قازان ايىنىڭ 28-ءى كۇنى ساعات 13.00-دە استاناداعى Mega Silk Way ساۋدا-ساۋىق ورتالىعىندا Explore Jana Qazaqstan فوتوكورمەسى اشىلدى, دەپ حابارلايدى Egemen.kz.
اتالعان كورمە Explore Jana Qazaqstan كومانداسىنىڭ National Geographic Qazaqstan رەداكتسياسىمەن بىرلەسىپ, بيىل مامىر مەن قىركۇيەك ايلارى ارالىعىندا ۇيىمداستىرعان 5 ەكسپەديتسياسىنىڭ ناتيجەسىندە ازىرلەنگەن. ەكسپەديتسياعا Xiaomi قولداۋ كورسەتكەن.
ەكسپەديتسيانىڭ ماقساتى − قازاقستاننىڭ تۋريستىك وڭىرلەرىنىڭ الەۋەتىن ەڭ ۇزدىك وتاندىق فوتوگرافتار مەن ساياحاتشى بلوگەرلەردىڭ فوتواپپاراتتارى مەن ۆيدەوكامەرالارىنىڭ وبەكتيۆى ارقىلى پاش ەتىپ, ىشكى ءتۋريزمدى دامىتۋعا قوسىمشا سەرپىن بەرۋ. وسى ورايدا, كوماندا مۇشەلەرى ەلىمىزدىڭ تۇركىستان, الماتى, سونداي-اق شىعىس پەن باتىس وڭىرلەرىندە بولىپ, بايتاق وتانىمىزدىڭ ايشىعى الۋان تۇمسا تابيعاتىمەن تانىستى.
National Geographic Qazaqstan رەداكتسياسى اتالعان ساپارلار بارىسىندا تۇسىرىلگەن 3500-دەن استام فوتوسۋرەت اراسىنان Xiaomi 13 سەرياسى تەلەفونىمەن ايشىقتالعان ەڭ ۇزدىك 25 سۋرەتتى ىرىكتەپ الىپ, كورمەدە ۇسىنىپ وتىر.
ۇلانعايىر دالامىزدىڭ تاماشا تابيعاتىنىڭ عاجايىپتارى كورسەتىلەتىن كورمە 18 قاراشاعا دەيىن جالعاسادى.