شامادان تىس نەسە الۋ پروبلەماسىن تۇبەگەيلى شەشۋ ءۇشىن شەكتەۋلەر ەنگىزۋ قاجەت. بۇل پىكىردى ۇكىمەت وتىرىسىندا ءاليحان سمايىلوۆ ايتتى, دەپ حابارلايدى Egemen.kz.
پرەمەردىڭ پايىمىنشا, ميكروقارجى ۇيىمدارىنىڭ, اسىرەسە «جالاقىعا دەيىن» قارىز بەرەتىن مەكەمەلەردىڭ شەكتى نەسيەلەۋ مولشەرلەمەلەرىن, سومالارى مەن مەرزىمدەرىن قايتا قاراۋ قاجەت.
«ۇسىنىلىپ وتىرعان بارلىق زاڭنامالىق تۇزەتۋلەر پىسىقتالىپ, جىل سوڭىنا دەيىن پارلامەنتكە ەنگىزىلۋى ءتيىس. بۇل شارالار ازاماتتاردىڭ شامادان تىس قارىز الۋىن شەكتەۋگە جانە تۇتىنۋ كرەديتتەرىن بەرۋدە تاۋەكەلدەردى ازايتۋعا ىقپال ەتەدى», دەپ ءتۇسىندىردى ۇكىمەت باسشىسى.
ءاليحان سمايىلوۆ تۇرعىنداردىڭ قارجىلىق ساۋاتتىلىعىن ارتتىرۋ ءۇشىن وقۋ-اعارتۋ مينيسترلىگى وقۋ باعدارلامالارى شەڭبەرىندە قارجىلىق ساۋاتتىلىق كۋرستارىن ەنگىزۋ ماسەلەسىن پىسىقتاۋى كەرەك دەپ ەسەپتەيدى.
«عىلىم مينيسترلىگى دە بۇل ماسەلەلەردى جوعارى وقۋ ورىندارىمەن بىرگە قاراۋى ءتيىس. كامەلەتكە تولعان جاستار وزدەرىنىڭ قارجىلىق مۇمكىندىكتەرىن قالاي دۇرىس ەسەپتەۋ كەرەكتىگىن, كرەديتتى قالاي جانە قانداي كرەديت الۋ كەرەكتىگىن ناقتى ءتۇسىنۋى كەرەك. مۇنداي تاجىريبە كوپتەگەن ەلدەردە بار», دەيدى ول.