مەملەكەتتىك قىزمەت: ماقسات جانە مانساپ
2020 ستراتەگيالىق جوسپارى: وڭتايلى مەملەكەتتىك باسقارۋدى نەگىزگە العان جاڭا ونجىلدىق
ەلباسى نۇرسۇلتان نازارباەۆ حالىققا جىل سايىنعى جولداۋلارىندا مەملەكەتىمىزدىڭ وتكەن ۋاقىت ارالىعىنداعى ىرگەلى ىستەرىنىڭ ناتيجەسىن قورىتىندىلاپ, مەملەكەت الدىندا تۇرعان ماڭىزدى تاپسىرمالاردى ايقىنداپ كەلەدى. ءار جولداۋدىڭ ەل ومىرىندەگى ەلەۋلى وقيعاعا اينالىپ جۇرگەندىگى دە سوندىقتان.
قازاقستان قوعامى ءۇشىن ستراتەگيالىق ءمانى زور بيىلعى جولداۋ دا الداعى ۋاقىتتاعى باعىت-باعدارىمىزدى تولىعىمەن قامتيدى. ول “قازاقستان – 2030” ستراتەگياسىنىڭ العاشقى ونجىلدىعىن قورىتىندىلاپ, ەل دامۋىنىڭ كەلەسى ونجىلدىق جوسپارىنا قادام باسۋىن ايشىقتاپ وتىر. بۇل ورايدا ەلباسى ۇلتتىق كوشباسشى رەتىندە قازاقستان قوعامىنىڭ كۇشىن ەل دامۋىنداعى ناقتى ماقسات-مىندەتتەردى ورىنداۋعا باعىتتادى. اتالعان تاپسىرمالاردىڭ جۇزەگە اسۋ ءمۇمكىندىگى زور, ويتكەنى, ولاردى ورىنداۋعا قازاقستاننىڭ ەكونوميكالىق مۇمكىندىكتەرى دە, ادام رەسۋرستارى دا جەتكىلىكتى.
وتكەن ون جىل ىشىندە قابىلدانعان ستراتەگيالىق شەشىمدەر ەلىمىزدى دامۋدىڭ جاڭا دەڭگەيىنە كوتەردى. مۇنداي جەتىستىككە ەلىمىز “قازاقستان – 2030” ستراتەگياسىنداعى باسىمدىقتاردىڭ ءبىرى – كاسىبي ۇكىمەت قۇرۋدى جۇزەگە اسىرۋ ارقىلى قول جەتكىزدى. اتالعان ستراتەگيالىق تاپسىرما قازاقستاندا مەملەكەت قىزمەتىن ءتيىمدى ىسكە اسىرا الاتىن قازىرگى زامانعى مەملەكەتتىك قىزمەت قۇرۋدى قاراستىرادى. وسى ورايدا قازاقستان 1990-جىلداردىڭ سوڭىنان بەرى مەملەكەتتىك قىزمەت جۇيەسىنە وڭ ىقپال ەتكەن كەشەندى اكىمشىلىك رەفورمالاردى جۇزەگە اسىرعان بولاتىن. بۇل ورايدا وتكەن جىلداردا مەملەكەتتىك قىزمەت ىستەرى جونىندەگى اگەنتتىك قۇرىلىپ, “مەملەكەتتىك قىزمەت تۋرالى”, “جەمقورلىققا قارسى كۇرەس تۋرالى”, سونداي-اق “مەملەكەتتىك قىزمەتكەرلەردىڭ ار-نامىس كودەكسى” سەكىلدى بىرقاتار ماڭىزدى زاڭدار قابىلداندى.
