قازاقستان شاحمات فەدەراتسياسى «Freedom Broker» كومپانياسىنىڭ دەمەۋشىلىگىمەن «شاحمات كەرۋەنى» جوباسى اياسىندا ەل ارالاپ ءجۇر. ءدال رەسپۋبليكا كۇنى كەرۋەن ورال قالاسىنا ات باسىن تىرەپ, ويلىلار ويىننىڭ وڭىردەگى ۇزدىكتەرىن انىقتادى.
قازاقستان شاحمات فەدەراتسياسى پرەزيدەنتىنىڭ كەڭەسشىسى ولەگ ريابچەنكونىڭ ايتۋىنشا, بۇل جوبا ەلىمىزدە ينتەللەكتۋالدى سپورت ءتۇرىن دامىتۋ, كەڭىنەن ناسيحاتتاۋ ءۇشىن قولعا الىنعان. جوبا بويىنشا «شاحمات كەرۋەنى» ەكى اي ىشىندە 14 مىڭ شاقىرىم جول ءجۇرىپ, ەل ايماعىن تۇگەل ارالاپ, 10 قاراشا كۇنى تۇركىستانعا تابان تىرەيدى. ءار وبلىستىڭ ۇزدىكتەرىنەن قۇرالعان 60 ويىنشى ءوزارا باسەكەگە ءتۇسىپ, گراند-فينالدىڭ جەڭىمپازى 5 ملن تەڭگە جۇلدەگە يە بولماق. كەرۋەننىڭ جالپى جۇلدە قورى – 16 ملن تەڭگە.
– بۇل جارىسقا ادەيى اۋەسقوي شاحماتشىلاردى عانا قاتىستىرىپ وتىرمىز. ويتكەنى شاحمات سەكىلدى ينتەللەكتۋال ويىنى ەلىمىزدە جالپىحالىقتىق سيپات العانىن قالايمىز, – دەدى ولەگ ريابچەنكو.
«شاحمات كەرۋەنى» جوباسىنىڭ ورالداعى كەزەڭىن باتىس قازاقستان وبلىسىنىڭ اكىمى ناريمان تورەعالي ۇلى اشتى.
– ەلىمىزدە حالىقارالىق ەلو رەيتينگىنە كىرەتىن 900-دەي سپورتشى بار. ونىڭ 15-ءى – حالىقارالىق گروسسمەيستەر اتاعىنا يە. ال ءبىزدىڭ وبلىستا 9 مىڭداي ادام شاحماتپەن جۇيەلى تۇردە اينالىسادى. №2 بالالار مەن جاسوسپىرىمدەر سپورت مەكتەبىندە, مەكتەپتەن تىس جۇمىستار ورتالىعىندا, وقۋشىلار سارايىندا, سونداي-اق اقجايىق, بايتەرەك, ءبورلى, تەرەكتى, قازتالوۆ اۋداندارىندا شاحمات ۇيىرمەلەرى جۇمىس ىستەپ تۇر. وندا 500-دەي بالا بار. وڭىردە جوعارى بىلىكتى 20 جاتتىقتىرۋشى-ۇستازىمىز ساباق بەرەدى. وڭىردە ەل نامىسىن قورعاپ, كاسىبي مانسابىندا جوعارى جەتىستىكتەرگە قول جەتكىزگەن, بالالار ۇلگى تۇتاتىن, ەلىكتەيتىن شاحماتشىلار از ەمەس. سولاردىڭ ىشىندە حالىقارالىق گروسسمەيستەر, جازعى ازيا ويىندارىنىڭ جەڭىمپازى مۇرتاس قاجىعاليەۆ, جاسوسپىرىمدەر اراسىنداعى الەم چەمپيوناتىنىڭ قولا جۇلدەگەرى الىبەك يعامبەرگەنوۆ, 20 جاسقا دەيىنگى جاستار اراسىنداعى ەل چەمپيونى جانات سايىن, 20 جاسقا دەيىنگى قىزدار اراسىنداعى قازاقستان چەمپيوناتىنىڭ كۇمىس جۇلدەگەرى ايسەزىم مۇحيت, 16 جاسقا دەيىنگى ۇلدار اراسىنداعى «Aktau Chess Open» اشىق تۋرنيرىندە قولا جۇلدەگەر اتانعان الەكساندر ساۆين, ەل رەسپۋبليكاسى بالالار كۋبوگىنىڭ جانە ءجاسوسپىرىم قىزدار اراسىنداعى ەل چەمپيوناتىنىڭ كۇمىس جۇلدەگەرى لاۋرا ابدىلداەۆا بار, – دەدى ن.تورەعاليەۆ.
وسى كۇنى ورالداعى تۇڭعىش پرەزيدەنت الاڭىندا ۇيىمداستىرىلعان مەرەكەلىك ءىس-شارا كەزىندە قازاقستان شاحمات فەدەراتسياسىنىڭ وبلىستىق فيليالى اشىلىپ, ونىڭ توراعالىعىنا ورال قالاسىنىڭ اكىمى ميرجان ساتقانوۆ تاعايىندالدى.
وسى ءىس-شاراعا وراي ارنايى قۇرىلعان ءموبيلدى كيىز ۇيدە شۆەيتسارلىق جۇيە بويىنشا 11 كەزەڭنەن تۇراتىن بليتستەن تۋرنير ءوتتى. وندا وبلىستىق ىرىكتەۋدەن شىققان 20 ادام ءوزارا باق سىناپ, ءۇش جەڭىمپاز 10 قاراشا كۇنى تۇركىستاندا وتەتىن گراند-فينالعا جولداما الدى. ولار – تورەحان مولباي (1-ورىن, 100 مىڭ تەڭگە), دميتري دانيلوۆ (2-ورىن, 50 مىڭ تەڭگە), ميراس رۋشانوۆ (3-ورىن, 30 مىڭ تەڭگە).
– مەن شاحماتتى 4 جاسىمدا اكەمنەن ۇيرەندىم. سودان بەرى تۇراقتى اينالىسىپ كەلەمىن. بۇگىن تۋرنيردە وبلىستىڭ 20 مىقتىسىمەن ويناپ, 1-ورىن يەلەندىم. ءوزىمنىڭ جەتكەن جەتىستىگىمە قۋانىپ تۇرمىن, – دەدى كيەلى تۇركىستاندا وتەتىن فينالعا جولداما العان 15 جاستاعى تورەحان مولباي.
تۋرنيردە ايشا تۇرسىنوۆا «قىزدار اراسىنداعى ۇزدىك كورسەتكىش», بەكسۇلتان عۇباشەۆ «16 جاسقا دەيىنگى ۇزدىك ويىنشى», تايىر جۇماباەۆ «50 جاستان اسقان ارداگەر قاتىسۋشى» اتالىمدارى بويىنشا ماراپاتتالىپ, ارقايسىسىنا 30 مىڭ تەڭگەدەن اقشالاي سىيلىق تابىس ەتىلدى.
ءىس-شارا اياسىندا الدىن الا تىركەلگەن 10 اۋەسقوي ويىنشى شاحمات وليمپيادالارىنىڭ جەڭىمپازى, ەل چەمپيونى رومان كوزلوۆپەن ءبىر مەزەتتىك ويىن سەانسىنا قاتىستى.
باتىس قازاقستان وبلىسى