وڭتۇستىك كورەيانىڭ چانگۆون قالاسىندا نىسانا كوزدەۋدەن ءوتىپ جاتقان ازيا چەمپيوناتىندا وتانداسىمىز ارينا التۋحوۆا پاريج جازعى وليمپياداسىنىڭ جولداماسىن يەلەندى, دەپ حابارلايدى Egemen.kz تۋريزم جانە سپورت مينيسترلىگىنە قاراستى سپورت جانە دەنەشىنىقتىرۋ ىستەرى كوميتەتىنىڭ ءباسپاسوز قىزمەتىنە سىلتەمە جاساپ.
50 مەتر قاشىقتىقتان پنەۆماتيكالىق تاپانشامەن ءۇش پوزيتسيادان وق اتۋ باسەكەسىندە وتانداسىمىز فينالدا 5-ورىن يەلەنىپ, پاريج وليمپياداسىنىڭ جولداماسىنا يە بولدى.
بۇل قازاقستان قۇراماسى ءۇشىن وسى سپورت تۇرىندەگى ەكىنشى ليتسەنزيا.
باكۋدە وتكەن الەم چەمپيوناتىندا العاشقى جولدامانى يسلام ساتپاەۆ العان ەدى.
وڭتۇستىك كورەيا ەلى ۇيىمداستىرعان ازيا چەمپيوناتى 2 قاراشا كۇنى مارەسىنە جەتەدى. قۇرلىق دوداسىندا پاريج جازعى وليمپياداسىنىڭ 24 جولداماسى تاراتىلادى.