گازا سەكتورىندا قالعان قازاقستان ازاماتتارى مەن ولاردىڭ وتباسى مۇشەلەرى بۇگىن الماتىعا ۇشىپ كەلدى, دەپ حابارلايدى Egemen.kz سىرتى ىستەر مينيسترلىگىنىڭ ءباسپاسوز قىزمەتىنە سىلتەمە جاساپ.
مەملەكەت باسشىسى قاسىم-جومارت توقاەۆتىڭ تاپسىرماسى بويىنشا سىرتقى ىستەر مينيسترلىگى گازا سەكتورىندا قالىپ قويعان وتانداستارىمىزدى ەۆاكۋاتسيالادى.
«بۇگىن ارنايى ەۆاكۋاتسيالىق بورتپەن 99 جولاۋشى – قازاقستان ازاماتتارى مەن ولاردىڭ وتباسى مۇشەلەرى الماتى قالاسىنا امان-ەسەن ۇشىپ كەلدى. اۋەجايداعى بارلىق مىندەتتى راسىمدەردەن وتكەننەن كەيىن ەۆاكۋاتسيالانعان ازاماتتارعا ۋاقىتشا باسپانا بەرىلىپ, ولارعا قاجەتتى قۇقىقتىق, مەديتسينالىق جانە وزگە دە كومەك كورسەتىلىپ جاتىر. ءساتتى ىسكە اسىرىلعان ەۆاكۋاتسيالاۋ قازاقستاننىڭ يزرايلدەگى, يوردانياداعى جانە مىسىرداعى ەلشىلىكتەرىنىڭ وسى ەلدەردىڭ ۋاكىلەتتى ورگاندارىمەن جانە حالىقارالىق ۇيىمدارمەن بىرلەسكەن ۇيلەسىمدى جۇمىسىنىڭ ناتيجەسى. تاياۋ شىعىس ءوڭىرىنىڭ سىرتقى ساياسي ۆەدومستۆولارىنىڭ باسشىلىعىمەن كەلىسسوزدەر قورىتىندىسى بويىنشا قر ءسىم ازاماتتارىمىزدىڭ گازا سەكتورىنان قاۋىپسىز جانە ەش كەدەرگىسىز شىعۋى تۋرالى ۋاعدالاستىققا قول جەتكىزدى», دەلىنگەن اقپاراتتا.
قازاقستاننىڭ ديپلوماتتارى قاقتىعىس ايماعىندا قالعان جەرلەستەرىمىزگە كومەك كورسەتىپ, ەۆاكۋاتسيالاۋ جۇمىستارىن جالعاستىراتىنىن جەتكىزدى.