وسىنداي اكىمشىلىك رەفورمالاردى ءتيىمدى جۇرگىزۋدىڭ ارقاسىندا بۇگىندە قازاقستاندا مەملەكەتتىك قىزمەتتىڭ وڭتايلى مودەلىن قالىپتاستىرۋ مۇمكىن بولىپ وتىر. تالاپتاردى ورىنداۋ تۇرعىسىنان ول شەتەلدىك بالامالاردان كەم تۇسپەيدى. بۇعان قوسا, كەلەشەك دامۋ جولىندا دا مۇمكىندىكتەرى زور. حالىقارالىق ۇيىمدار مەن ساراپشىلاردىڭ باعالاۋىنشا, وسى سالادا قازاقستاندىق زاڭنامالار حالىقارالىق ستاندارتتارعا ءبىرشاما جاقىنداي تۇسكەن.
مۇنىڭ باستى كورىنىسى – ەلىمىزدە مەملەكەتتىك قىزمەتكە ورنالاسۋدىڭ كونكۋرستىق نەگىزدە جۇزەگە اسىرىلۋى. اتا زاڭىمىزعا سايكەس ەلىمىزدىڭ ءاربىر ازاماتى ەش كەدەرگىسىز مەملەكەتتىك قىزمەتكە ورنالاسۋدىڭ زاڭدى قۇقىعىنا يە. اتالعان قاعيدا تەڭ قولجەتىمدىلىك ۇستانىمى دەپ اتالادى.
سونداي-اق, قازاقستاندا ساياسي جانە اكىمشىلىك مەملەكەتتىك قىزمەتتىڭ كادرلىق رەزەرۆى جۇمىس ىستەيدى. باسقارۋشى سالاداعى مەملەكەتتىك قىزمەتكەرلەردىڭ جۇمىستان نەگىزسىز شىعارىلۋىنا جول بەرمەۋ زاڭمەن قورعالادى. مەملەكەتتىك قىزمەتكەرلەردى الەۋمەتتىك قورعاۋ ماسەلەسىنە دە باسا نازار اۋدارىلادى. بىلىكتىلىگىمەن كوزگە تۇسكەن مامانداردى قىزمەت بابىمەن ءوسىرۋ قاراستىرىلعان. وسىنىڭ ءبارى مەملەكەتتىك ورگاندارىمىزدىڭ جۇمىسىن اناعۇرلىم ايقىن ەتىپ, مەملەكەتتىك قىزمەتكەرلەردىڭ كاسىبيلىگىن ارتتىرۋعا مۇمكىندىك بەرۋدە.
بۇگىندە كادرلاردىڭ بىلىكتىلىگىن ارتتىرۋ ماسەلەسىن ءبىر جۇيەگە كەلتىرىپ, تۇراقتى نەگىزدە جۇزەگە اسىرمايىنشا, ماماندارىمىزدىڭ كاسىبيلىگىنە قول جەتكىزۋدىڭ مۇمكىن بولمايتىنى بەلگىلى. بۇل ماسەلەمەن قر پرەزيدەنتى جانىنداعى مەملەكەتتىك باسقارۋ اكادەمياسى جانە ۇلتتىق مەملەكەتتىك ساياسات مەكتەبى اينالىسادى. بۇعان قوسا, مەملەكەتتىك قىزمەتكەرلەر قاتارى “بولاشاق” باعدارلاماسى بويىنشا ءبىلىم العان جاس ماماندارمەن تولىعا تۇسۋدە.
ايتا كەتۋ كەرەك, مەملەكەتتىك قىزمەتكەرلەرگە قويىلاتىن تالاپتار جىلدان جىلعا قاتاڭداي تۇسۋدە. ماسەلەن, قازىرگى اقپاراتتىق قوعام داۋىرىندە مەملەكەتتىك قىزمەتكەرلەردىڭ اقپاراتتىق تەحنولوگيالاردى مەڭگەرۋلەرىنە باسا نازار اۋدارىلادى. جۇمىستىڭ ەتيكالىق بولىگىنە دە ەرەكشە ءمان بەرىلۋدە. ءاربىر مەملەكەتتىك قىزمەتكەر ازاماتتاردىڭ تالاپ-تىلەكتەرىمەن جۇمىس جاساي ءبىلىپ, ءماسەلەنىڭ ءمان-جايىن انىقتاپ, ءوز قۇزىرەتى اياسىندا ونىڭ شەشىمىن تابۋعا بار كۇشىن جۇمساۋى ءتيىس. مۇنىمەن قاتار, قىزمەت بابىندا مەملەكەتتىك قىزمەتكەر تەك مەملەكەت پەن قوعام مۇددەسىن جەتەكشىلىككە الىپ, كەز كەلگەن جاعدايدا وتانسۇيگىشتىك, ساياسي بەيتاراپتىق جانە زاڭعا باعىنۋشىلىق قاسيەتتەرىمەن تانىلۋى كەرەك.
