اقتوبە قالاسىنىڭ №2 سوتىندا قارجى پيراميداسىن قۇرۋ جانە وعان باسشىلىق ەتۋ, قىلمىستىق جولمەن الىنعان قارجىنى زاڭداستىرۋ ايىبىمەن اقتوبەلىك كەلىنشەككە قاتىستى قىلمىستىق ءىس قارالدى.
ايىپكەر ورىندىعىندا وتىرعان ورتا جاستاعى كەلىنشەك اقتوبە جانە حرومتاۋ قالاسىندا حالىقارالىق ۇيىمنىڭ تاۋەلسىز وكىلى رەتىندە تىركەلىپ, 2019 جىلدىڭ قاڭتارىنان 2022 جىلدىڭ ماۋسىمىنا دەيىن «Qnet» قارجى پيراميداسىن ۇيىمداستىرعان. باسىندا ءوزىن جەلىلىك ماركەتينگ وكىلى رەتىندە تانىستىرىپ, جۇرتتىڭ سەنىمىنە كىرگەننەن كەيىن ولاردى از ۋاقىتتا وراسان زور كىرىس اكەلەتىن «Qnet» كومپانياسىنا قارجى سالۋعا ۇگىتتەيدى. ەكى جارىم جىل ىشىندە 25 ادام وسى ۇيىمنىڭ كەڭسەسىنە 37 ميلليون 463 مىڭ تەڭگە اكەلىپ بەرگەن. ۋادە ەتىلگەن مەرزىمدە ينۆەستيتسيالىق تابىس قولعا تيمەگەن سالىمشىلار قۇقىق قورعاۋ ورگاندارىنا شاعىمدانادى. سوتتا بەلگىلى بولعانداي, پيراميداعا الدانعان كوپشىلىك ەكىنشى دەڭگەيلى بانكتەردەن نەسيە الىپ, كومپانيانىڭ كەڭسەسىنە قولما-قول اقشا تۇرىندە اكەلىپ تاپسىرعان.
قىلمىستىق ءىس بويىنشا ايىپتالعان كەلىنشەك وزىنە تاعىلعان كىنانى تولىق مويىنداپ, ىسىنە وكىنەتىنىن ايتتى. اسىراۋىندا جاس ءسابيى بار ەكەندىگىن, زارداپ شەككەندەردىڭ قارجىسىن وزدەرىنە قايتارىپ بەرگەنىن العا تارتا وتىرىپ سوتتان جازاسىن جەڭىلدەتۋدى سۇرادى. سوت ونىڭ قىلمىستىق جولمەن تابىلعان مۇلكىن تاركىلەۋگە جازا كەستى. سوتتالۋشى جازا مەرزىمىن وتەپ بولعاننان كەيىن دە كوممەرتسيالىق ۇيىمداردا جەتى جىل مەرزىمگە دەيىن لاۋازىمدى قىزمەت اتقارا المايدى. الايدا سۋديا سوتتالۋشىنىڭ اسىراۋىندا 4 جاستاعى بالاسىنىڭ بارىن ەسكەرە وتىرىپ, قىلمىستىق كودەكستىڭ 74-بابى نەگىزىندە جازا وتەۋ مەرزىمىن 5 جىلعا كەيىن قالدىردى.
سونداي-اق اقتوبە قالالىق №2 سوتىندا «گارانت 24 لومبارد» قارجى پيراميداسى بويىنشا دا قىلمىستىق ءىس قارالىپ جاتىر. بۇل ءىس بويىنشا بىرنەشە ايىپتالۋشى بار, ال زارداپ شەككەندەر سانى وتە كوپ.
اقتوبە وبلىسى