قۇرلىقتىق حوككەي ليگاسىندا (قحل) ونەر كورسەتەتىن ەلوردانىڭ «بارىسى» تۇراقتى بىرىنشىلىكتەگى كەزەكتى تۋر ويىن تولياتتيدە جەرگىلىكتى «لادا» كومانداسىمەن وتكىزدى.
سىرت ايدىنداعى ويىندار سەرياسىن رەسەيدىڭ تولياتتي قالاسىندا باستاعان جەرلەستەرىمىز العاشقى كەزدەسۋىندە-اق ساتسىزدىككە ۇشىرادى. قحل-عا بيىل عانا ورالعان جەرگىلىكتى «لادا» حوككەيشىلەرىمەن شەبەرلىك بايقاسقان «بارىس» ويىنشىلارى قارسىلاستارىنا 2:1 ەسەبىمەن جول بەردى. ءتورت مىڭنان اسا جانكۇيەر تاماشالاعان «لادا-ارەنا» سپورت كەشەنىندەگى تارتىستى باسەكەنىڭ ەسەبىن ءبىرىنشى بولىپ ايدىن يەلەرى اشتى. ويىننىڭ 6-مينۋتىندا يۆان رومانوۆ مەرگەندىك تانىتىپ, جەرگىلىكتى جانكۇيەرلەردىڭ ىستىق ىقىلاسىنا بولەندى.
ۇزىلىستەن كەيىن دە ايدىن يەلەرى قارقىنىن ءبىر ساتكە دە باسەڭدەتپەي, 33-مينۋتتا وستاپ ءسافيننىڭ شايباسىنان كەيىن ەسەپتەگى باسىمدىعىن 2:0-گە جەتكىزدى. ارادان ءتورت مينۋت وتكەندە «بارىس» ساپىنان پونتۋس وبەرگ ءدال سوققىسىمەن ەسەپ ايىرماسىن قىسقارتقانىمەن, كومانداسىن جەڭىلىستەن قۇتقارىپ قالا المادى. قورىتىندى ەسەپ – 2:1. بۇل – «بارىستىڭ» كەيىنگى ءۇش ويىنداعى ءۇشىنشى جەڭىلىسى. ءبىزدىڭ جىگىتتەر كەلەسى ويىنىن بۇگىن سوچيدە جەرگىلىكتى «Cوچي» كومانداسىمەن وتكىزەدى.