ارينە, مۇنداي تالاپتار مەملەكەتتىك قىزمەتكەرلەر ءۇشىن وسىدان ون جىل بۇرىن دا ماڭىزدى بولاتىن. ال دامۋىمىزدىڭ جاڭا كەزەڭىندە بۇل تالاپتار اسا ەرەكشە مانگە يە بولا تۇسەدى.
بولاشاققا باعدار
الداعى 10 جىل قازاقستاننىڭ ىلگەرى دامۋى مەن جاڭا باعىت-باعدارىنىڭ شارىقتاعان كەزەڭىنە اينالارى ءسوزسىز. وسى ورايدا مەملەكەت ءرولى نىعايا ءتۇسىپ, مەملەكەتتىك باسقارۋ ساپاسىنىڭ ارتۋىنا ەرەكشە ءمان بەرىلەتىن بولادى. سول سەبەپتى “2020 ستارتەگيالىق دامۋ جوسپارىندا” دا ونى رەفورمالاۋدىڭ باستى باعىتتارى ايقىندالعان. مەملەكەتتىك اپپارات حالىقارالىق ءتاجىريبەنىڭ ءتيىمدى تۇستارىن جيناپ, جۇمىس بارىسىندا ناتيجەلىلىك, اشىق بولۋ جانە قوعامعا ەسەپ بەرۋ سىندى ماڭىزدى قاعيدالارعا نەگىزدەلۋى ءتيىس.
بۇل زاڭدى قۇبىلىس, سەبەبى, جاڭا ونجىلدىق ەكونوميكاسىن جوعارى كاسىبي ءارى قۇزىرەتتى كادرلار قۇرايتىن بولادى. ستراتەگيالىق جوسپاردىڭ باستى ءدىلى دە وسىلايشا تانىلۋدا. بۇل ورايدا, ءبىز مەملەكەتتىك قىزمەتكە ناعىز كاسىپقوي مامانداردى تارتۋىمىز كەرەك. ەلباسىمىز بىزدەرگە وسىنداي مىندەت جۇكتەپ وتىر.
ءبىر سوزبەن ايتقاندا, جاڭا ونجىلدىق تاپسىرمالارىن ورىنداۋ بارىسىندا كاسىبي بىلىكسىزدىك سالدارىنان جۇمىستىڭ تەجەلۋىنە جول بەرمەۋ كەرەك. كەرىسىنشە, وسى ۋاقىتقا دەيىن شىڭدالىپ كەلگەن باسقارۋ ءتاجىريبەمىزدى جوعارى ساپالى دەڭگەيگە شىعارۋىمىز قاجەت. بۇل – مەملەكەتتىك باسقارۋ سالاسىنداعى ءدىلىمىزدى قالىپتاستىرۋدا ادام مۇمكىندىگىنىڭ ارتىقشىلىعىن مويىنداۋعا بەت بۇرۋ دەگەن ءسوز. بۇگىندە مەملەكەتتىك قىزمەتكەردىڭ جەكە باسىنىڭ ىسكەرلىك, زياتكەرلىك جانە ادامگەرشىلىك قاسيەتتەرىنىڭ ءرولى مەن ماڭىزىنىڭ كۇننەن كۇنگە ارتىپ وتىرعانىن قاپەردە ۇستاعان ءجون.
