شاحمات الەمىندە جەڭىلىستىڭ كەرمەك ءدامىن از تاتقان سپورتشىلار نەكەن-ساياق. سولاردىڭ قاتارىندا 16 دۇركىن الەم چەمپيونى, بيىلعى الەم كۋبوگىنىڭ يەگەرى داڭقتى نورۆەگيالىق شاحماتشى ماگنۋس كارلسەن بار. الدىنا كەلگەن قارسىلاسىن بەت قاراتپاي جەڭەتىن كارلسەن بىرەر كۇن بۇرىن قاتاردا ءوتىپ جاتقان حالىقارالىق تۋرنيردە تاعى ءبىر مارتە جەڭىلدى. الەمدىك شاحمات جۇلدىزىن بۇل جولى قازاق بالاسى الىشەر سۇلەيمەنوۆ قاپى قالدىردى.
بۇل كۇندەرى قاتار استاناسى دوحادا شاحماتتان «Qatar Masters Open» ءتۋرنيرى ءوتىپ جاتىر. الەمنىڭ ەڭ مىقتى شاحماتشىلارى جينالعان حالىقارالىق جارىستىڭ ەكىنشى كەزەڭىندە وتانداسىمىز الىشەر سۇلەيمەنوۆ اتى اڭىزعا اينالعان شاحمات شەبەرى ماگنۋس كارلسەنمەن وي جارىستىرىپ, قارسىلاسىن قاپى قالدىردى. بۇل ماگنۋس كارلسەننىڭ كارەراسىنداعى 15-ءشى جەڭىلىس بولىپ تىركەلدى. كارلسەن ءوزىنىڭ شاحمات جولىندا ەلىمىزدىڭ سپورتشىلارىمەن ءۇش رەت ويناپ, تەك رينات جۇماباەۆپەن عانا بليتس شاحماتتا تەڭ تۇسكەن ەكەن. ال پاۆەل كوتسۋر, مۇرتاس قاجعاليەۆ جانە ءانۋار يسماعامبەتوۆتەرمەن بولعان ويىندا كارلسەن جەڭىسكە جەتكەن.
سپورتتى دامىتۋ ديرەكتسياسىنىڭ مالىمەتى بويىنشا, ۇلتتىق قۇراما ويىنشىسى نورۆەگيالىق شاحماتشىعا قارسى اق ءتۇستى فيگۋرالارمەن ونەر كورسەتتى. ماتچتى ءساتسىز باستاعان الەم رەيتينگىنىڭ كوشباسشىسى 31 جۇرىستەن كەيىن جەڭىلگەنىن مويىندادى. 23 جاستاعى الىشەر – پاۆلودار شاحمات مەكتەبىنىڭ تۇلەگى. قاتارداعى جارىستا الىشەردەن بولەك, وتانداستارىمىزدان رينات جۇماباەۆ, قازىبەك نوگەربەك, ءبيبىسارا اساۋباەۆا, الۋا نۇرمانوۆا باق سىناپ جاتىر.
رينات 2-تۋردا ۇندىستاندىق شيامنيحيلدى جەڭسە, قازىبەك وزبەكستاندىق جاۆوحير سينداروۆقا جول بەردى. ءبيبىسارا اساۋباەۆا وزبەكستاندىق حۋمويۋن بەگمۋراتوۆتان باسىم بولسا, الۋا نۇرمانوۆا ۇندىستاندىق پاننەرسەلۆام ينيانمەن تەڭ ءتۇستى. قازىر الىشەر مەن رينات قانا جەڭىلىسسىز كەلە جاتىر.