الەۋمەتتىك جەلىدە قازاقستاندا ۋاقىت بەلدەۋى وزگەرەتىنى جايلى اقپارات تارادى, دەپ حابارلايدى Egemen.kz.
وندا قازاقستاننىڭ باتىس وبلىستارى, اتاپ ايتقاندا: اقتوبە, اتىراۋ, باتىس قازاقستان, قىزىلوردا, ماڭعىستاۋ وبلىستارى 2023 جىلعى 30 قاراشادان 1 جەلتوقسانعا قاراعان ءتۇنى (ساعات 00:00-دە) ءبىر ساعات بۇرىن استانالىق ۋاقىتقا اۋىستىرىلاتىنى ايتىلعان.
ەكولوگيا مينيسترلىگى جەلىدەگى اقپاراتقا قاتىستى تۇسىنىكتەمە بەردى.
"ەكولوگيا جانە تابيعي رەسۋرستار مينيسترلىگى ساۋدا جانە ينتەگراتسيا مينيسترلىگىمەن, سونداي-اق باسقا دا مۇددەلى ۇيىمدارمەن بىرلەسىپ, ەل اۋماعىندا ۋاقىتتى ەسەپتەۋدىڭ بىرىڭعاي ءتارتىبىن بەلگىلەۋ ماسەلەسىن پىسىقتاۋدا. دەپۋتاتتاردىڭ, ورتالىق مەملەكەتتىك ورگانداردىڭ, قوعام جانە عىلىمي ۇيىمداردىڭ وكىلدەرىنىڭ قاتىسۋىمەن جۇمىس توبى قۇرىلدى. بۇل ماسەلە بويىنشا شەشىم قابىلدانعان جوق. شەشىم ماسەلەنى ەگجەي-تەگجەيلى زەردەلەپ, قوعاممەن كەڭىنەن تالقىلاۋدان كەيىن قابىلدانادى", - دەپ مالىمدەدى ۆەدومستۆو.
مينيسترلىك قازاقستان اۋماعىندا ۋاقىت ەكى اكىمشىلىك ۋاقىت بەلدەۋىندە ەسەپتەلەتىنىن ەسكە سالدى: 4-ءشى (بقو, اقتوبە, اتىراۋ, قىزىلوردا, ماڭعىستاۋ وبلىستارى) جانە 5-ءشى (استانا, الماتى, شىمكەنت, اقمولا, الماتى, قاراعاندى, ۇلىتاۋ, تۇركىستان جانە باسقا وبلىستار).