ەلوردا تورىندە – «Egemen Qazaqstan» گازەتىنىڭ باس عيماراتىندا پولشانىڭ قازاقستانداعى جانە قىرعىزستانداعى توتەنشە جانە وكىلەتتى ەلشىسى, پروفەسسور سەليم حازبيەۆيچپەن كەزدەسۋ ءوتتى. جيىندا «پولشا-ليتۆا تاتارلارى – التىن وردانىڭ مۇراگەرلەرى» اتتى كىتابى تانىستىرىلدى. اتالعان جيناق «قازاق ۋنيۆەرسيتەتى» باسپاسىنان شىققان.
تۇساۋكەسەر ءراسىمنىڭ مودەراتورى «قازاق گازەتتەرى» جشس باس ديرەكتورى, اكادەميك ديحان قامزابەك ۇلى التىن وردانىڭ 750 جىلدىعىنا ارنالعان كىتاپتىڭ مازمۇنىن بايانداپ, تاريحي ماڭىزىنا توقتالدى.
«كوپتەگەن ەۋرازيا حالىقتارى ءوزىنىڭ شىعۋ تەگى ءۇشىن التىن ورداعا نەمەسە جوشى ۇلىسىنا قارىزدار. التىن وردا كوشپەلىلەرىنىڭ مۇراگەرلەرى – بۇگىنگى قازاقتار, تاتارلار, نوعايلار, قاراقالپاقتار, پولياك-ليتۆالىق تاتارلار. التى عاسىر بۇرىن التىن وردادان ءبولىنىپ شىققان كوشپەلى حالىقتىڭ ءبىر بولىگى ليتۆا ۇلى گەرتسوگتىگىنىڭ اۋماعىنا كەلدى. پولشادا ولاردىڭ بارلىعىن «تاتارلار» دەپ اتاعان», دەپ ءتۇسىندىردى سەرىكتەستىك باسشىسى.
قازىر پولشادا ەكى مىڭنان اسا تاتار تۇرادى. ولار وزدەرىنىڭ تۇركى ەكەنىن ۇمىتپاۋعا تىرىسادى. جاڭا جيناقتىڭ اۆتورى, اقىن, جۋرناليست, تاريح دوكتورى سەليم حازبيەۆيچ تە – پولياك تاتارى. جيىن بارىسىندا ول كىتابى تۋرالى تەرەڭىنەن بايانداپ, كەشەگى تاريحتان تولعادى.
«مەنىڭ انامنىڭ بابالارى نوعاي ورداسىنان تارايدى. XV عاسىردا ازاماتتىق قاقتىعىستار مەن سوعىستىڭ اسەرىنەن ليتۆا ۇلى گەرتسوگتىگىنە التىن وردادان بوسقىندار كەلەدى. بۇل جەر ءبارىن قابىلدادى: مۇسىلماندار, پراۆوسلاۆتار, كاتوليكتەر, ەۆرەيلەر. بۇل ءبىر تاڭعاجايىپ مەملەكەت بولدى», دەيدى اۆتور. ءيا, وسىدان سوڭ پولياك-ليتۆا تاتارلارى ءوز مادەنيەتىن ساقتاۋعا جاعداي جاسالعان كنيازدىكتە تامىر جايا باستاعان.
«XVII عاسىردىڭ اياعىندا تاتارلار پولياك تىلىندە سويلەپ, ءوز دىندەرىن ساقتاپ قالدى. بۇل تۇرعىدا پولشا ارقاشان تولەرانتتى جانە اشىق بولدى. كاتوليكتىك ەل بولعانىمەن, وزگە ءدىن وكىلدەرىنە تۇسىنىستىك تانىتا ءبىلدى», دەدى سەليم حازبيەۆيچ.
تۇساۋكەسەر بارىسىندا قازۇۋ پروفەسسورى جەتپىسباي بەكبولات ۇلىنىڭ «پولياك-قازاق باۋىرلاستىعى تۋرالى ويلار» جانە مارقۇم جۋرناليست حاميدوللا ءراحماتۋلليننىڭ ء«جۋرناليستىڭ تۇسىندىرمە ەكونوميكالىق سوزدىگى» اتتى كىتاپتارى دا تانىستىرىلدى. ايتا كەتەيىك, جەتپىسباي بەكبولات ۇلى بىرنەشە جىل پولشادا عىلىمي جۇمىستارمەن اينالىسقان.
«پولشادا 2,5 مىڭعا جۋىق تاتار تۇرادى. سانى از بولعانىمەن, ولار كوشپەلى مادەنيەتتى بەلسەندى تۇردە زەرتتەپ, ناسيحاتتاپ ءجۇر. حح عاسىردىڭ باسىندا جازۋشى, پولياك تاتارى حەنريك سەنكەۆيچ نوبەل سىيلىعىنىڭ لاۋرەاتى اتاندى. ونىڭ «وگنەم ي مەچوم» تريلوگياسى ميلليونداعان وقىرماندى تامساندىردى. پولياك سپورتىنىڭ تاريحىنداعى العاشقى وليمپيادا چەمپيونى, جەڭىل اتلەت حالينا كونوپاتسكايا دا – پولياك تاتارى. بۇل شاعىن حالىقتىڭ ادامزات تاريحىندا الاتىن ورنى زور», دەپ اتاپ ءوتتى جەتپىسباي بەكبولات ۇلى.
القالى جيىنعا قاتىسۋشىلار پولياك-ليتۆا تاتارلارى تاقىرىبى قوسىمشا زەرتتەۋدى قاجەت ەتەتىنىن اتاپ ءوتتى. وسى ورايدا قازاقستان مەن پولشا زيالىلارىنىڭ ىنتىماقتاستىعى نىعايا تۇسپەك.