باتىس قازاقستان: ءۇش اۋداندا سايلاۋ ءوتتى

- بۇل مەملەكەت باسشىسى قاسىم-جومارت توقاەۆتىڭ باستاماسىمەن قولعا الىنعان اكىمدەردىڭ سايلاۋ ۇدەرىسى. اۋا رايى كەرەمەت بولدى. سايلاۋ وتكەن ءۇش اۋداندا بارلىعى 63 سايلاۋ ۋچاستوگى بار. سول ۋچاستوكتىڭ بارىندە حالىق تاڭداۋى ۋاقتىلى باستالىپ, ويداعىداي ءوتتى. ارينە, بارلىق سايلاۋ ۋچاسكەلەرى الدىن الا قاجەتتى دايىندىقتان ءوتتى. سوندىقتان سايلاۋشىلاردىڭ داۋىس بەرۋىنە بارلىق مۇمكىندىك جاسالدى دەپ تولىق سەنىممەن ايتا الامىز. وسى جولى دوداعا ءار اۋداننان ءۇش ادام قاتىستى. سونىڭ ىشىندە اmanat پارتياسى مەن قازاقستان حالىق پارتياسىنان ۇسىنىلعان كانديداتتار بار. قالعانى ءوزىن ءوزى ۇسىنعان ۇمىتكەرلەر. ولار وسى كۇنگە دەيىن سايلاۋشىلارمەن كەزدەسىپ, ۇگىت-ناسيحاتىن جۇرگىزىپ, باعدارلامالارىن تانىستىرىپ, كوپ جۇمىس اتقاردى, -  دەدى باتىس قازاقستان وبلىستىق اۋماقتىق سايلاۋ كوميسسياسىنىڭ توراعاسى عايسا قاپاقوۆ.

ايتا كەتەيىك, ساياسي ناۋقانعا قۇرامىندا 378 مۇشەسى بار 1 وبلىستىق اۋماقتىق, 3 اۋداندىق اۋماقتىق, 63 ۋچاسكەلىك سايلاۋ كوميسسياسى قىزمەت ەتتى.

بوكەي ورداسى اۋدانىندا 9 141 سايلاۋشى تىركەلگەن. سايلاۋ ۋچاسكەلەرىنىڭ بارلىعى كەرەكتى قۇرال-جابدىق, ينتەرنەت جەلىسى قامتىلعان. مۇمكىندىگى شەكتەۋلى 366 سايلاۋشىعا ارنايى جاساقتالعان كابينالاردا داۋىس بەرۋ ءۇشىن جاعداي جاسالدى. اۋداندىق اۋماقتىق سايلاۋ كوميسسياسى بەرگەن مالىمەتكە قاراعاندا, بوكەي ورداسىنداعى سايلاۋشىلاردىڭ ەڭ ۇلكەنى 97 جاستا بولسا, 107 سايلاۋشى العاش رەت داۋىس بەرۋ جاسىنا جەتكەن.

تاسقالا اۋدانىندا دا سايلاۋ قالىپتى جاعدايدا ءوتتى. اۋدانداعى 22 سايلاۋ ۋچاسكەسىنىڭ بەسەۋى اۋدان ورتالىعى تاسقالا كەنتىندە ورنالاسقان. مۇندا 11 مىڭعا جۋىق سايلاۋشى ءوز تاڭداۋىن جاساۋى ءتيىس بولعان. اۋداندىق اۋماقتىق سايلاۋ كوميسسياسى تاراتقان مالىمەتكە قاراعاندا, مۇنداعى سايلاۋ بارىسىن اmanat  پارتياسىنان – 22, رەسپۋبليكالىق «داۋىس» قوعامدىق بىرلەستىگىنەن – 22, «نامىس» قوعامدىق ۇيىمىنان – 20, «اقجول» پارتياسىنان 8 وكىل باقىلادى.

قاراتوبە اۋداندىق اۋماقتىق سايلاۋ كوميسسياسىنىڭ توراعاسى باقىتجان جۇسىپقاليەۆتىڭ مالىمەتىنشە, اۋداندا 5565 سايلاۋشى داۋىس بەرگەن. بۇل وڭىردە تىركەلگەن بارلىق سايلاۋشىنىڭ 63,3 پايىزى. 

قاراتوبە اۋدانىنداعى بارلىق ۋچاسكەدە سايلاۋ بارىسىن «جاريا» قوعامدىق بىرلەستىگى وكىلدەرى تولىق باقىلاعان بولاتىن. قاراتوبە اۋىلىنداعى №277 سايلاۋ ۋچاسكەسىندە بولعان كلارا بايبۋلوۆا ءوزى باقىلاعان ۋچاسكەدە زاڭ بۇزۋشىلىق بولماعانىن ايتادى.

بۇل سايلاۋعا قوعامدىق بىرلەستىكتەر, مەملەكەتتىك ەمەس ۇيىمدار تاراپىنان دا قىزىعۋشىلىق زور بولدى. عايسا قاپاقوۆتىڭ ايتۋىنشا, سايلاۋ بارىسىن قاداعالاۋ ءۇشىن ءۇش اۋدانداعى سايلاۋ ۋچاسكەلەرىندە 310 بايقاۋشى تىركەلگەن كورىنەدى.

- ءتۇرلى ساياسي پارتيالاردان, قوعامدىق ۇيىمداردىڭ اتىنان كەلىپ, تاڭنان كەشكە دەيىن بۇگىنگى سايلاۋدى باقىلاعان ازاماتتار از بولعان جوق. بۇل بايقاۋشىلار – ءبىزدىڭ كومەكشىلەرىمىز. سايلاۋدىڭ اشىق, زاڭعا سايكەس وتۋىنە ۇلەس قوسقانى ءۇشىن ءبىز ولاردىڭ بارىنە ريزاشىلىق بىلدىرەمىز, - دەدى عايسا حاميدوللا ۇلى.

كوميسسيا توراعاسىنىڭ ايتۋىنشا, اۋدان اكىمدەرىن تىكەلەي تاڭداۋ وتكەن بۇل ساياسي ءۇردىس ەلىمىزدى ۇلكەن دەموكراتيالىق وزگەرىستەرگە باستايتىن العاشقى قادام. ء«بىزدىڭ 12 اۋدانىمىز بار. بىرتە-بىرتە ولاردىڭ بارىندە دە حالىقتىڭ ءوزى تاڭداعان باسشىلار كەلەدى. بولاشاقتا بولاتىن ۇلكەن سايلاۋلارعا تاماشا تاجىريبە بولدى. اسىرەسە بۇل ساياسي ناۋقانعا اۋىل ازاماتتارىنىڭ ەرەكشە كوزقاراسى, بەلسەندىلىگى ءبىزدى قۋانتىپ وتىر. بۇگىن تۇڭعىش حالىقتىق سايلاۋعا ءتۇسىپ, مارەگە الدىمەن جەتكەن جەڭىمپازدارىمىز ومىرگە باسقاشا ستيل, وزگەرىس الىپ كەلسە ەكەن, حالىقتىڭ تىكەلەي تاڭداۋىمەن كەلگەن قىزمەتىندە جەمىستى ەڭبەك ەتىپ, اۋداننىڭ كورسەتكىشىن جاقسى جاققا وزگەرتسە ەكەن دەپ تىلەيمىز. ءدال وسىلاي بولسا, بۇگىنگى سايلاۋدىڭ باستى جەڭىسى سول بولماق», دەيدى عايسا قاپاقوۆ.

باتىس قازاقستان وبلىسى