وسىمەن ءتورت جىل قاتارىنان ەلىمىزدىڭ ءۇش مەگاپوليسىندە «جۇمىس ىستەيتىن جاستار ءۇشىن ساتىپ الۋ قۇقىعىنسىز جالعا بەرىلەتىن تۇرعىن ءۇي» باعدارلاماسى جۇزەگە اسىرىلىپ كەلەدى. ول ءۇشىن جىل سايىن استانا, الماتى, شىمكەنت تۇرعىندارىنا ورتا ەسەپپەن 1 مىڭ جاڭا پاتەردەن بولىنەدى.
بۇگىندە باعدارلاما شەڭبەرىندە ءۇش قالادا 10 مىڭعا جۋىق ءۇي جالعا بەرىلگەن. ۇكىمەت جۇمىس ىستەيتىن جاستارعا 2025 جىلعا دەيىن 12 مىڭ باسپانا ءبولۋدى جوسپارلاپ وتىر. جوبا شارتى بويىنشا ءۇش جىل وتكەننەن كەيىن جالعا الۋشى بولىنگەن تۇرعىن ءۇيدى بوساتۋى كەرەك. مۇنداعى باستى ماقسات – 35-كە دەيىنگى وتانداستارىمىزعا باسپانا ساتىپ الۋ ءۇشىن العاشقى جارنا جيناۋعا قولداۋ ءبىلدىرۋ.
«بىلتىرعا دەيىن جاستار ساناتىنا 29 جاسقا دەيىنگى ازاماتتار ەنسە, بيىلدان باستاپ جاس شەگى 35 جاسقا دەيىن ۇزارتىلدى. الدىڭعى ۋاقىتتا ۇيلەر 5 جىلعا بەرىلگەن ەدى. قازىر 3 جىلعا قىسقارتىلدى. ولاردىڭ مىندەتتى تۇردە زەينەتاقى قورىندا اۋدارىلعان مىندەتتەمەلەرىمەن بىرگە رەسمي تۇردە جۇمىسى بولۋى كەرەك», دەدى شىمكەنت قالاسى تۇرعىن ءۇي باسقارماسىنىڭ ەسەپكە الۋ جانە تۇرعىن ۇيلەردى ءبولۋ ءبولىمىنىڭ باسشىسى جۇلدىزاي وردابەكوۆا.
2023-2025 جىلدارى قالالاردىڭ ارقايسىسىندا قوسىمشا 3 مىڭ جالعا بەرۋ پاتەرلەرىن ساتىپ الۋ ءۇشىن جەرگىلىكتى بيۋدجەتتەردەن 32,3 ملرد تەڭگە ءبولۋ جوسپارلانىپتى. ەلوردادا 770 جاس پاتەرمەن قامتىلادى. ءبىر ەرەكشەلىگى, باسپانا جالداۋ باعاسى شارىقتاپ تۇرعاندا, بۇل ۇيلەردىڭ اي سايىنعى تولەمى نەبارى 5000-15000 تەڭگە بولادى. استانادا قۇجاتتاردى قابىلداۋ مەرزىمى 6 قاراشادان 12 قاراشاعا دەيىن «qatysu.zhilfond.kz» پورتالى ارقىلى ەلەكتروندى تۇردە جۇرگىزىلدى. ال شىمكەنتتىك جاستار 8-10 قاراشا ارالىعىندا «kezekte.kz» پورتالىندا ەلەكتروندى تسيفرلىق قولتاڭباسى ارقىلى ءوتىنىش بەردى. بيىل وڭىردە جىل سوڭىنا دەيىن «تۇران» شاعىن اۋدانىندا ورنالاسقان 800-دەن اسا پاتەردى جالعا بەرۋ كوزدەلگەن. الماتىدا مىڭعا جۋىق پاتەر قاراستىرىلىپتى.
جوبا تالابى بويىنشا «جاستار» باعدارلاماسىنا قاتىسۋشىلارعا قويىلاتىن باستى تالاپتار: ازاماتتىڭ جاسى 35-كە تولماعان, جۇمىس ىستەيتىن بولۋى; ورتا, ورتا-ارنايى, جوعارى, جوعارى وقۋ ورنىنان كەيىنگى ءبىلىمى بولۋى جانە رەسمي جۇمىس ورنى بولۋعا ءتيىس; ءوتىنىش بەرۋشىنىڭ استانا, الماتى, شىمكەنت قالاسىندا ءوتىنىم بەرگەنگە دەيىن كەيىنگى 3 جىلدان كەم ەمەس تۇراقتى تىركەۋدە بولۋى; استانا, الماتى, شىمكەنت قالاسىندا ءوتىنىش بەرۋشىنىڭ وتباسى مۇشەلەرىن (جۇبايى جانە بالالارى بولعان جاعدايدا) تۇراقتى تىركەۋى بولۋى; ءوتىنىش بەرۋشىدە جانە وتباسىنىڭ بارلىق مۇشەسىندە قازاقستان رەسپۋبليكاسى بويىنشا مەنشىك قۇقىعىنداعى تۇرعىن ءۇيدىڭ, سونداي-اق ءوتىنىم بەرگەن كەزدە كەيىنگى 5 جىل ىشىندە ساتىپ الۋ قۇقىعىمەن جالعا بەرىلەتىن تۇرعىن ءۇيدىڭ بولماۋى; تولەم قابىلەتىن راستاۋ (سوڭعى 6 ايدا ءوتىنىش بەرۋشىدە اي سايىنعى تابىسى كەمىندە 40 اەك نەمەسە 138 000 تەڭگە بولۋى كەرەك).