قاۋىپسىزدىك كەڭەسىنىڭ حاتشىسى عيزات نۇرداۋلەتوۆ تۇركى مەملەكەتتەرى ۇيىمىنا (تمۇ) مۇشە ەلدەردىڭ قاۋىپسىزدىك كەڭەستەرى حاتشىلارىنىڭ تاشكەنتتە وتكەن ەكىنشى كەزدەسۋىنە قاتىستى.
جيىن بارىسىندا تمۇ كەڭىستىگىندەگى قاۋىپسىزدىك پەن تۇراقتىلىقتى قامتاماسىز ەتۋگە بايلانىستى كوپتەگەن ماسەلە تالقىلاندى.
تاراپتار حالىقارالىق جانە وڭىرلىك كۇن تارتىبىندەگى وزەكتى ماسەلەلەر بويىنشا, سونىڭ ىشىندە كيبەرقىلمىسقا قارسى كۇرەس, تەرروريزم مەن ەكسترەميزمگە, ەسىرتكى ترافيگىنە, ادام ساۋداسىنا قارسى ءىس-قيمىل, توتەنشە جاعدايلاردىڭ الدىن الۋعا جانە جويۋعا باعىتتالعان ىقپالداستىقتى كەڭەيتۋ باعىتتارىنداعى ىنتىماقتاستىقتى دامىتۋ جونىندە پىكىر الماستى.
عيزات نۇرداۋلەتوۆ ارىپتەستەرىنە حالىقارالىق جانە وڭىرلىك قاۋىپسىزدىكتىڭ قازىرگى وزەكتى ماسەلەلەرىنە قاتىستى قازاقستاننىڭ ۇستانىمى جايىندا مالىمەت بەردى. سونىمەن قاتار ەلىمىزدىڭ مۇددەسىن ەسكەرە وتىرىپ, تۇركى مەملەكەتتەرى ۇيىمى اياسىنداعى ىنتىماقتاستىقتى ودان ءارى دامىتۋ جونىندە بىرقاتار ۇسىنىس ايتتى.
جيىن شەڭبەرىندە قازاقستان رەسپۋبليكاسى قاۋىپسىزدىك كەڭەسىنىڭ حاتشىسى عيزات نۇرداۋلەتوۆ وزبەكستان رەسپۋبليكاسى قاۋىپسىزدىك كەڭەسىنىڭ حاتشىسى ۆيكتور ماحمۋدوۆ جانە تۇركيا رەسپۋبليكاسى ۇلتتىق قاۋىپسىزدىك كەڭەسىنىڭ باس حاتشىسى سەيفۋللا حادجيمۇفتۋوگلۋمەن ەكىجاقتى كەزدەسۋلەر وتكىزدى.
كەزدەسۋلەر بارىسىندا وڭىرلىك قاۋىپسىزدىكتىڭ, سونداي-اق قازاقستان رەسپۋبليكاسىنىڭ تۇركى مەملەكەتتەرى ۇيىمىنداعى سەرىكتەستەرىمەن اراداعى ەكىجاقتى ىقپالداستىقتىڭ وزەكتى ماسەلەلەرى تالقىلاندى.