ونكولوگياداعى «تايمان تىگىسى»

وبلىستا جىل سايىن 120-130 ادام اسقازان وبىرى, 80-110 ادام وڭەش قاتەرلى ىسىگى دەگەن دياگنوزبەن جاڭادان تىركەلەدى. بۇل – ەلىمىزدەگى ورتاشا كورسەتكىشتەن اجەپتاۋىر جوعارى. ونىڭ ۇستىنە كەيىنگى جىلدارى اتى جامان دەرتتىڭ ءوسۋ ديناميكاسى بايقالادى.

– ءبىزدىڭ ءوڭىردىڭ 2021-2022 جىلعى ستاتيستيكالىق مالىمەتتەرىن تالداپ قاراپ, 100 مىڭ حالىققا شاققاندا اسقا­­زان وبىرى 18,6%-دان 19,3%-عا, ال وڭەش­تىڭ قاتەرلى ىسىگى 11,3%-دان 14,2-%-عا وسكەنىن كوردىك. اسىرەسە قىلتاماق 29,2%-عا ارتقان. 2023 جىلدىڭ 9 ايىندا 100 مىڭ حالىققا شاققاندا اسقازان وبىرىمەن سىرقاتتانۋشىلىق 15,2%-دى, وڭەش وبىرى 8,8%-دى قۇرادى. بۇل – رەس­پۋبليكالىق كورسەتكىشتەردەن جوعا­رى. قازاقستاندا 2021-2022 جىلدار­داعى اسقازان وبىرى 100 مىڭ حالىققا شاققاندا 13,5%-14,9%, ال وڭەش قاتەرلى ىسىگى 5,7%-5,9% بولعان, – دەيدى وبلىستىق ونكولوگيا ديسپانسەرىنىڭ ديرەكتورى زەيىل ماعزوموۆ.

باتىس قازاقستاندا ونكولوگيالىق اۋرۋلاردىڭ ىشىندە ءسۇت بەزى وبىرى – ءبىرىنشى, وكپە وبىرى – ەكىنشى, ال اسقازان وبىرى ءۇشىنشى ورىن الىپ تۇر. وڭەش ىسىگى – بەسىنشى ورىندا. وڭەش پەن اسقازان قاتەرلى ىسىگىنىڭ 58,3-61%-ى حيرۋرگيالىق وپەراتسياسى قاجەتسىنەدى. ءسوز باسىندا ايتىلعان جاڭا ءادىس ءدال وسى سالادا قولدانىلىپ جاتىر.

قازىردىڭ وزىندە ەرەكشە تيىمدىلىگىن كورسەتكەن جاڭا ءادىستىڭ اۆتورى – وبلىس­تىق ديسپانسەردىڭ ونكوحيرۋرگيا ءبولىمى مەڭگەرۋشىسى, مەديتسينا عىلىمدارىنىڭ كانديداتى تايمان امانوۆ. 30 جىلدىق ەڭبەك ءوتىلى بار تاجىريبەلى ماماننىڭ ءادىسى عىلىم تىلىندە «ەزوفاگوگاسترو جانە گاستروەنتەرواناستوموزدى تىگۋ» دەپ اتالادى ەكەن.

وڭەش پەن اسقازان اۋرۋلارى ءۇشىن راديكالدى حيرۋرگيالىق وپەاراتسيانىڭ كەڭەيتىلگەن ارالاس گاسترەكتوميا, 2 اي­ماق­­تى ليمفا ءتۇيىنىن ديسسەكتسيامەن وڭەش­تىڭ سۋبتوتالدى رەزەكتسياسى (ليۋيس ءتيپتى), وڭەشتىڭ تومەنگى ۇشتەن ءبىر بولىگى­نىڭ رەزەكتسياسى, پروكسيمالىق سۋبتوتالدى اسقازان رەزەكتسياسى, ەزوفاگوگاسترو­اناستوموز (گەرلوك ءتۇرى), سۋبتوتالدى پروكسيمالدى اسقازان رەزەكتسياسى دەپ اتالاتىن بىرنەشە ءتۇرى بولادى ەكەن. تاي­مان تولەۋعالي ۇلى باستاپ قولدانعان جەتىل­دىرىلگەن ادىستەمە وپەراتسيادان كەيىنگى اسقىنۋ سانىن نولگە جەتكىزگەن. ياعني وپەراتسيادان وتكەن ناۋقاستار 100% ساۋىعۋعا بەت العان.

– وبلىستا كلينيكالىق تاجىريبەگە ەنگەن جەتىلدىرىلگەن ادىستەمەنىڭ ارتىق­شىلىقتارى بار. بىرىنشىدەن, اناستوموزعا سالىناتىن تىگىس سانىنىڭ ازايۋىنا باي­لانىستى ونىڭ سەنىمدىلىگى مەن تىعىز­دىلىعى ارتقان. ەكىنشىدەن, وپەراتسيا كەزەڭدەرىنىڭ سانى ازايعاندىقتان حيرۋرگيالىق تەحنيكاعا تۇسەتىن سالماق ازايدى. ۇشىنشىدەن, اناستوموز قانمەن قامتىلعاندىقتان وڭەشتىڭ وپەراتسيادان كەيىنگى جازىلۋى جاقسارعان. سونداي-اق وپەراتسيا جاساۋ ۋاقىتى 3,3 ساعاتتان 2,15 ساعاتقا دەيىن قىسقارعان. وسى ادىستە­مەنىڭ كومەگىمەن ناۋقاستاردىڭ ءومىر ساپاسى ايتارلىقتاي جاسقاردى, – دەيدى زەيىل جوكەن ۇلى.

