استاناداعى «الاۋ» مۇز ايدىنىندا وليمپيا ويىندارىنىڭ باعدارلاماسىنا ەنەتىن كونكيمەن جۇگىرۋ سپورتىنان جەكەلەي قاشىقتىققا جارىسۋدان ەل بىرىنشىلىگىنىڭ شىمىلدىعى ءتۇرىلدى.
وتاندىق سپورتشىلار جىل سايىن ءداستۇرلى تۇردە ۇيىمداستىرىلاتىن ەل چەمپيوناتىنىڭ قانشالىقتى ماڭىزدى ەكەنىن جاقسى تۇسىنەدى. ويتكەنى ىشكى بىرىنشىلىكتە ءوز مىقتىلىعىمەن دارالانىپ, باپكەرلەردىڭ كوزىنە تۇسە بىلگەن جەڭىمپازدار مەن جۇلدەگەرلەر الداعى حالىقارالىق جارىستارعا, الەم كۋبوگىنىڭ كەزەڭدەرىنە قاتىسۋعا مۇمكىندىك الادى. سونداي-اق بيىلعى چەمپيوناتتا ۇزدىكتەر قاتارىنان كورىنگەن جاس سپورتشىلار كەلەسى جىلعى جاسوسپىرىمدەر اراسىنداعى قىسقى وليمپيادادا ەل نامىسىن قورعاۋ مارتەبەسىنە يە بولادى. سوندىقتان ماماندار بيىلعى ەل بىرىنشىلىگىنىڭ ءار قاشىقتىقتاعى باسەكەلەرى اسا تارتىستى وتەدى دەپ بولجاپ وتىر.
ەلوردادا باستاۋ العان ىشكى چەمپيوناتتىڭ اشىلۋ سالتاناتىنا تۋريزم جانە سپورت ءمينيسترى ەرمەك مارجىقپاەۆ, استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ قاتىستى.
«كونكي جارىسى قىسقى سپورتتىڭ باسىم تۇرلەرىنىڭ ءبىرى سانالادى. سوندىقتان دا ءبىزدىڭ مينيسترلىك سپورتشىلاردىڭ وقۋ-جاتتىعۋ جيىندارىن ۇيىمداستىرۋمەن, ولاردىڭ حالىقارالىق جارىستارعا قاتىسۋىن قامتاماسىز ەتۋمەن, سونداي-اق قازاقستاندا حالىقارالىق جانە رەسپۋبليكالىق جارىستاردى وتكىزۋمەن بەلسەندى اينالىسىپ كەلەدى», دەدى ە.مارجىقپاەۆ.
بيىلعى ەل بىرىنشىلىگىنە ەلىمىزدىڭ 7 وبلىسى مەن استانا جانە الماتى قالالارىنان كەلگەن 183 سپورتشى قاتىسىپ جاتىر. ايتا كەتەيىك, قىسقى وليمپيا ويىندارىندا حالىقارالىق كونكيشىلەر وداعىنا ەنەتىن سپورت تۇرلەرى (شورت-ترەك, مانەرلەپ سىرعاناۋ جانە كونكيمەن جۇگىرۋ) بويىنشا 28 مەدال جيىنتىعى ساراپقا سالىنادى.