اتالعان ەكى فاكتور – ادام مۇمكىندىكتەرى مەن مەملەكەتتىك باسقارۋ ساپاسى اراسىندا ەكىجاقتى تىعىز بايلانىس بار. ول تومەندەگىدەي جاعدايلاردا كورىنەدى. تەك جوعارى كاسىبي كادرلار ارقاسىندا عانا مەملەكەتتىك ينستيتۋتتار جۇمىسىنىڭ تيىمدىلىگىن ارتتىرۋعا قول جەتكىزۋگە بولادى. جانە دە ءسايكەسىنشە, مەملەكەتتىك باسقارۋ تيىمدىلىگىنىڭ ارتۋى ادام مۇمكىندىكتەرى ساپاسىنىڭ جوعارىلاۋىن ايقىندايتىن بىردەن-ءبىر كورسەتكىش بولىپ تابىلادى. مەملەكەتتىك شەشىمدەردىڭ ۋاقتىلى ءارى دۇرىس بولۋى وسى ەكى قۇراۋشى نەگىزدىڭ سايكەس كەلۋىنە تىكەلەي بايلانىستى.
جانە دە وسى قاعيداتتىڭ سانامىزدا اناعۇرلىم جىلدام قالىپتاسۋى ەلىمىزدىڭ دامۋ قارقىنىنا يگى ىقپالىن تيگىزەتىنىن ايتا كەتكەن ءجون.
كاسىبيلىك – ۋاقىت تالابى
2020 ستراتەگيالىق جوسپارىنا سايكەس مەملەكەتتىك قىزمەتتى رەفورمالاۋ ونى كاسىبيلەندىرۋگە ۇشتاسادى. مەملەكەتتىك قىزمەت ىستەرى جونىندەگى اگەنتتىكتە قازىردىڭ وزىندە ونى جۇزەگە اسىرۋدىڭ باستى باعىتتارى قالىپتاسقان.
مەملەكەتتىك قىزمەتتىڭ وكىلدەرىن باسقارۋ جۇيەسى مەملەكەتتىك قىزمەتتى اتقارۋ كەزەڭدەرىنە – كونكۋرستىق ىرىكتەۋدەن باستاپ, قىزمەت بابىمەن ءوسۋ بارىسىندا ءار كەزەڭگە ساي قۇرىلاتىن بولادى. اتاپ ايتقاندا, مەملەكەتتىك قىزمەتكە قابىلداۋ ءتارتىبىن جەتىلدىرۋ بويىنشا قوسىمشا قاجەتتى شارالار قابىلدانادى. ول كونكۋرستىق ىرىكتەۋ جۇيەسىنە بەلگىلى جاڭاشىلدىقتاردى ەنگىزۋدى قاجەت ەتەدى. بۇل ورايدا, وتكەن ونجىلدىق تاجىريبەمىز بەن بۇگىنگى ءومىر شىندىعىن ەسكەرۋىمىز كەرەك.
مەملەكەتتىك قىزمەتكەرلەردى كاسىبي تۇرعىدا جەتىلدىرۋ جۇيەسىن دامىتۋ دا كەڭەيىپ وتىر. ماسەلەن, ءار قىزمەتكەردىڭ ءبىر جىلعا ارنالعان جەكە باستى دامۋ جوسپارىن ەنگىزۋ ءىسى قاراستىرىلعان. بۇل رەتتە مەملەكەتتىك قىزمەتكەرلەر جۇمىسىنىڭ ناتيجەسى, ولاردى اتتەستاتتاۋ, ارنايى وقۋ باعدارلامالارىن ىرىكتەۋ, لاۋازىمدىق جوعارىلاۋ بولجامى سىندى بار جاعدايلار ەسكەرىلەتىن بولادى. ءاربىر مەملەكەتتىك قىزمەتكەردى وقىتۋ شاراسى تۇراقتى تۇردە ۇيىمداستىرىلۋى ءتيىس, ياعني ول جاڭا ءبىلىم الىپ, قابىلەتتىلىگىن ارتتىرۋ كاسىبي جولىنىڭ ءار كەزەڭىن قامتۋى مىندەت.
