ۇكىمەت «جايلى مەكتەپ» ۇلتتىق جوباسىنا وتاندىق جيھاز جانە ارلەۋ ماتەريالدارىن وندىرۋشىلەردىڭ قاتىسۋىن ارتتىرۋدى كوزدەيتىن وزگەرىستەر مەن تولىقتىرۋلار ەنگىزدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
اتاپ ايتقاندا, جاڭا فورماتتاعى مەكتەپتەر قۇرىلىسى كەزىندە بارلىق جيھاز وتاندىق تاۋار وندىرۋشىلەردەن ساتىپ الىنادى. سونداي-اق سىرتقى قاسبەتتەردى ارلەۋدە قولدانىلاتىن ماتەريالداردىڭ باسىم بولىگى ەلىمىزدىڭ ءوندىرىسىنىڭ تاۋارلارى بولماق.
كاسىپكەرلەردى قولداۋدىڭ قوسىمشا شاراسى رەتىندە ۇزاق مەرزىمدى جەتكىزۋدى جوسپارلاۋعا جانە ءتيىمدى شارتتارمەن جوبانى قارجىلاندىرۋعا مۇمكىندىك بەرەتىن الدىن الا كەلىسىمشارتتاردى قولدانۋ قاراستىرىلعان.
ايتا كەتەيىك, وقۋ-اعارتۋ مينيسترلىگى جەرگىلىكتى اتقارۋشى ورگاندارمەن بىرلەسىپ, سالىنىپ جاتقان مەكتەپتەردى جابدىقتاۋ ءۇشىن جيھازدار مەن قۇرال-جابدىقتارعا قاجەتتى بارلىق تەحنيكالىق شارتتاردى انىقتاعان. ۇكىمەت قابىلداعان وزگەرىستەردى ساپالى ىسكە اسىرۋ ءۇشىن ەلىشىلىك قۇندىلىق ۇلەسىنىڭ كورسەتكىشتەرىنە مونيتورينگ جۇرگىزىلەدى.
بۇدان بولەك, قوعامدىق مونيتورينگ جۇرگىزۋ ءۇشىن اقپاراتتىق جۇيە ازىرلەنىپ جاتىر. وسىلايشا, ءاربىر تۇرعىن مەكتەپ قۇرىلىسىنىڭ بارىسىن قوعامدىق داشبورد ارقىلى باقىلاۋعا مۇمكىندىك الادى. وسى ماقساتتا قازىر ءاربىر وبەكتىدە بەينەباقىلاۋ كامەرالارى ورناتىلىپ جاتىر.
ەسكە سالايىق, «جايلى مەكتەپ» ۇلتتىق جوباسى مەملەكەت باسشىسى قاسىم-جومارت توقاەۆتىڭ تاپسىرماسىمەن جۇزەگە اسىرىلىپ كەلەدى. جوبا اياسىندا 740 مىڭ ورىندىق 369 مەكتەپ اشۋ جوسپارلانعان. بۇل ءوز كەزەگىندە اپاتتى جاعدايداعى جانە ءۇش اۋىسىمدى مەكتەپتەر ماسەلەلەرىن شەشەدى.
ۇلتتىق جوبانى ىسكە اسىرۋ ءۇشىن 2023-2025 جىلدارعا ارنالعان رەسپۋبليكالىق بيۋدجەتتەن 2,4 ترلن تەڭگە قاراستىرىلعان. 2023 جىلى 461 مىڭ ورىندىق 217 مەكتەپ قۇرىلىسىن باستاپ, ولاردى كەلەر جىلدىڭ سوڭىنا دەيىن پايدالانۋعا بەرۋ جوسپارلانعان. ال 2024 جىلى 279 مىڭ ورىندىق 152 مەكتەپ قۇرىلىسىن باستاپ, ولاردى 2025 جىلى اشۋ جوسپارلانىپ وتىر.