ەلوردادا №6 مامانداندىرىلعان ءورت ءسوندىرۋ ءبولىمىنىڭ اۋماعىندا ەلوردالىق ءورت ءسوندىرۋشى اسقار زابيكۋليننىڭ قۇرمەتىنە قويىلعان ەرلىكتى ناسيحاتتايتىن ەسكەرتكىشتىڭ اشىلۋ ءراسىمى ءوتتى.
ەسكەرتكىشتىڭ اشىلۋ سالتاناتىنا جانە № 6 مامانداندىرىلعان ءورت ءسوندىرۋ بولىمىنە اسقار زابيكۋليننىڭ ەسىمى بەرىلۋ ءىس-شاراسىنا توتەنشە جاعدايلار ءمينيسترى سىرىم ءشارىپحانوۆ, ەلوردا اكىمى جەڭىس قاسىمبەك, گارنيزون باسشىلىعى مەن جەكە قۇرامى, ازاماتتىق قورعاۋ ورگاندارىنىڭ ارداگەرلەرى, اسقاردىڭ تۋىستارى مەن جاقىندارى قاتىستى.
ء«اربىر ادامنىڭ ءومىرى باعا جەتپەس قۇندى, مەملەكەتتىڭ ستراتەگياسى, ەڭ الدىمەن, ازاماتتاردى قورعاۋعا, توتەنشە جاعدايلاردىڭ الدىن الۋعا جانە جويۋعا باعىتتالعان. سول سەبەپتى قۇتقارۋشىلار مەن ءورت سوندىرۋشىلەردىڭ ەڭبەگى اسا ماڭىزدى. بۇل ەسكەرتكىش – اسقاردىڭ وجەتتىگى, جانقيارلىعى مەن ادالدىعىنىڭ بەلگىسى. بۇگىن ءبىزدىڭ كوڭىلىمىز ءتۇسىپ, قايعىرىپ, ءبارىمىز ءۇشىن ۇلگى بولاتىن ەرلىككە دەگەن شەكسىز قۇرمەتكە كۋا بولىپ تۇرمىز. ونىڭ جاساعان ەرلىگى – ازاماتتارىمىزدىڭ قاۋىپسىزدىگى جولىنداعى كۇرەستە بىزگە كۇش پەن قۋات بەرەتىن ۇلگى», دەدى س.ءشارىپحانوۆ.
رەسمي ءىس-شارادان كەيىن ەسكەرتكىشتىڭ اشىلۋىنا جينالعاندار مەموريالعا گۇل شوقتارىن قويىپ, ەرلىكپەن قازا تاپقان بۇگىنگىنىڭ باتىرىن ءبىر مينۋت ۇنسىزدىكپەن ەسكە الدى. بيىكتىگى 3 مەتر بولاتىن ەسكەرتكىشتە اسقاردىڭ ءبيۋستى قولادان, ال تومەنگى بولىگى ءمارماردان جاسالعان.
ەلوردالىق ءورت ءسوندىرۋشى اسقار زابيكۋلين 2022 جىلدىڭ 20 قاراشاسىندا تۇرعىن ءۇي كەشەنىندەگى ءورتتى ءسوندىرۋ كەزىندە قازا تاۋىپ, ءۇش ادامنىڭ ءومىرىن امان ساقتاپ قالعان ەدى. پرەزيدەنتتىڭ جارلىعىمەن اسقار زابيكۋلين قايتىس بولعاننان كەيىن ءى دارەجەلى «ايبىن» مەملەكەتتىك ناگراداسىمەن ماراپاتتالدى.