استانادا تاۋەلسىزدىك كوشەسى بويىندا جاڭا كوپىر بوي كوتەردى. ەندى ۋچاسكەلەردەگى كەپتەلىس ايتارلىقتاي ازايا تۇسەدى, دەپ حابارلايدى Egemen.kz استانا اكىمدىگىنىڭ رەسمي سايتىنا سىلتەمە جاساپ.
مىسالى, ماڭگىلىك ەل داڭعىلىندا كولىك كەپتەلىسى 20%, سارايشىق كوشەسى مەن ۇلى دالا كوپىرىندە 15% جەڭىلدەگەن. سونداي-اق كەرەي-جانىبەك حاندار, ءال-فارابي كوشەلەرى جانە ۇلى دالا داڭعىلى بويىنشا ترافيك جاندانىپ تۇر.
بۇدان بولەك, جاڭا كوپىر الماتى مەن ەسىل اۋداندارىنىڭ اراسىن جالعايدى. سونداي-اق جولدارداعى قوزعالىستى ەداۋىر جەڭىلدەتۋگە مۇمكىندىك بەرەدى. اتاپ ايتقاندا, سول جاعالاۋدى تاۋەلسىزدىك داڭعىلىمەن, جاڭا تەمىرجول ۆوكزالىمەن, ر.قوشقارباەۆ داڭعىلىمەن, ج.ناجىمەدەنوۆ كوشەسىمەن, ازىرەت سۇلتان مەشىتىمەن, ا.بايتۇرسىنوۆ, قورداي, ايناكول كوشەلەرىمەن, ب.مومىش ۇلى داڭعىلىمەن جانە ت.ب. قوسىمشا بايلانىستى قامتاماسىز ەتەدى.
ەستەرىڭىزگە سالايىق, كوپىر سەگىز جولاقتى, ەكى باعىتتا ءتورت جولاقتان بار. كوپىر بۇيىرلەرىندە جاياۋ جۇرگىنشىلەر اۋماقتارى مەن ۆەلوجولدار جاسالعان. كوگالداندىرۋ جۇمىسى كوكتەمدە اياقتالادى.