باتىس قازاقستان وبلىسىنىڭ قازتالوۆ اۋدانىنا قاراستى اقپاتەر اۋىلىنداعى تاريحي-ولكەتانۋ مۋزەيى جانىنان اۋىلشارۋاشىلىق تەحنيكاسىنىڭ ءتۇر-ءتۇرى قويىلعان كورمە اشىلدى.
اشىق اسپان استىنداعى بۇل ەكسپوزيتسيادا 60-تان اسا تەحنيكا قويىلعان. ولاردىڭ كەيبىرى ءحىح عاسىردىڭ جادىگەرى بولسا, كوپشىلىگى كەڭەستىك كەزەڭدە قولدانىلعان قۇرال-جابدىقتار. ودان بولەك, بۇل جەردە ون ەكى قاناتتى كيىز ءۇي مەن پارتيا كوسەمدەرىنىڭ بيۋست مۇسىندەرى دە كەلۋشىلەردىڭ نازارىن اۋدارادى. اۋىلداعى مۋزەي جانىنان اشىلعان جاڭا كورمەنى باتىس قازاقستان وبلىسىنىڭ اكىمى ناريمان تورەعاليەۆ تە تاماشالاپ كوردى.
– تاۋەلسىزدىگىمىزدى العالى تاريحىمىزدى تۇگەندەپ, وتكەنىمىزگە ورىندى باعاسىن بەرە باستادىق. ازاتتىقتىڭ ارقاسىندا وڭ-سولىمىزدى تانىپ, ەلەۋلى تۇلعالارىمىزدى ۇلىقتاپ جاتىرمىز. اقپاتەردە كەلەشەك ۇرپاققا مۇرا بولار مۋزەي اشىلدى. مۇنداعى قۇندى جادىگەرلەر وتكەندى ۇمىتپاي, بولاشاققا نىق قادام باسۋعا سەپ بولادى, – دەدى ن.تورەعالي ۇلى.
اقپاتەردەگى حالىقتىق مۋزەيدىڭ نەگىزىن قالاعان – اۋىل اقساقالى كارىم وتەعۇلوۆ. 1986 جىلى جوسپارلانىپ, 1992 جىلى ارنايى عيماراتى سالىنعان مۋزەي ۇزاق جىلدان كەيىن, 2013 جىلى ىسكە قوسىلعان ەكەن. تالاي جىل وتسە دە, ماقساتىنان اينىماي, اقىرى مۋزەيدى اشىپ, حالىق نازارىنا ۇسىنعان اقپاتەر اۋىلىنىڭ تۇرعىنى, جاڭاقالا, قازتالوۆ اۋداندارىنىڭ قۇرمەتتى ازاماتى, «قۇرمەت», «پاراسات» وردەندەرىنىڭ يەگەرى كارىم تاجماعانبەت ۇلى وسى كۇنى مادەنيەت جانە اقپارات مينيسترلىگىنىڭ قۇرمەت گراموتاسىمەن ماراپاتتالدى.
باتىس قازاقستان وبلىسى