ماسەلەنىڭ تۇپكى سەبەبى سالاداعى جۇيەلى پروبلەمالاردا ەكەنى انىق – دەپۋتات

ءماجىلىس دەپۋتاتىنىڭ ايتۋىنشا, ازيادا-2023 ويىندارىندا ەلىمىزدىڭ كورسەتكىشى كوڭىلىمىزگە قاياۋ ءتۇسىردى. بۇل تۇستا دەپۋتات سپورتشىلاردى داتتاۋدىڭ قاجەتى جوق ەكەنىن ايتىپ, بارىن سالعان سپورتشى ۇل-قىزدارعا العىس ءبىلدىردى.

«10 عانا التىن مەدال العان ەل قۇراماسىنىڭ كورسەتكىشى سپورت جانكۇيەرلەرىنىڭ كوڭىلىنەن شىقپادى. ءتورت جىلدا ءبىر رەت كەلەتىن ازيا دوداسى ءبىز ءۇشىن ءساتسىز اياقتالدى», دەپ قىنجىلدى دەپۋتات.

ونىڭ ايتۋىنشا, بۇرناعى جىلدارى بولعان ازيادالاردىڭ ناتيجەلەرىندە ۇلتتىق قۇراما قورجىنىنا كەمىندە 15 التىن مەدال ءتۇسىپ وتىردى, قازاق سپورتشىلارى ۇزدىك وندىقتان تۇسپەي, ءاردايىم ءتورتىنشى, بەسىنشى ورىنداردى يەمدەنىپ كەلگەن. ال بيىل كورسەتكىش الدەقايدا تومەن.

ء«بىز ءتىپتى, سولتۇستىك كورەيا, تايلاند, باحرەين سەكىلدى شاعىن ەلدەردەن دە ارتتا قالىپ قويدىق. ارينە, ماسەلەنىڭ تۇپكى سەبەبى وسى سالاداعى جۇيەلى پروبلەمالاردا ەكەنى انىق. وسى ازيا ويىندارىنا 530-دان استام سپورتشى قاتىستى, وعان ۇيىمداستىرۋشىلار, باپكەرلەر, فەدەراتسيا مۇشەلەرىن قوسقاندا مىڭداعان ازامات باردى. سان بار, ساپا قايدا؟ ءبىزدى كۇيرەتىپ جاتقان نە ماسەلە؟», دەدى ءماجىلىس دەپۋتاتى.

كەشە عانا مەملەكەت باسشىسى ازيادا قورىتىتىندىسى بويىنشا سپورت سالاسىن اششى سىنعا الىپ: «اشىعىن ايتۋىمىز كەرەك, ناتيجەمىز مەملەكەتتەن ءبولىنىپ جاتقان قاراجاتتىڭ بارىنشا ءتيىمدى جۇمسالمايتىنىن كورسەتەدى. بۇنداي جاعدايعا جول بەرۋگە بولمايدى. سپورت سالاسىنا تۇبەگەيلى وزگەرىستەر, ياعني رەفورما قاجەت. ءتيىستى مينيسترلىك وسى ماسەلەنى جان-جاقتى قاراۋ كەرەك, سپورتتى دامىتۋدىڭ مۇلدە جاڭا جولدارى قاجەت», دەگەن پرەزيدەنت ءسوزىن تىلگە تيەك ەتكەن د.قاسقاراۋوۆ بىرنەشە ماسەلەنى ايتا كەتتى. ولار:

1) سوڭعى جىلدارى سپورت مينيسترلىگىن مۇلدەم سپورتقا قاتىسى جوق كاسىبي سپورتتى تەك تەلەديداردان كورەتىن لاۋازىمدى شەندىلەر باسقارىپ كەلدى.

2) سپورت ۇيىمدارى, مينيسترلىك, ۇلتتىق وليمپيادا, فەدەراتسيا ارالارىندا ءوزارا بايلانىس جوق.

3) بىزدە بىتپەيتىن لەگيونەرلەردىڭ جىرى. ەلىمىزدە ۇزدىك ناتيجەگە قول جەتكىزۋ ءۇشىن بارىنشا ەڭبەك ەتۋگە دايىن ءوز سپورتشىلارىمىز جەتەرلىك. لەگيونەرلەرگە يەك ارتا بەرمەي, ءوزىمىزدىڭ سپورتشىلارىمىزعا جول اشۋ كەرەك.

4) اۋىلداردا كاسىبي سپورت جوق دەۋگە بولادى, دارىندىلار جەتەدى, بىراق ينفراقۇرىلىم جوق, سەبەبى جاعداي جاسالماعان.

«اشىعىن ايتقاندا مەملەكەتتەن ءبولىنىپ جاتقان قاراجات ورىنسىز جۇمسالىپ جاتىر. ايلىعى شايلىعىنان ارتىلمايتىن باپكەرلەر, سپورت ماماندارى, سپورتشىلاردان ۇزدىك ناتيجە كۇتۋ ءۇشىن قاجەتتى جاعداي قاشان جاسالادى؟», دەپ ءسوزىن اياقتادى دانيار قاسقاراۋوۆ.