سوڭعى ءۇش ايدا تۇركيانىڭ الانيا قالاسىندا 6 وتانداسىمىز جول اپاتىنا ۇشىراپ, كوز جۇمدى, دەپ حابارلايدى Egemen.kz.
ەسكە سالساق, قايعىلى اپاتتىڭ ءبىرى 13 قازاندا بولدى. سىرتقى ىستەر مينيسترلىگى تۇركيانىڭ الانيا قالاسىندا تاعى ءبىر قازاقستان ازاماتىنىڭ كولىك اپاتىنان كوز جۇمعانىن ءمالىم ەتتى. سۋىت حابار تۋرالى كوز جۇمعان كەلىنشەكتىڭ اعاسى Facebook-تە جازبا قالدىرعان ەدى.
«13 قازاندا قارىنداسىمىز ءاليا قۇلماعامبەتوۆادان ايىرىلىپ قالدىق. جاسى نەبارى 38-دە ەدى. ونىڭ جوسپارى كوپ بولاتىن. ونى الانيانىڭ كەستەل اۋدانىنداعى (تۇركيا) D 400 تاسجولىندا اۆتوكولىك قاعىپ كەتتى. پوليتسيانىڭ ايتۋىنشا, ول جولدى بەلگىلەنگەن بولىكتەن, باعدارشامنىڭ جاسىل ءتۇسى جانعان كەزدە كەسىپ وتكەن. تەرگەۋ جۇمىستارى ءجۇرىپ جاتىر. كولىك تىزگىنىندە جاس قىز بولعانى بەلگىلى بولدى. ونى وقيعانىڭ انىق-قانىعىن انىقتاعانشا ۇيىنە جىبەردى. بۇعان دەيىن ءاليا وسىنداي جول-كولىك وقيعاسىنا كۋا بولعان ەدى. ءتىپتى ول تۋرالى چاتقا دا جازعان. سوندىقتان ءبىز پوليتسيا ايتىپ وتىرعان نۇسقانىڭ دۇرىستىعىنا سەنەمىز. قارىنداسىم جولدى ەرەجەگە ساي كەسىپ وتكەن. تۇرىك باۋىرلار تەرگەۋدى ءادىل جۇرگىزەدى دەپ ۇمىتتەنەمىز», دەپ جازدى مارقۇمنىڭ اعاسى.
«اجال جولىنداعى» تاعى ءبىر قايعىلى وقيعا 30 شىلدە كۇنى بولعان ەدى. ول كەزدە قازاقستاننىڭ 12 ازاماتى مىنگەن شاعىن اۆتوبۋس جول-كولىك وقيعاسىنا ۇشىراعان. الدىن-الا مالىمەت بويىنشا, اۆتوبۋس جۇرگىزۋشىسى جوعارى جىلدامدىقپەن كەلە جاتىپ جۇك كولىگىن سوققان. قاقتىعىس سالدارىنان 12 قازاقستان ازاماتىنىڭ ەكەۋى اۋىرلىعى ورتاشا جاراقات العان. ولارعا وتا جاسالىپ, بارلىق قاجەتتى مەديتسينالىق كومەك كورسەتىلگەنمەن ولار وكىنىشكە قاراي, كوز جۇمدى.
تاعى ءبىر جول اپاتى 3 قىركۇيەكتە بولدى. ول كەزدە 1989 جىلى تۋعان قازاق ءجۋرناليسى ارايلىم باعىتجان مەن ونىڭ 2 جاسار قىزى وقيعا ورنىندا جان تاپسىرعان ەدى. ارايلىم باعىتجاننىڭ 1986 جىلى تۋعان جولداسى اۋرۋحاناعا جەتكىزىلىپ, جانساقتاۋ بولىمىنە جاتقىزىلدى. 7 قىركۇيەك كۇنى ول جانساقتاۋ بولىمىندە كوز جۇمدى. ولاردىڭ 2014 جىلى تۋعان بالاسى امان قالدى.
بۇل تراسسادا كوبىنە تمد ەلدەرىنەن كەلگەندەر اجال قۇشادى. سەبەبى بۇل مەملەكەتتەردە جاياۋ جۇرگىنشى جولاعىنان ءوتىپ بارا جاتقان ادامدارعا ۇنەمى جول بەرىلەدى.