قاتەرلى ىسىكتى ەمدەۋدىڭ تاعى ءبىر ءتيىمدى ءادىسى – ساۋلەلى تەراپيا. بيىلعى مامىر ايىنان باستاپ باتىسقازاقستاندىقتاردىڭ دا بۇل ەمگە قولى جەتتى. وڭىردە يادرولىق مەديتسينا ورتالىعى اشىلعانىن بۇدان بۇرىن سۇيىنشىلەپ جازعان ەدىك. سودان بەرى وتكەن از ۋاقىت ىشىندە ورالدىق مامان­دار راديولوگيانىڭ سوڭعى مۇمكىن­دىكتەرىن پايدالانىپ, قاتەرلى ىسىكتى ساۋ­لە­مەن ەمدەۋدىڭ سۋ جاڭا ەكى ءتاسىلىن ەنگىزىپ ۇلگەرگەن. ونىڭ ءبىرىنشىسى – جاتىر موينى قاتەرلى ىسىگىن ساۋلەمەن ەمدەۋدە 3D جوسپارلاۋ كومەگىن پايدالانۋ. بۇل دەگەنىڭىز – براحيتەراپيانىڭ ءار ساتىسىندا كومپيۋتەرلىك توموگرافيا كومەگىمەن 3D كورىنىس ارقىلى ەم جۇرگىزۋ دەگەن ءسوز. قازاقستان بويىنشا مۇنداي ەم تەك 2D كورىنىس ارقىلى جۇرگىزىلەدى. ورالدىقتار جاڭا ءادىس ءۇشىن ارنايى باعدارلاما جاساپ, كومپيۋتەرلىك توموگرافيا, ۋلترادىبىستىق جانە ماگنيتتى-رەزونانستى توموگرافيا زەرتتەۋلەرىنىڭ ءبىر-بىرىمەن ۇيلەسۋىن قامتاماسىز ەتتى, مامانداردى وقىتىپ ۇيرەتتى.

قاتەرلى ىسىكتى 3D جوسپارلاۋ تاسىلىمەن ەمدەگەن كەزدە ساۋلە كوزدەگەن نۇكتەگە وتە ءدال تۇسەدى, سول ارقىلى ەمنىڭ پايدالى اسەرى كوبەيىپ, ناتيجە ارتادى جانە جال­پى ەمدەۋ مەرزىمى قىسقارادى. ەم سوڭى­نان بولاتىن اسقىنۋ ازايىپ, تىك ىشەك, قۋىق سەكىلدى ماڭىزدى اعزالار زاقىم­دانبايدى.

– ارينە, 3D براحيتەراپيا ءادىسى ءبىز­دىڭ جۇمىسىمىزدى كۇردەلىلەندىرە ءتۇستى. بىراق جاتىر موينى قاتەرلى ىسىگى دياگنو­زى­مەن كەلگەن ناۋقاستار ءۇشىن ءبىز ەش قيىن­­دىقتان قاشپايمىز. قازىر بۇل ەمدى ونكو­گي­نەكولوگ-راديولوگ دارىگەر ب.قوجاس پەن مەديتسينا فيزيگى د.ۋال­شەروۆ جۇرگى­زىپ جاتىر, – دەيدى يادرولىق مەديتسينا ورتا­لىعىنىڭ جەتەك­شىسى الەكساندر كۋزنەتسوۆ.

ەكىنشى ءادىس – ستەرەوتاكسيكالىق راديو­تەراپيا دەپ اتالادى. مۇنىڭ ءمانىسى – ميدىڭ قاتەرلى ىسىگى مەن ينتراكرا­نيالدى مەتاستازدى كومپيۋتەرلىك توموگ­رافيالىق سۋرەتى ارقىلى ساۋلەمەن ەمدەۋ. بۇل باعىت بيىلعى مامىر ايىن­دا عانا باستالدى. ايىنا 60 ادام ساۋلەمەن ەمدەلسە, ميىن­دا قاتەرلى ىسىك تابىلعان 6 ادامعا راديوحيرۋرگيالىق وپەراتسيا جاسالعان. بۇل پاتسيەنتتەر قازىر حيميوتەراپيا, يممۋنوتەراپيا جانە تار­گەت­تىك تەراپيا كۋرس­تارىنان ءوتىپ جاتىر. ستەرەوتاكسيكالىق ساۋلە ەمىنەن كەيىن ەشبىرىندە مي سيمپتوماتيكاسى بايقالماعان.

– سونداي-اق تاعى 4 پاتسيەنت جامباس سۇيەگىنىڭ جۇمساق ەتىندەگى مەتاستازعا ستە­رەو­تاك­سيكالىق راديوتەراپيا الىپ, ول جەر­دە دە وڭ ناتيجە بايقالدى. ناۋ­قاس­تار اۋرۋحاناعا اربامەن كەلگەن بولسا, ۇيىنە بال­­داققا سۇيەنىپ ءوز اياعىمەن ءجۇرىپ قايتتى, – دەيدى باتىس قازاقستان وبلىستىق ونكولوگيا ديرەكتورىنىڭ مەديتسينالىق ىستەر جونىندەگى ورىنباسارى نۇرلان تولەمىسوۆ.

باتىس قازاقستان وبلىسى