ەلباسى نۇرسۇلتان نازارباەۆتىڭ تىكەلەي باستاماسىمەن جۇمىس ىستەپ كەلە جاتقان “بولاشاق” حالىقارالىق ستيپەندياسى ارقىلى 16 جىلدىڭ ىشىندە مىڭداعان ەل جاستارى تورتكۇل دۇنيەنىڭ الدىڭعى قاتارلى جوعارى وقۋ ورىندارىندا بىلىمدەرىن تولىقتىرىپ, وتانىمىزدىڭ وركەندەۋىنە ءوز ۇلەستەرىن قوسىپ ءجۇر. وتكەن جىلدارداعىداي بيىل دا پرەزيدەنتتىڭ حالىقارالىق ستيپەندياسىنا ۇمىتكەرلەردىڭ قۇجاتىن قابىلداۋ باستالدى. سوعان وراي, “حالىقارالىق باعدارلامالار ورتالىعى” اق ءباسپاسوز ءماسليحاتىن وتكىزدى.
اكتسيونەرلىك قوعامنىڭ پرەزيدەنتى دانيار بەكتۇرعانوۆ بيىلعى قۇجات قابىلداۋ جايى تۋرالى جان-جاقتى مالىمەت بەردى. اكادەميالىق وقۋ ءۇشىن كەشەدەن باستاپ 30 شىلدەگە دەيىن, ال عىلىمي تاعىلىمداما بويىنشا 7 ماۋسىمنان 30 قىركۇيەككە دەيىن ۇمىتكەرلەر ءوز وتىنىشتەرىن بەرە الاتىنىن تىلگە تيەك ەتىپ, ولار ءۇش تۋر نەگىزىندە بىلىمدەرى مەن بىلىكتەرىن تارازىلايتىنىن ايتتى. ءبىرىنشى تۋردا تالاپكەرلەر الدىمەن شەت تىلىنەن العان ءبىلىمىن انىقتاۋ ءۇشىن تەست تاپسىرسا, بۇدان كەيىن مەملەكەتتىك ءتىلدى مەڭگەرۋى جايلى قازتەست جۇيەسىنىڭ كومەگىمەن سىناق ءوتكىزەدى. ايتالىق, مەملەكەتتىك ءتىلدى مەڭگەرگەنىن انىقتاۋ ءۇشىن تەستە 150 سۇراق بەرىلگەن بولسا, سونىڭ 90-ىنا دۇرىس جاۋاپ بەرگەن جاعدايدا عانا ەكىنشى تۋرعا ءجىبەرىلەدى. وسى ارادا ءبىرىنشى سىناقتا تالاپكەرلەر تاڭداعان ەلىندەگى جوعارى وقۋ ورىندارىنا ءتۇسۋ ءۇشىن سول مەملەكەتتىڭ تىلىنەن ەمتيحان بەرەتىنىن ايتا كەتۋىمىز كەرەك. جوعارىداعى ەكى تۋردان ءسۇرىنبەي وتكەندەر پسيحولوگيالىق تەستىلەۋگە جىبەرىلەدى. ودان كەيىنگى شەشىمدى تاۋەلسىز كوميسسيا شىعارادى.
سول سەكىلدى ءبىلىم جانە عىلىم مينيسترلىگى ستراتەگيا دەپارتامەنتى ديرەكتورىنىڭ ورىنباسارى اقەركە ابىلايحان 2010 جىلى باسىم ماماندىقتار تىزبەسىنە اكادەميالىق وقۋ ءۇشىن – 87, عىلىمي تاعىلىمدار ءۇشىن 100 ماماندىق ەنگىزىلگەنىن, جالپى بيىل تىلەك بىلدىرۋشىلەر 23 ەلدىڭ 200 جوعارى وقۋ ورىندارىندا بىلىمدەرىن جەتىلدىرەتىنىن, 24 ەلدىڭ 105 وقۋ ورنىندا عىلىمي تاعىلىمداردان وتەتىنىن العان تارتتى. بيىل “بولاشاق” باعدارلاماسىمەن شەتەلدەردە وقيتىندارعا 1007 ورىن ءبولىنىپتى. وعان قاجەت قارجى مەملەكەت بيۋدجەتىنەن تولىعىمەن قاراستىرىلعان. كەشەدەن باستاپ 15 شىلدەگە دەيىن شەتەلدەردىڭ جوعارى وقۋ ورىندارىنا ءوز بەتتەرىمەن بارىپ تۇسكەندەردەن قۇجات قابىلداۋ باستالىپتى. قۇجات قابىلداۋ نەگىزىنەن استانا مەن الماتى قالالارىندا جۇرگىزىلەتىنىن تالاپكەرلەردىڭ نازارىنا سالا كەتسەك دەيمىز. قازىر وتانىمىزدا بىرىڭعاي ۇلتتىق تەستىلەۋ ءوتىپ جاتقانى بەلگىلى. ونىڭ ناتيجەسى بۇعان اسەر ەتپەيتىنىن ايتا وتىرىپ, تەك اتتەستاتتاعى بالل 4,5-تەن كەم بولماۋ كەرەكتىگىن, ءۇمىتكەرلەر مەكتەپ ءبىتىرۋشىلەرمەن قاتار, ماماندىقتار تىزبەسىنە قاراي جوعارى وقۋ ورنىن بىتىرگەندەر دە قاتىسا الاتىنىن نازارعا سالا كەتسەك دەيمىز.
ءباسپاسوز ءماسليحاتىندا 2008 جىلدان باستاپ اۋىل جاستارىنا, مەملەكەتتىك جانە عىلىمي قىزمەتكەرلەرگە كۆوتا قاراستىرىلعانىنا ناقتى دالەلدەر كەلتىرىلدى. مىسالى, وتكەن جىلى 47 اۋىل بالاسى وزدەرى تاڭداعان ەلدەردىڭ جوعارى وقۋ ورىندارىنا جولداما السا, بيىل بۇل كورسەتكىش 65 ورىنعا ارتىپتى. ارينە, اۋىل بالالارىنىڭ شەت تىلدەن قينالاتىنى بەلگىلى. سونى ەسكەرگەندىكتەن, ولاردىڭ بارعان ەلىندە ءبىر جىل بويى ءتىل ۇيرەنۋگە مۇمكىندىك جاسالعان. قازىر الەمنىڭ وركەنيەتتى ەلدەرىندە وتانىمىزدان 2257 تالاپكەر ءبىلىم الىپ جاتىر ەكەن. جالپى, ۇمىتكەرلەردى ىرىكتەۋ ەرەجەسى, باسىم ماماندىقتار ءتىزبەسى, قاجەتتى قۇجاتتار, تالاپكەرلەردىڭ سۇراقتارىنا بەرىلگەن جاۋاپتار, قوسىمشا اقپاراتتار اكتسيونەرلىك قوعامنىڭ (www.ءeducىp.kz) رەسمي سايتىندا بەرىلگەن.
سۇلەيمەن مامەت.