ەلىمىزدىڭ جاس تەننيسشىسى ياسمين دۇيسەمباەۆا يسپانيانىڭ سانتا پونسا قالاسىندا 12 جاسقا دەيىنگىلەر اراسىندا وتكەن ەكىنشى ساناتتاعى Tennis Europe ءتۋرنيرىنىڭ چەمپيونى اتاندى.
قازاقستان تەننيس فەدەراتسياسى مالىمەتى بويىنشا, ياسمين فينالدا بولگاريا وكىلى مايا ميحوۆانى 7:5, 6:2 ەسەبىمەن جەڭىپ, باس جۇلدەنى قانجىعاسىنا بايلادى. ال ۇلدار اراسىندا باق سىناعان تاعى ءبىر وتانداسىمىز احمادي ماحانوۆ فينالعا دەيىن جەتكەنىمەن, چەمپيوندىق ماتچتا كورت يەسى توماس مارتينگە جول بەرىپ قويدى – 1:6, 1:6.
ءاحماديدىڭ جەكەلەي سىندا جولى بولماعانىمەن, جۇپتىق سايىستا باعى جاندى. وتانداسى بالقان نۇرداۋلەتپەن بىرگە جۇپ قۇراپ, ءتۋرنيردىڭ سوڭعى باسەكەسىندە سلوۆاكيالىق لەونارد نيپتس پەن ۋكراينالىق ەگور رومانيۋت جۇبىنان ەكى سەتتە 6:1, 6:2 ەسەبىمەن باسىم ءتۇسىپ, تۋرنير جەڭىمپازدارىنىڭ قاتارىنا قوسىلدى.
سونىمەن قاتار قىزدار باسەكەسىنىڭ تاعى ءبىر فينالىندا ويناعان جەرلەسىمىز ادەمى السەيپۋلوۆا نيدەرلاندتىق پيپپا فەننيسپەن بىرگە اقتىق سىندا يسپانيا قىزدارى – پەلاس جانە بەلتراننان باسىم تۇسە المادى – 3:6, 4:6.