تۇركىستان وبلىسىنا قاراستى سوزاق اۋدانىندا ەكىنشى دۇنيەجۇزىلىك سوعىسىنىڭ ارداگەرى مىرزاحمەت جىلىسباەۆ اۋدان اكىمىن سايلاۋ شاراسىنا قاتىسىپ, العاشقىلاردىڭ ءبىرى بولىپ ءوز تاڭداۋىن جاسادى, دەپ جازادى Egemen.kz اتالعان وبلىستىڭ وڭىرلىك كوممۋنيكاتسيالار قىزمەتىنە سىلتەمە جاساپ.
سوزاق اۋدانى دامۋىنا عۇمىرىن ارناعان ارداگەر سىزعان اۋىل وكرۋگىندەگى №701 سايلاۋ ۋچاسكەسىندە ءوز تاڭداۋىن بەلگىلەپ, «سايلاۋ ءادىل ءوتسىن» دەپ باتا بەردى.
«ەلىمىزدىڭ, اۋدانىمىزدىڭ بولاشاعى ءۇشىن ءاربىر ازاماتتىڭ داۋىسى ماڭىزدى. سوندىقتان 90-نان اسقانىما قاراماستان مەن دە تاڭسارىدەن كەلىپ, تاڭداۋىمدى جاسادىم. ساياسي ناۋقاننان تىس قالمادىم. قاشاندا ەلىمىز امان, بەيبىتشىلىك زامان بولسىن», دەگەن مايدانگەر سايلاۋ كوميسسياسىنىڭ جۇمىسىنا تابىس تىلەدى.