قالا اكىمىنىڭ ءبىرىنشى ورىنباسارى نۇرلان نۇركەنوۆ استانا قالاسى كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا قالاداعى ەلەكتر قۋاتىنىڭ ءوشىپ قالۋ سەبەبىن ايتتى, دەپ حابارلايدى Egemen.kz.
ونىڭ ايتۋىنشا, 29 قازان كۇنى ساعات 21:57-دە 10 قالالىق قوسالقى ستانتسيادا ەلەكتر قۋاتى ىستەن شىققان.
«قالانىڭ وڭ جاعالاۋىنداعى تۇرعىن ۇيلەر جارىقسىز قالدى. ساعات 23.00-دە اۋەجاي قوسالقى ستانتسيالارى ىسكە قوسىلدى. ساعات 23.10-دا بايتەرەك قوسالقى ستانتسياسى دا جۇمىس ىستەدى. تۇنگى ساعات 2.00-گە دەيىن بارلىق قوسالقى ستانتسيالار جۇمىس ىستەپ تۇردى», دەدى استانا قالاسى اكىمىنىڭ ءبىرىنشى ورىنباسارى نۇرلان نۇركەنوۆ.
ونىڭ ايتۋىنشا, جەو-2-دە تەحنولوگيالىق بۇزۋشىلىق بولماعان, ول شتاتتىق رەجيمدە جۇمىسىن جالعاستىرعان.
«توتەنشە جاعداي جەتەكشى جەلىلەردە بولدى. اپات كابەل ءۇزىلىپ, شكافتاردىڭ ءبىرى ورتەنۋى سەبەبىنەن بولعان. بۇل شتاتتان تىس جاعداي بولدى, تۇنگى ساعات 2-دە بارلىق ابونەنت ەلەكتر قۋاتىمەن قامتاماسىز ەتىلدى. 2 ساعات بويى قالانىڭ وڭ جاعالاۋىنداعى كەيبىر الەۋمەتتىك نىساندار جارىقسىز قالدى. بارلىق مەديتسينالىق نىسان بويىنشا ديزەل-گەنەراتورلار ىسكە قوسىلىپ, ۋاقىتشا جارىق بەرىلدى. توتەنشە جاعداي كەزىندە ديزەل رەانيماتسيانى جانە وپەراتسيالىق بلوكتاردى قامتاماسىز ەتتى. مەديتسينالىق مەكەمەلەردەگى قىزمەتكە قاۋىپ تونگەن جوق», دەيدى ول.