اتالعان جاعدايدا ماڭىزدى ءرول مەملەكەتتىك ورگانداردىڭ كادرلار قىزمەتىنە تيەسىلى. كادر قىزمەتى جۇمىسىنا ورتاق تالاپتار ەنگىزىپ, ولاردى كادرلىق مەنەدجمەنت قىزمەتىنە ءبولۋ كەرەك. وزگە سوزبەن ايتقاندا, ءبىزدىڭ كادرمەن قامتاماسىز ەتۋ قىزمەتىمىز تەك كادر ەسەبىن جۇرگىزىپ قانا قويماي, ءوز ۆەدومستۆولارى شەڭبەرىندە كادرلاردى تولىققاندى باسقارۋى ءتيىس.
مەملەكەتتىك قىزمەتكەرلەردىڭ مانسابىن جوعارىلاتۋ جولىندا ولاردى اعىمداعى جىلدىڭ قاڭتار ايىندا پرەزيدەنت العا تارتقان ورتالىق-ايماق جەلىسى بويىنشا روتاتسيالاۋ ءىس-شاراسى جۇزەگە اسىرىلىپ وتىر. قازىردە مەملەكەتتىك ورتالىق جانە ايماقتىق ورىنداۋشى ورگاندار اراسىندا جۇرگىزىلىپ جاتقان روتاتسيا ەل ءۇشىن اسا ماڭىزدى. ەلباسى اتاپ وتكەندەي, ەلدىڭ يندۋستريالىق-يننوۆاتسيالىق دامۋى باعىتىنداعى بارلىق تاپسىرمالاردى ورىنداۋ بارىسىندا نەگىزگى اۋىرتپالىق ايماقتاردىڭ ەنشىسىنە تيەسىلى بولاتىندىقتان, وبلىستارىمىزدى كادرلار تۇرعىسىنان بەكەمدەۋىمىز كەرەك. بۇگىندە كوپشىلىك اۋزىندا جۇرگەن اتالمىش روتاتسيانىڭ نەگىزگى ءمانى وسىندا جاتىر.
مەملەكەتتىك قىزمەت كادرلارىن روتاتسيالاۋ شاراسى كوپتەگەن ەلدەردە ءتيىمدى قولدانىلىپ كەلەدى. ماسەلەن, فينليانديا ۇكىمەتى “روتاتسيانى جۇزەگە اسىرۋ ستراتەگياسى” جوباسىن قابىلداپ, وسىعان ساي 2015 جىلعا دەيىن 4 مىڭنان 8 مىڭعا جۋىق مەملەكەتتىك قىزمەتكەردى ايماقتارعا روتاتسيالاۋدى جوسپارلاپ وتىر. سول سياقتى, روتاتسيانىڭ مەملەكەت اپپاراتىنىڭ قىزمەتىنە وڭ ىقپال ەتەتىنىنە كوز جەتكىزەتىن بىرقاتار مىسالدار كەلتىرۋگە بولادى. ءبىر ورىندا ۇزاق قىزمەت اتقارۋ مەملەكەتتىك قىزمەتكەرلەردىڭ ەڭبەككە دەگەن ىنتاسىنىڭ باسەڭدەۋىنە اكەلەتىنى بەلگىلى. بۇعان قوسا, قىزمەتكەر كوزقاراسى دا قىزمەت اياسىمەن شەكتەلىپ, بىلىكتىلىگىن جاڭا باسقارۋ ادىستەرىمەن جەتىلدىرمەيتىنى اقيقات. جاڭا قىزمەتكە اۋىسۋ ەكى جاقتىڭ احۋالىن سالىستىرىپ, جاڭا جاعدايلارعا بەيىمدەلۋ مۇمكىندىگىن تۋعىزادى.
