سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ دەپۋتاتتارى اقمولا وبلىسىنداعى اقكول قالاسىندا كوشپەلى وتىرىس وتكىزىپ, «رەسپۋبليكالىق عارىشتىق بايلانىس ورتالىعى» اق ۇجىمىمەن كەزدەستى.
سەنات كوميتەتىنىڭ توراعاسى اندرەي لۋكين ءوز سوزىندە مەملەكەت باسشىسى قاسىم-جومارت توقاەۆ «Digital Bridge» تەحنولوگيالىق فورۋمىندا سويلەگەن سوزىندە 2025 جىلعا دەيىن ەلىمىزدىڭ بارلىق وبلىس ورتالىعىن جاڭا بۋىندى ۇيالى بايلانىسپەن قامتۋ جونىندەگى جۇمىستى مەرزىمىنەن بۇرىن اياقتاۋ مىندەتىن ۇكىمەت الدىنا قويعانىن اتاپ ءوتتى.
«ەلىمىزدىڭ پرەزيدەنتى اۋدان مەن اۋىل تۇرعىندارىنىڭ ينتەرنەتكە قول جەتكىزۋدى قامتاماسىز ەتۋ مىندەتىن قويعان ەدى. وسى ماقساتقا جەتۋ ءۇشىن تومەن وربيتاداعى جەر سەرىگى جۇيەلەرىنىڭ مۇمكىندىكتەرىن پايدالانۋعا باسا نازار اۋدارىلىپ وتىر. سونىمەن قاتار قاجەت بولعان جاعدايدا زاڭناماعا وزگەرىستەر ەنگىزۋ جونىندە باستاما كوتەرەمىز. مەملەكەتتىك جانە كورپوراتيۆتىك قاجەتتىلىكتەرگە وراي جوعارى تالاپتاردى ورىنداۋدا اقپاراتتى بەرۋدىڭ سەنىمدى ءتاسىلى بولىپ قالاتىن گەوستاتسيونارلىق جەر سەرىكتەرىنىڭ ماڭىزدىلىعىن اتاپ وتكەن ءجون», دەپ اتاپ ءوتتى ا.لۋكين.
«رەسپۋبليكالىق عارىشتىق بايلانىس ورتالىعى» اق باسقارما توراعاسى مالىك جۇيرىكتاەۆ ءوز سوزىندە عارىشتىق بايلانىس سالاسىندا جۇرگىزىلىپ جاتقان جۇمىستار تۋرالى ايتىپ بەردى. ماسەلەن, ول بۇگىنگى تاڭدا قازاقستاندا «KazSat» سەريالى ءوزىنىڭ عارىشتىق بايلانىس جۇيەسى جۇمىس ىستەپ تۇرعانىن, ونىڭ قۇرامىندا ەكى جەر سەرىگى مەن عارىش اپپاراتتارىن باسقارۋدىڭ ەكى جەر ءۇستى كەشەنى – «اقكول» جانە «كوكتەرەك» عارىشتىق بايلانىس ورتالىعى بار ەكەنىن جەتكىزدى. قاتىسۋشىلار شارا بارىسىندا تسيفرلىق تەڭسىزدىكتى ەڭسەرۋ, تسيفرلىق قىزمەتتەردى ەكسپورتتاۋ, قولدانىستاعى سپۋتنيكتەردى پايدالانۋ, جەردى قاشىقتىقتان زوندتاۋ جانە باسقا دا ماسەلەلەردى تالقىلادى.
سەناتور ا.لۋكين كوشپەلى وتىرىستى قورىتىندىلاي كەلىپ, ايتىلعان ۇسىنىستار ەسكەرەتىنىن جانە سالانى جەتىلدىرۋ جونىندەگى دەپۋتاتتىق كورپۋستىڭ ۇسىنىمدارى ءتيىستى مەملەكەتتىك ورگاندار مەن ۇكىمەتكە جىبەرىلەتىنىن اتاپ ءوتتى. پارلامەنتشىلەر دە قولدانىستاعى زاڭنامانى جەتىلدىرۋگە جاردەمدەسۋگە دايىن.