پرەمەر-ءمينيستردىڭ ورىنباسارى تامارا دۇيسەنوۆانىڭ توراعالىعىمەن وتكەن كاسىبي بىلىكتىلىك جونىندەگى ۇلتتىق كەڭەستىڭ العاشقى وتىرىسىندا «كاسىبي بىلىكتىلىك تۋرالى» زاڭنىڭ ورىندالۋ بارىسى تالقىلانىپ, وعان پارلامەنت ءماجىلىسىنىڭ دەپۋتاتتارى, ورتالىق مەملەكەتتىك ورگانداردىڭ ۆيتسە-مينيسترلەرى, وبلىس اكىمدەرىنىڭ ورىنباسارلارى, «اتامەكەن» ۇلتتىق كاسىپكەرلەر پالاتاسىنىڭ وكىلدەرى مەن جۇمىس بەرۋشىلەر قاتىستى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
وتىرىسقا قاتىسۋشىلاردىڭ ايتۋىنشا, كوللەدجدەر مەن جوو-لاردىڭ كەيبىر تۇلەكتەرى مەڭگەرگەن ماماندىعى بويىنشا جۇمىسقا ورنالاسا بەرمەيدى. جۇمىسسىز قالىپ قوياتىندارى دا بار. مۇنىڭ ءبىر سەبەبى – تۇلەكتەردىڭ بىلىكتىلىكتەرى جۇمىس بەرۋشىلەر قويعان تالاپتارعا ساي كەلمەي جاتادى. قازىر ەڭبەك نارىعىنىڭ سۇرانىسىنا ساي ساپالى كادر دايىنداۋ ءۇشىن وقۋ ورىندارى مەن كاسىپورىندار اراسىندا تىعىز بايلانىس ورناتۋ ماقساتى تۇر.
«كاسىبي بىلىكتىلىك تۋرالى» زاڭنىڭ اياسىندا وتاندىق ساراپشىلار كاسىبي ستاندارتتار ازىرلەپ جاتىر, ءبىلىم بەرۋ ۇيىمدارى وقۋ باعدارلاماسىن سول ستاندارتتارعا ساي ەتىپ كەلتىرىپ جاتىر. تۇلەكتەردىڭ مەڭگەرگەن ءبىلىمىن تاۋەلسىز سەرتيفيكاتتاۋ ورتالىقتارى باعالاپ باستادى. مىندەتتەردىڭ وسىلايشا ءبولىنۋى ساپالى كادر دايىنداۋعا مەيلىنشە سەپ بولادى. بۇل جۇمىستىڭ باسى-قاسىندا ەڭبەك جانە حالىقتى الەۋمەتتىك قورعاۋ مينيسترلىگى جانىنان قۇرىلعان بىلىكتىلىك جونىندەگى ۇلتتىق ورگان بولماق.
بۇگىندە 200-دەن اسا ستاندارت زامانعا ساي لايىقتالىپ, جاڭادان 20-سى دايىندالدى. ايتا كەتسەك, بۇل جۇمىستىڭ بارلىعى تسيفرلىق فورماتقا كوشكەن.
«كەلەشەكتە قاراستىرىپ جاتقان ستاندارتتارىمىز قولدانىستاعى بىلىكتىلىك انىقتامالارىن الماستىراتىن بولادى. ونىڭ نەگىزىندە قىزمەتكەردىڭ مىندەتتەرى مەن ەڭبەكاقى كولەمى انىقتالادى», دەدى تامارا دۇيسەنوۆا.
وزگەرىپ جاتقان ترەندتەر جوعارى ءبىلىم سالاسىنا دا اسەرىن تيگىزىپ وتىر. قازىردە 2 800-دەن اسا ءبىلىم بەرۋ باعدارلاماسى كاسىبي ستاندارتتاردى ەسكەرە وتىرىپ ازىرلەنگەن, ونىڭ 166-سى يننوۆاتسيالىق بولىپ سانالادى.
«قازىرگى جانە كەلەشەكتە سۇرانىسقا ساي بولاتىن كادرلاردى دايىنداۋ ءۇشىن ايماقتىق جاڭا ماماندىقتار اتلاستارى ازىرلەنىپ جاتىر. ولار وڭىرلەردەگى ەڭبەك نارىعىنىڭ تالاپتارىن قاناعاتتاندىرۋعا باعىتتالعان», دەدى عىلىم جانە جوعارى ءبىلىم ۆيتسە-ءمينيسترى دارحان احمەد-زاكي.
«بۇل جۇمىسىمىزدىڭ ماڭىزى وتە زور. كاسىبي ستاندارتتارعا ساي ءبىلىم بەرىپ جاتقان وقۋ ورىندارىنا بولىنەتىن گرانتتار سانىن كوبەيتۋ جاعىن پىسىقتاۋىمىز كەرەك. ءبىزدىڭ باستى ماقسات – وقۋىن اياقتاعان تۇلەكتىڭ ەش قيىندىقسىز جۇمىسقا ورنالاسۋىنا جول اشۋ. بۇدان بارلىعى ۇتادى», دەپ تۇيىندەدى ت. دۇيسەنوۆا.