تاياۋ كۇندەرى الماتىداعى №7 قالالىق كلينيكالىق اۋرۋحاناعا وسىدان 10 جىلداي ۋاقىت بۇرىن جامباس بۋىنى الماستىرىلعان پاتسيەنت وتە اۋىر جاعدايدا جەتكىزىلگەن بولاتىن. جاراقاتتىڭ سالدارىنان تسەمەنتسىز ادىسپەن بەكىتىلگەن پروتەز ناۋقاستىڭ جامباس قۋىسىنا كىرىپ كەتكەن, دەپ حابارلايدى Egemen.kz اۋرۋحانانىڭ ءباسپاسوز قىزمەتىنە سىلتەمە جاساپ.
اۋرۋحانانىڭ پوليجاراقات بولىمشەسى مەڭگەرۋشىسى رامازان اسكەروۆتىڭ ايتۋىنشا, بۇرىنعى پروتەز ۇرشىق ويىعىنا كىرىپ كەتكەندىكتەن, جامباس قۋىسى قاتتى زاقىمدانىپ, ناۋقاس بىردەن جانساقتاۋ بولىمىنە جەتكىزىلگەن.
دارىگەرلەر پاتسيەنتتىڭ جاعدايى دۇرىستالعاننان كەيىن پوليجاراقات بولىمشەسىنە اۋىستىرىپ, كلينيكا باسشىلارىنىڭ قاتىسۋىمەن كونسيليۋم وتكىزگەن.
«مۇنداي جاعدايلار وتە سيرەك كەزدەسەدى. ءبىز ەكى كەزەڭنەن تۇراتىن وتا جاساۋ تۋرالى شەشىم قابىلدادىق. ءبىرىنشى وتادا ءىش قۋىسى ارقىلى سىنعان پروتەز بولشەكتەرىن الىپ شىقتىق. ناۋقاستىڭ جاعدايى جاقسارعاننان كەيىن رەۆيزيالىق ەندوپروتەز ورناتتىق. بۇل ورتوپەديالىق وپەراتسيا ىشىندەگى ەڭ اۋىر وتالاردىڭ ءبىرى. ياعني, ءبىر رەت وتا جاسالعان جەردى قايتا قوزعاپ, كەلەسى وپەراتسيانى جاسادىق. تراۆماتولوگ-ورتوپەدتەر مەن انەستيزيولوگتار كومانداسىنىڭ بىلىكتىلىگىنىڭ ارقاسىندا كۇردەلى وتا ءساتتى ءوتتى», دەيدى رامازان اسكەروۆ.
پاتسيەنت وتادان كەيىن ەكىنشى كۇنى توسەكتە وزدىگىنەن وتىرىپ, ءۇشىنشى كۇننەن باستاپ ارنايى قۇرىلعىنىڭ كومەگىمەن جۇرە باستاعان.
«بۇل جوعارى تەحنولوگيالى وپەراتسيا. پاتسيەنتتىڭ بۇرىنعى بۋىنىنىڭ ورنىنا جاساندى پروتەز سالامىز. مۇنداي وپەراتسيالاردى بارلىق كلينيكالار جاساي بەرمەيدى. ول ءۇشىن ارنايى دايىندىقتان وتكەن ماماندار مەن قۇرال-جابدىقتار قاجەت. ونىڭ ۇستىنە, قازاقستاندا ەندوپروتەزدەۋ وپەراتسيالارىن مىندەتتى الەۋمەتتىك مەديتسينالىق ساقتاندىرۋ ارقىلى تەگىن جاساتۋعا بولادى», دەيدى دارىگەر.
وسىلايشا الماتىلىق دارىگەرلەر جوعارى تەحنولوگيالاردىڭ كومەگىمەن جاعدايى وتە اۋىر ناۋقاستى اياعىنا تۇرعىزدى.
الماتى