كۇن تارتىبىندە – مەملەكەتتىك قىزمەت تۇتىنۋشىلارى
ءبىزدىڭ مەملەكەتىمىز بۇگىندە مەملەكەتتىك قىزمەت تۇتىنۋشىلارىنىڭ مۇددەسىنە نەگىزدەلگەن مەملەكەتتىك باسقارۋدىڭ جاڭا ساپالى ۇلگىسىن قۇراۋدا. بۇل ورايدا, ەلباسى “جىل سايىنعى ورتالىق مەملەكەتتىك جانە وبلىستار, رەسپۋبليكالىق ماڭىزى بار قالا مەن استانانىڭ جەرگىلىكتى اتقارۋ ورگاندارى جۇمىسىنىڭ تيىمدىلىگىن باعالاۋ جۇيەسى تۋرالى” قاۋلىعا قول قويعان بولاتىن. اتالعان قۇجاتقا ساي, اگەنتتىك مەملەكەتتىك قىزمەت كورسەتۋ جانە پەرسونالدى باسقارۋ باعىتتارى بويىنشا ورتالىق جانە جەرگىلىكتى اتقارۋ ورگاندارى قىزمەتىنىڭ تيىمدىلىگىنە باعا بەرەتىن بولادى.
مەملەكەتتىك قىزمەت كورسەتۋدىڭ بۇگىنگى دەڭگەيىن انىقتاۋ بارىسىندا قىزمەتتىڭ ساپاسى, ونىڭ ۋاقىتىندا ورىندالۋى, قولجەتىمدىلىگى, شاعىم بەرۋ شاراسى, قىزمەتكەرلەردىڭ كىشىپەيىلدىگى, ەلەكتروندىق پىشىمدە كورسەتىلۋى سىندى تۇستار قاپەرگە الىنادى. قىزمەت ساپاسىن باعالاۋدا مەملەكەتتىك قىزمەت كورسەتۋ تۇتىنۋشىلارى اراسىندا الەۋمەتتىك ساۋالداما جۇرگىزىلىپ, ساناق ماعلۇماتتارى پايدالانىلاتىن بولادى. ساۋالداما جۇرگىزۋ جۇمىسىنا دەربەس ساراپشىلار مەن ۇكىمەتتىك ەمەس ۇيىمدار تارتىلادى. بۇل – كوپشىلىك ماقۇلداعان الەمدىك تاجىريبە.
2009 جىلى اگەنتتىك مەملەكەتتىك قىزمەت كورسەتۋ ساپاسىن انىقتاۋ باعىتىندا الەۋمەتتىك زەرتتەۋ جۇرگىزگەن بولاتىن. زەرتتەۋ اياسىندا سونداي-اق باق پەن ۇكىمەتتىك ەمەس ۇيىمدار وكىلدەرى اراسىندا ساۋالداما جۇرگىزىلدى. ونىڭ قورىتىندىلارىنا جۇگىنەر بولساق, ازاماتتاردىڭ مەملەكەتتىك مەكەمەگە حابارلاسۋى بارىسىندا قاعازباستىلىققا ءجيى ۇشىرايتىنى ايقىندالىپ وتىر.
مەملەكەتتىك قىزمەتتى جەتىلدىرۋ تالاپتارىنىڭ ءبىرى رەتىندە مەملەكەتتىك قىزمەتكەرلەردىڭ ءدىلىنىڭ وزگەرۋىن ەسكەرگەن ماڭىزدى. ءىس جۇزىندە مەملەكەتتىك قىزمەتكە تۇرعان سوڭ, قىزمەتكەر مەملەكەت اتىنان ازاماتتارعا قىزمەت كورسەتۋگە ءتيىستى. ازاماتتار مەملەكەتتىك قىزمەتكەرلەر ەڭبەگىن تولەۋشىلەرى بولا تۇرا, سوڭعىلارىنان ساپالى قىزمەت كورسەتۋدى تالاپ ەتۋگە قۇقىلى.
