ەلوردادا ەكى كۇنگە ۇلاسقان ايتىس ءوتتى. Amanat پارتياسىنىڭ قولداۋىمەن مادەنيەت جانە اقپارات مينيسترلىگى ۇيىمداستىرعان «التىن دومبىرا» بايگەسىندە ەلىمىزدىڭ ءار وڭىرىنەن 16 اقىن ءسوز جارىستىردى, دەپ حابارلايدى Egemen.kz پارتيانىڭ ءباسپاسوز قىزمەتىنە سىلتەمە جاساپ.
Amanat پارتياسىنىڭ اتقارۋشى حاتشىسى داۋلەت كارىبەك كەلەشەكتە دە پارتيا قازاق رۋحانياتىنا قولداۋ كورسەتەتىنىن ايتتى. مادەنيەت جانە اقپارات ۆيتسە-ءمينيسترى ارمان جۇدەباەۆ ەكى كۇنگە ۇلاسقان اقىندار ايتىسىندا تاقىم قىسىپ قولداۋ كورسەتىپ, ءسوز سايىستىرعان دۇلدىلدەردى قولپاشتاعان كورەرمەندەرگە العىسىن جەتكىزدى.
قازاقستاننىڭ حالىق اقىنى ءاسيا بەركەنوۆا توراعالىق ەتكەن قازىلار القاسى باس بايگەنىڭ جۇلدەسى «التىن دومبىرا» مەن اۆتوكولىكتى قاراعاندىلىق ماقسات احانوۆقا بايلادى.
«ۇندەمەسەم وزىمە ءوزىم تورە, سويلەپ كەتسەم وزىمە ءسوزىم تورە», دەيدى قازاق حالقى. سول سوزگە بۇگىن ءادىل باعاسىن بەرگەن قازىلار القاسىنىڭ ارى تازا دەگەن ويدامىن», دەدى ءا.بەركەنوۆا. 1-ورىن مەن «ايتىس اقتاڭگەرى» اتاعى قىزىلوردالىق مەيىربەك سۇلتانحانعا, 2-ورىن پاۆلودارلىق اسپانبەك شۇعاتايعا ءتيدى. 3-ورىندى ۇلىتاۋلىق تولەگەن جامانوۆ پەن باتىس قازاقستان وبلىسىنان كەلگەن جانسايا مۋسيناعا بۇيىردى. ارنايى جۇلدە جامبىل وبلىسىنان قاتىسقان الينا ايدارالى, باتىس قازاقستان وبلىسىنىڭ ايتىسكەرى مۇرادىم مەيىرلانوۆ جانە الماتىلىق شۇعايىپ سەزىمحانعا بەرىلدى. وزگە اقىندارعا دا سىي-سياپات تابىستالدى.