«AMANAT» پارتياسى فراكتسياسىنىڭ مۇشەسى جۇلدىز سۇلەيمەنوۆا ايەلدەرگە قاتىستى زورلىق-زومبىلىققا قارسى شارالار قابىلداۋ جونىندە پرەمەر-مينيسترگە دەپۋتاتتىق ساۋال جولدادى, دەپ جازادى Egemen.kz.
«جەمقورلىق ءۇشىن سوتتالىپ, ارتىنان راقىمشىلىققا يە بولعان ەكس-شەنەۋنىكتىڭ ءوز ايەلىن ولتىرگەنى تۋرالى جانتۇرشىگەرلىك اشىق اقپاراتتار قوعامدا الاڭداۋشىلىق تۋعىزدى. وتباسىلىق زورلىق-زومبىلىق, قاتىگەزدىك, پاتريارحاتتىق وزبىرلىققا شىداماعان ايەلدەردىڭ جان داۋىسىن ەستيتىن جانە قاتاڭ شارا قابىلدايتىن ۋاقىت جەتتى», دەدى ءماجىلىس دەپۋتاتى.
ج.سۇلەيمەنوۆانىڭ ايتۋىنشا, 2020 جىلدان بەرى دەپۋتاتتاردىڭ ۇسىنىستارىمەن زاڭنامادا بىرنەشە قاتاڭ وزگەرىستەر ەنگىزىلگەن. ءبىر عانا مىسال: تۇرمىستىق زورلىق-زومبىلىق بولعان جاعدايدا حاتتاما جاساۋ ءۇشىن قازىر كۋاگەرلەردىڭ ايعاقتارىنا جانە بەينەباقىلاۋعا سۇيەنە وتىرىپ, زورلىق-زومبىلىق جاساۋ فاكتىسى بويىنشا جابىرلەنۋشىنىڭ ارىزىنسىز دا ءىس قوزعاۋ قاراستىرىلعان. بىراق بۇعان قاراماستان زورلىق-زومبىلىقتىڭ تولاستاماۋى – ايەلدەردىڭ قۇقىعىن قورعاۋ مەن بالالار قاۋىپسىزدىگىن ساقتاۋ زاڭناماسىن قاتاڭداتۋمەن قوسا, قوعامدا قىلمىسقا «مۇلدەم توزبەۋشىلىك» ءپرينتسيپى مەن زاڭ-ءتارتىپتىڭ قاتاڭ ساقتالۋى دارىپتەۋدى-ناسيحاتتاۋدى قاجەت ەتەدى. سول كەزدە عانا قابىلدانعان زاڭدار ساپالى ورىندالاتىن بولادى.
«مەملەكەت باسشىسى وتباسىندا ويران سالاتىندار جازاعا تارتىلماسا, ولار ودان بەتەر باسىنىپ كەتەدى, مۇنداي ارەكەتتەر ءۇشىن جازانى كۇشەيتەتىن كەز كەلدى دەپ سانايمىن دەگەن بولاتىن. «AMANAT» پارتياسى فراكتسياسى وسى تاپسىرمانى ورىنداۋ ماقساتىندا قازاقستاننىڭ كەيبىر زاڭنامالىق اكتىلەرىنە ايەلدەردىڭ قۇقىعىن قورعاۋ جانە بالالاردىڭ قاۋىپسىزدىگىن قامتاماسىز ەتۋ ماسەلەلەرىنە ارنالعان زاڭ جوباسىن شۇعىل تۇردە ازىرلەدى. زاڭ تۇجىرىمداماسىندا تۇزەتۋلەر: زورلىق-زومبىلىقتى قىلمىس رەتىندە تانۋ, پەدوفيلدەرگە ءومىر بويى باس بوستاندىعىنان ايىرۋ جازاسىن كەسۋ, جالپى جازا مەن جاۋاپكەرشىلىكتى كۇشەيتۋ تەتىكتەرىن قاراستىرعان», دەدى دەپۋتات.
دەپۋتاتتىڭ سوزىنشە, وكىنىشكە قاراي, تۇسىنىكسىز سەبەپتەرمەن زاڭ ءالى ماجىلىسكە ەنگەن جوق. ۇكىمەتتىك ەمەس ۇيىمداردىڭ زەرتتەۋلەرىنشە 2021 جىلى ۇيدەگى زورلىق-زومبىلىقتىڭ سوتقا تەك 40 پايىزى جەتكەن, ال ولاردىڭ 39 پايىزى 2 ساعاتتان 3 تاۋلىككە دەيىنگى اكىمشىلىك جازامەن قۇتىلىپ كەتكەن.
قازاق ايەلىنىڭ بولاشاعى, بۇگىنگى تاعدىرى بارشا قوعامعا تىكەلەي بايلانىستى دەگەن جۇلدىز سۇلەيمەنوۆا «AMANAT» پارتياسىنىڭ دەپۋتاتتارى اتىنان مىناداي ۇسىنىستارىن العا تارتتى.
ايەلدەر مەن بالالار زورلىق-زومبىلىقتىڭ قۇربانى بولماس ءۇشىن ءتىپتى جەڭىل تۇردەگى زورلىق-زومبىلىق – قىلمىس دەپ تانىلۋى قاجەت. ايەل مەن بالاعا زورلىق-زومبىلىق كورسەتكەندەرگە اياۋشىلىق تانىتۋعا بولمايدى. ەشكىمنىڭ ايەل ادامداردى قورلاپ, ولتىرۋگە قاقى جوق, قىلمىسكەرگە قاتاڭ جازا بەرىلۋىن تالاپ ەتەمىز. زاڭنامادا تۇرمىستىق زورلىق-زومبىلىقتىڭ الدىن الاتىن ءھام قاتاڭ شارالار قابىلدايتىن جاۋاپتى مەملەكەتتىك ورگاندى بەكىتەتىن ۋاقىت جەتتى. ۇكىمەتتەن ايەلدەردىڭ قاۋىپسىزدىگىن قامتاماسىز ەتۋ بويىنشا, سونىمەن قاتار, اجىراسقان ايەلدەرگە اليمەنتتى ۋاقتىلى تولەۋگە باعىتتالعان ناقتى مەحانيزمدەردى ايقىندايتىن مەملەكەتتىك ساياساتتى بەكىتۋدى سۇرايمىز. وتباسىلىق زورلىق-زومبىلىقتىڭ پروفيلاكتيكاسى مەن كريميناليزياسى قاراستىرىلعان بىرنەشە دەپۋتاتتاردىڭ باستاماسىمەن ازىرلەنگەن قازاقستاننىڭ كەيبىر زاڭنامالىق اكتىلەرىنە ايەلدەردىڭ قۇقىعىن قورعاۋ, بالالاردىڭ قاۋىپسىزدىگىن قامتاماسىز ەتۋ ماسەلەلەرىنە ارنالعان زاڭ تۇجىرىمداماسىن ماجىلىسكە تەز ارادا ەنگىزۋىن سۇرايمىز.«مەملەكەت باسشىسى اتاپ ايتقانداي, زاڭ مەن ءتارتىپ ىشكى تۇراقتىلىقتىڭ كەپىلى. زاڭ ۇستەمدىگى قاعيداتى ءبىزدىڭ ەڭ باستى باعدارىمىز بولۋى ءتيىس», دەپ تۇيىندەدى جۇلدىز سۇلەيمەنوۆا.