كاسىپقوي بوكسشى مەيىرىم نۇرسۇلتانوۆ بۇكىلالەمدىك بوكس ۇيىمىنىڭ (WBO) نۇسقاسى بويىنشا ورتا سالماقتاعى 2023 جىلدىڭ ۇزدىك بوكسشىسى دەپ تانىلدى. بۇل تۋرالى اتالعان ۇيىمنىڭ دومينيكان رەسپۋبليكاسىندا وتكەن كونفەرەنتسياسىندا ءمالىم بولدى.
2016 جىلدان بەرى كاسىپقوي بوكستا جۇدىرىقتاسىپ كەلە جاتقان وتانداسىمىز بۇگىنگە دەيىن 19 جەكپە-جەك وتكىزىپ, 11 قارسىلاسىنان مەرزىمىنەن بۇرىن باسىم تۇسكەن. ول وسى جىلدىڭ ءساۋىر ايىندا وڭتۇستىك كورەيادا جەڭىلىستىڭ كەرمەك ءدامىن تاتپاعان جاپونيالىق كادزۋتو تاكەساكونى سەگىزىنشى راۋندتا تەحنيكالىق نوكاۋتپەن جەڭگەن ەدى.
قازىرگى تاڭدا جەرلەسىمىز كاسىپقوي بوكستاعى ەڭ ماڭىزدى ءتورت بەلبەۋدىڭ ىشىندە WBC نۇسقاسى بويىنشا – ەكىنشى, IBF بويىنشا – بەسىنشى, ال WBO باعىتى بويىنشا ءۇشىنشى ساتىعا جايعاسقان. سونىمەن قاتار بوكسشىلاردىڭ ستاتيستيكاسىن جۇرگىزەتىن «BoxRec» باسىلىمىنىڭ مالىمەتىنە سايكەس, م.نۇرسۇلتانوۆ ءدال قازىرگى تاڭدا قازاقستانداعى ەڭ مىقتى بوكسشىلاردىڭ كوشىن باستاپ تۇر.