ساۋد ارابياسىنىڭ باس قالاسى ەر-ريادتا V بۇكىلالەمدىك جاۋىنگەرلىك ونەر ويىندارى اياقتالدى. قازاقستان دەلەگاتسياسى 12 التىن, 13 كۇمىس, 23 قولا مەدالدارمەن جالپى ەسەپتە 3-ورىن الدى, دەپ حابارلايدى Egemen.kz ۆەدومستۆوعا قاراستى سپورتتى دامىتۋ ديرەكتسياسىنا سىلتەمە جاساپ.
ون ءبىر كۇن ارالىعىندا 16 سپورت تۇرىنەن 1500-دەن استام سپورتشى 259-ى التىن, 259-ى كۇمىس, 436-سى قولا, جالپى سانى 954 مەدالدى ساراپقا سالدى. ايتا كەتسەك, ەر-رياد-2023-كە سپورتشىلارىن جىبەرگەن 120-دان استام ەلدىڭ 87-سىنە جۇلدە بۇيىردى. قازاقستان دەلەگاتسياسى ءۇشىن ەر-ريادتاعى جارىستىڭ ءار كۇنى دەرلىك تاريحي ناتيجەمەن ەستە قالدى. مىسالى, ويىندار باعدارلاماسىنا العاش رەت قوسىلعان قازاق كۇرەسى مەن ارمرەستلينگتەن ۇلتتىق قۇراما سپورتشىلارى كوماندالىق ەسەپتە 1-ورىن الدى. سامبو مەن گرەپپلينگتەن قورجىنعا World Combat Games-ءتىڭ العاشقى التىنى تۇسسە, كاراتەشىلەر ءبىرىنشى رەت جەڭىس تۇعىرلارىنان كورىندى. جالپى ەل نامىسىن 10 سپورت ءتۇرى بويىنشا 53 سپورتشى قورعادى. ايتا كەتەلىك, جاۋىنگەرلىك ونەر ويىندارىنىڭ جالپى رەيتينگىسىندە قازاقستان 37-ءىنشى ورىننان جوعارىلاپ, ۇزدىك وندىققا ەندى.