تۋريزم جانە سپورت ءمينيسترى ەرمەك مارجىقپاەۆ حانچجوۋدا (قىتاي) وتكەن جازعى ازيا ويىندارىنان كەيىن فەدەراتسيا باسشىلىعى مەن باس باپكەرلەردىڭ ەسەبىن تىڭداۋدى جالعاستىرىپ جاتىر. بۇگىن بوكس پەن دزيۋدو فەدەراتسيالارىنىڭ وكىلدەرى مەن ۇلتتىق قۇرامانىڭ باس باپكەرلەرى جازعى ازيا ويىندارىنداعى كوڭىل كونشىتپەيتىن كورسەتكىشكە قاتىستى ءوز ءۋاجىن ايتتى, دەپ حابارلايدى Egemen.kz وسى سالانىڭ ءباسپاسوز قىزمەتىنە سىلتەمە جاساپ.
مينيستر بوكسشىلاردىڭ فيزيكالىق حانە فۋنكتسيونالدىق دايىندىعىن كەم سوققانىن سىنادى. ء«وزىمىز دە تاماشالادىق, بوكسشىلار ەكىنشى راۋندتان كەيىن دەمىگىپ قالادى. فەدەراتسيا ۇسىنىس ايتىپ شەتەلدەن مامان دا شاقىرتتى, بىراق ناتيجە ماقتانارلىق ەمەس. ايەلدەر بوكسىندا ءتىپتى ءىزباسار بوكسشى, ياعني ۇلتتىق قۇرامادا رەزەرۆ جوق. ءبىر بوكسشى بارلىق تۋرنيرگە قاتىسىپ, كۇشىن سارقيدى», دەدى ە.مارجىقپاەۆ. دزيۋدوشىلارىمىزدىڭ دا حانچجوۋداعى جازعى ازيا ويىندارىندا ماقتايتىنداي جەتىستىككە جەتپەگەنىن ايتتى. ءتىپتى تاجىكستان, قىرعىزستان بالۋاندارى 1, وزبەكستان دزيۋدوشىلارى 3 التىن مەدال ولجالاعان حانچجوۋ تورىندە ءبىزدىڭ جىگىتتەردىڭ جىگەرسىزدىگىنە قىنجىلدى.
«سوڭعى ونجىلدىقتا دزيۋدودان ۇلتتىق قۇراما سالىستىرمالى تۇردە ءبىر دەڭگەيدە ونەر كورسەتىپ كەلدى. ەلدوس سمەتوۆتىڭ جەتىستىكتەرى فەدەراتسيانى العا تارتتى. بىراق قازىر ونىڭ جاسىنا ساي كۇش-جىگەرى ازداپ سارقىلا باستاعاندا ۇلتتىق قۇرامانىڭ شىنايى دەڭگەيى بەلگىلى بولدى», دەدى مينيستر.
ەندىگى مەجە – سەگىز ايدان كەيىن تۇڭلىگى تۇرىلەتىن پاريج جازعى وليمپياداسى. مينيستر ماڭىزدى باسەكەگە تىڭعىلىقتى دايارلىق جۇرگىزۋ ءۇشىن كەشەندى جوسپار ءتۇزۋدى مىندەتتەدى.