بەيجىڭدە «وركەنيەتتەر قارىم-قاتىناسى جانە جاھاندىق دامۋ» فورۋمى ءوتتى. فورۋم اياسىندا قىتاي مەن ورتالىق ازيا ەلدەرى مەملەكەتتىك باسقارۋ اكادەميالارى اراسىنداعى ىنتىماقتاستىق جەلىسى قۇرىلدى. ونى قۇرۋ تۋرالى قىتاي ۇلتتىق مەملەكەتتىك باسقارۋ اكادەمياسى باستاما كوتەرگەن, دەپ حابارلايدى Egemen.kz.
«جەلى مەملەكەتتىك قىزمەتشىلەردى دايارلاۋ جانە وقىتۋ سالاسىنداعى ىنتىماقتاستىققا جاڭا سەرپىن بەرەدى, دەمەك, جالپى ەلدەردى مودەرنيزاتسيالاۋعا ىقپال ەتەتىن بولادى», دەدى استانا مەملەكەتتىك قىزمەت حابى باسقارۋشى كوميتەتىنىڭ توراعاسى اليحان بايمەنوۆ.
جەلىنىڭ قۇرىلتايشى-مۇشەلەرى – قازاقستان, قىرعىز رەسپۋبليكاسى, تاجىكستان, تۇرىكمەنستان جانە وزبەكستانداعى مەملەكەتتىك باسقارۋ اكادەميالارى.
جالپى, قىتاي ۇلتتىق مەملەكەتتىك باسقارۋ اكادەمياسى باستاماسىمەن وتكەن وركەنيەتارالىق كوممۋنيكاتسيا مەن جاھاندىق دامۋ فورۋمى جۇمىسىنا ەۋروپا, امەريكا, افريكا, تاياۋ شىعىس جانە ورتالىق ازيانىڭ 30-دان استام ەلىنەن ۇكىمەت مۇشەلەرى, ءىرى ساياسي قايراتكەرلەر, حالىقارالىق ۇيىم باسشىلارى مەن تالداۋ ورتالىقتارى ساراپشىلارى قاتىستى.
پلەنارلىق سەسسيادا قىتاي كومپارتياسى جوعارى پارتيا مەكتەبى (قىتاي ۇلتتىق مەملەكەتتىك باسقارۋ اكادەمياسى) اتقارۋشى ۆيتسە-پرەزيدەنتى سي چۋنتاو, جاڭا دامۋ بانكى پرەزيدەنتى جانە برازيليانىڭ ەكس-پرەزيدەنتى ديلما رۋسسەفف, برۋكينگ ينستيتۋتىنىڭ قامقورشىلىق كەڭەسىنىڭ توراعاسى دجون تورنتون (اقش), بەلگيانىڭ بۇرىنعى پرەمەر-ءمينيسترى يۆ لەتەرمە, استانا مەملەكەتتىك قىزمەت حابى باسقارۋشى كوميتەتى توراعاسى اليحان بايمەنوۆ جانە باسقا دا بىرقاتار حالىقارالىق ساراپشى ءسوز سويلەدى.
سي چۋنتاو تۇراقتى ءارى ۇيلەسىمدى الەمدىك دامۋ ءۇشىن ءتۇرلى وركەنيەتتەر اراسىنداعى قارىم-قاتىناس پەن ىنتىماقتاستىقتى دامىتۋدىڭ, ديالوگ پەن ءوزارا تۇسىنىستىكتى نىعايتۋدىڭ ماڭىزدىلىعىن اتاپ ءوتتى.
ءوز سوزىندە اليحان بايمەنوۆ ادام تابيعاتىنا ءتان ىزدەنىمپازدىق, جاڭاشىلدىق, تانىم كوكجيەگىن كەڭەيتۋگە ۇمتىلىس وركەنيەت دامۋىنا ءاردايىم سەرپىن بەرىپ كەلگەنىن ايتتى. ال عاسىرلار بويى كونفۋتسي, ءال-فارابي, اباي سەكىلدى ويشىلدار ادامزاتقا ورتاق قۇندىلىقتارعا نەگىزدەلگەن ورتا قۇرۋعا ۇندەۋ ارقىلى عىلىمي-تەحنيكالىق پروگرەسس جەمىستەرىن ادام يگىلىگىنە جۇمساۋعا بەيىم احۋال قالىپتاستىرۋعا ۇلەس قوسقانىن اتاپ ءوتتى. ادام تابيعاتىنا ءتان قاۋىمداسۋعا, قارىم-قاتىناس اياسىن, ورتاسىن, ارىپتەستىك كەڭىستىگىن كەڭەيتۋگە ۇمتىلىس تا وركەنيەت دامۋى تەتىگى بولعانىن تىلگە تيەك ەتتى.
ماسەلەن, ونى مىڭجىلدىقتىڭ دامۋ ماقساتتارى, تۇراقتى دامۋ ماقساتتارى, سونداي–اق ء«بىر بەلدەۋ-ءبىر جول» باستاماسى جانە ورتاق تاعدىرلى عالامدىق قاۋىمداستىق تۇجىرىمداماسى سياقتى عالامدىق باستامالاردان كورۋگە بولادى. ولار ادامزات پروگرەسى ءۇشىن ءاربىر ەلدىڭ تۇراقتى دامۋى مەن الەۋەتىن ارتتىرۋ بويىنشا جاھاندىق ورتا قالىپتاستىرۋعا باعىتتالعانىن ايتتى. «بۇل تۇرعىدا جۇيەلى تاجىريبە مەن ءبىلىم الماسۋ, ونىڭ ىشىندە بۇگىنگى فورۋمدار سياقتى جيىندار - جاھاندىق ديالوگتى بايىتۋدىڭ وتە ماڭىزدى قۇرالى», دەدى بايمەنوۆ.
فورۋم اياسىندا ورتالىق ازيا ءوڭىرى وكىلدەرى قكپ ورتالىق پارتيا مەكتەبى (قىتاي ۇلتتىق مەملەكەتتىك باسقارۋ اكادەمياسى) اتقارۋشى ۆيتسە-پرەزيدەنتى سي چۋنتاومەن كەزدەسىپ, پىكىر الماستى.
كەزدەسۋ بارىسىندا اليحان بايمەنوۆ پەن قازاقستان, قىرعىزستان, تاجىكستان, تۇرىكمەنستان جانە وزبەكستان مەملەكەتتىك باسقارۋ اكادەميالارى باسشىلارى كادرلاردى دايارلاۋ جانە قايتا دايارلاۋ سالاسىنداعى ىنتىماقتاستىق پەرسپەكتيۆالارى تۋرالى ءوز ويلارىن ورتاعا سالدى.
سونىمەن قاتار بايمەنوۆ قىتايداعى مەملەكەتتىك باسقارۋ رەفورمالارىنا ارنالعان حاب جۋرنالىنىڭ ارنايى شىعارىلىمىن ۇسىنىپ, حابتىڭ قاتىسۋشى ەلدەرى مەن سەرىكتەستەرىنىڭ وسى باسىلىمعا قىزىعۋشىلىعى مەن سۇرانىسىن اتاپ ءوتتى.