قازاق ۇلتتىق قىزدار پەداگوگيكالىق ۋنيۆەرسيتەتىندە ساباق بەرۋ ءۇشىن كونيا قالاسىنان ارنايى باعدارلامامەن كەلگەن تاريح عىلىمدارىنىڭ دوكتورى مۇستافا دەميرجي قازاق ءتىلىن ۇيرەنۋدى باستاعان. بۇل تۋرالى عىلىم جانە جوعارى ءبىلىم مينيسترلىگىنىڭ ءباسپاسوز قىزمەتىنەن ءمالىم بولدى, دەپ حابارلايدى Egemen.kz.
تۇركيانىڭ توپ 10 ۋنيۆەرسيتەتتەرىنىڭ قاتارىنا كىرەتىن سەلدجۋك ۋنيۆەرسيتەتىنىڭ پروفەسسورى تاريح كافەدراسىنىڭ ستۋدەنتتەرىنە «وركەنيەتتەر تاريحى», «يسلام وركەنيەتىن زەرتتەۋدەگى نەگىزگى ماسەلەلەر», «تۇركىستانداعى ساياسي جاعداي جانە مۇسىلمانداردىڭ ورتا ازيانى جاۋلاپ الۋى» سەكىلدى وزەكتى تاقىرىپتار بويىنشا سەمينارلار وقىپ ءجۇر. دارىستەر تەك اعىلشىن تىلىندە ءوتىپ جاتىر. الايدا, پروفەسسور ستۋدەنتتەرمەن سويلەسۋ بارىسىندا قازاق ءتىلىن ۇناتىپ, ونى قىزىعۋشىلىقپەن ۇيرەنۋدى باستاپ كەتكەن.
ايتا كەتسەك, اراب, اعىلشىن, فرانتسۋز, پارسى تىلدەرىندە ەركىن سويلەيتىن مۇستافا دەميرجي قازاق ۇلتتىق قىزدار پەداگوگيكالىق ۋنيۆەرسيتەتىنە كەلگەن كۇننەن باستاپ ءبىر اي ىشىندە قازاق تىلىندە تازا سويلەۋدى الدىنا ماقسات ەتىپ قويعان ەكەن.
سونداي-اق تاريح عىلىمىن زەرتتەۋدە 28 جىلدىق تاجىريبەسى بار پروفەسسور اتالعان وقۋ ورنىنداعى جۇمىسى بارىسىندا پروفەسسورلىق-وقىتۋشى قۇراممەن بىرلەسكەن حالىقارالىق جوبالاردى جاساۋ جاعىن دا قاراستىرادى.