وسى تاپسىرمانىڭ ساۋاتتى ورىندالۋى ازاماتتاردىڭ مەملەكەتتىك قىزمەتكەرلەرگە دەگەن سەنىمىنە تىكەلەي ىقپال ەتسە كەرەك. اتالمىش سەنىم مەملەكەتتىك قىزمەتكەرلەر جۇمىسىنىڭ قوعامداعى بەدەلىن دە ايقىندايدى. وڭ بەدەل دەگەن ۇعىمدى كۇشتەپ تەلۋگە بولماس, وعان تەك لايىقتى بولۋ شارت. سول سەبەپتى مەملەكەتتىك قىزمەتتىڭ وڭ بەدەلى مەملەكەتتىك ورگانداردىڭ حالىققا كورسەتەتىن قىزمەتىنىڭ ساپاسىنا تىكەلەي بايلانىستى.
مامانداردى باسقارۋدى باعالاۋعا كەلەر بولساق, بۇل ورايدا ولاردى ىرىكتەۋ, وقىتۋ, ءبىلىكتىلىگىن جەتىلدىرۋ, ىنتالاندىرۋ جانە ادەپ تالاپتارىن ورىنداۋى مەن سىبايلاستىق دەڭگەيىن ەسكەرۋ قاپەرگە الىنادى. جۇمىس بارىسىندا مەملەكەتتىك قىزمەت پەرسونالىن ساراپتاۋ, مەملەكەتتىك ورگان ماماندارى اراسىندا جۇرگىزىلگەن ساۋالداما قورىتىندىلارى مەن سىبايلاستىق قۇقىق بۇزۋشىلىق جانە ار-نامىس كودەكسىن بۇزۋ كورسەتكىشتەرى نەگىزگە الىناتىن بولادى.
وسىلايشا, اتالعان قاۋلى كۇشىنە ەنگەن ساتتەن باستاپ مەملەكەتتىك ورگاندار جۇمىسىنىڭ تيىمدىلىگىن ارتتىرۋ باعىتىندا قوسىمشا تەتىكتەر ىسكە قوسىلدى. بۇلاردىڭ بارلىعى ەلىمىزدەگى مەملەكەتتىك قىزمەتتى كاسىبيلەندىرۋ جولىنداعى ۇلكەن جۇمىسقا جاڭا دەم بەرەتىنىنە سەنىمدىمىن.
جالپى, مەملەكەتتىك قىزمەت جەكە-دارا بولەك دۇنيە ەمەس. كەرىسىنشە, ول – مەملەكەتتىك باسقارۋ جۇيەسىنىڭ وزەگى, ەلدىڭ مەملەكەتتىلىگىن قامتاماسىز ەتىپ, نىعايتاتىن دانەكەر. بۇگىندە قازاقستاندىق مەملەكەتتىك قىزمەت بۇل سالاداعى سەرپىندى رەفورمالارىمەن سيپاتتالۋدا. مۇنى بىرقاتار شەتەلدىك ساراپشىلار دا مويىنداپ وتىر. سويتە تۇرا, بۇل جەتىستىكتەرمەن شەكتەلىپ قالۋعا بولمايدى. بۇگىنگى تاڭدا مەملەكەتتىك قىزمەتتى جەتىلدىرە ءتۇسۋ جولدارى مەن جاڭا تاسىلدەرىن قاراستىرىپ, ىسكە اسىرۋ قاجەت. ءبىر سوزبەن ايتقاندا, جاڭاشا ويلاپ, باتىل قادامدارعا بارۋ كەرەك. سول جاعدايدا عانا ەلباسىمىز “2020 – ستراتەگيالىق جوسپارى” شەڭبەرىندە العا قويعان تاپسىرمالار ۇتىمدى جۇزەگە اساتىن بولادى.
قايرات نۇرپەيىسوۆ, مەملەكەتتىك قىزمەت ىستەرى جونىندەگى اگەنتتىك توراعاسى.