلىم بەرۋ باعدارلامالارىنىڭ مازمۇنىنا, وقۋ پروتسەسىنە جانە اسكەري قىزمەتشىلەر مەن ولاردىڭ وتباسى مۇشەلەرىنە ارنالعان تۇرمىستىق جاعدايلارعا دا نازار اۋداردى.