«حالىق» قايىرىمدىلىق قورى استانا قالاسى اكىمدىگىنىڭ «JOLTAP» الەۋمەتتىك جوباسىن جۇزەگە اسىرۋ جونىندەگى باستاماسىن قارجىلاي قولدادى, دەپ حابارلايدى Egemen.kz.
«JOLTAP» جوباسى اياسىندا ەلوردا تۇرعىندارى كوپ شوعىرلاناتىن اۋماقتاردا «بارشاعا مۇمكىندىك» اتاۋىمەن 10 مودۋلدىك پۋنكتى ەسىگىن ايقارا اشتى. مودۋلدىك پۋنكت كەڭەسشىلەرى تۇرعىن ءۇي باعدارلامالارى, بيزنەس گرانتتارى, الەۋمەتتىك كومەكتەر جانە جۇمىسقا ورنالاسۋ مۇمكىندىكتەرى تۋرالى اقپاراتتار بەرەدى. مودۋلدىك پۋنكتتەر جۇمىس ىستەگەن ءبىر جارىم ايدا 52 مەملەكەتتىك قولداۋ شارالارى بويىنشا اكىمدىككە 3 مىڭنان استام ادام كومەك سۇراپ جۇگىندى. 720 ادام كاسىپ اشۋ ءۇشىن قايتارىمسىز قارجىلاي قولداۋ مەن شاعىن نەسيە الۋعا ءوتىنىش ءبىلدىردى.
جوبا مەملەكەت باسشىسىنىڭ تاپسىرماسىن ورىنداۋ ماقساتىندا استانا قالاسى اكىمدىگىنىڭ باستاماسىمەن جۇزەگە اسىرىلىپ جاتىر. ول ازاماتتارعا تابىسىن ارتتىرۋ مۇمكىندىكتەرىن تاڭداۋدا كومەكتەسۋگە جانە كومەك كورسەتۋگە باعىتتالعان. جوبانىڭ قۇرالدارى تۇتاستاي العاندا جۇرگىزىلىپ جاتقان الەۋمەتتىك رەفورمالاردىڭ ءتيىمدى قوسىمشاسى بولىپ تابىلادى.
JOLTAP جوباسى اياسىندا قالا تۇرعىندارى ەكى قىسقا مەرزىمدى باعدارلاما بويىنشا تەگىن ءبىلىم الا الادى. ءبىرىنشى باعدارلاما تىگىنشى, كاسسير سياقتى ساۋدا, قۇرىلىس جانە قىزمەت كورسەتۋ سالالارىنداعى سالا جەتەكشىلەرىنىڭ ستاندارتتارى مەن تالاپتارىن نەگىزگە الا وتىرىپ, بىلىكتى جۇمىسشى مامانداردى دايىنداۋعا ارنالعان. «Freelance مۇمكىندىك» دەپ اتالاتىن ەكىنشى باعدارلاما نارىقتا سۇرانىسقا يە جانە تانىمال تسيفرلىق داعدىلاردى وقىتۋدى قاراستىرادى. JOLTAP جوباسىنىڭ ارقاسىندا استانادا 10 مىڭنان استام حالىق تسيفرلىق سالانىڭ سەرتيفيكاتتالعان بىلىكتى مامانىنا اينالادى. جوبا – مەملەكەت, بيزنەس جانە قوعامنىڭ بىرلەسكەن كۇش-جىگەرىمەن قۇرىلعان ءتيىمدى جۇيە.
«حالىق» قايىرىمدىلىق قورى كوپ جىلداردان بەرى الەۋمەتتىك ماسەلەلەردى شەشۋگە جانە حالىقتىڭ مۇمكىندىكتەرىن جاقسارتۋعا باسا نازار اۋدارىپ كەلەدى. جالپى, «حالىق» قورىنىڭ 2016 جىلدان بەرگى قىزمەتى بارىسىندا قامقورشىلار تيمۋر مەن دينارا ق ۇلىباەۆتاردىڭ ارقاسىندا حالىقتى الەۋمەتتىك قورعاۋ, الەۋمەتتىك ينفراقۇرىلىمدى دامىتۋ, ءبىلىم بەرۋ جانە بۇقارالىق سپورت سالالارىندا جالپى قۇنى 50 ميلليارد تەڭگەگە جۋىق 100-دەن استام جوبا جۇزەگە اسىرىلدى.