جاڭگىر حانداي جاڭاشىل ۋنيۆەرسيتەت

1963 جىلى باتىس قازاقستان اۋىلشارۋاشىلىق ينستيتۋتى بولىپ اشىلعان وقۋ ورنى 1996 جىلى باتىس قازاقستان اگرارلىق ۋنيۆەرسيتەتى بولىپ قايتا قۇرىلدى. 2000 جىلى وقۋ ورىندارى ىرىلەندىرىلگەن كەزدە باتىس قازاقستان مەملەكەتتىك ۋنيۆەرسيتەتىنىڭ قۇرامىنا كىردى. ال 2002 جىلى قايتادان جەكە ءبولىنىپ شىعىپ, باتىس قازاقستان اگرارلىق-تەحنولوگيالىق ۋنيۆەر­سي­تەتى اتىنا يە بولدى. 2003 جىلى ۋنيۆەرسيتەتكە جاڭگىر حاننىڭ ەسىمى بەرىلدى. بۇگىندە مۇندا ەلىمىزدىڭ ءار وڭىرىنەن 4 مىڭنان اسا ستۋدەنت ءبىلىم الىپ ءجۇر.

ارينە, الپىس جىلدىق جىلناماسى بار وقۋ ورنىنىڭ تاريحى التى اۋىز سوزگە سىيمايدى. جاڭگىر حان ۋنيۆەرسيتەتى ءوز تاريحىندا سان مىڭداعان كاسىبي مامان دايىندادى. ولاردىڭ كوپشىلىگى باتىس قازاقستان وبلىسىندا جانە باسقا وڭىرلەردە اگرارلىق-تەحنيكالىق, ەكولوگيالىق باعىت بويىنشا قىزمەت ەتىپ ءجۇر. كوپتەگەن تۇلەك ءىرى ءوندىرىس ورىندارىندا ەڭبەك ەتىپ, كوپشىلىگى العان ءبىلىمى ارقىلى مانساپ ساتىسىندا ىلگەرى جىلجىدى, جەتەكشى مامان رەتىندە جوعارى لاۋازىمدارعا تاعايىندالدى. ۋنيۆەرسيتەتتە شىڭدالعان عالىمدار دا ءبىر توبە. وسى ۇجىمدا 2005 جىلدان بەرى قىزمەت ەتىپ كەلە جاتقان پروفەس­سور, تەحنيكا عىلىمدارىنىڭ دوكتورى سارسەنبەك مونتاەۆ – الەم­دە­گى ەڭ بەدەلدى عالىمدار تىزىمىنە ەن­گەن ساناۋلى قازاقتىڭ ءبىرى. جاڭگىر حان ۋنيۆەرسيتەتىنىڭ ين­دۋس­­تريالدى-تەحنولوگيالىق ينس­­­تي­تۋتىن باسقاراتىن سار­سەن­بەك­ الياكبار ۇلىنىڭ ءىزباسار شاكىرت­­تەرى دە از ەمەس.

بۇگىندە ۋنيۆەرسيتەت 48 ما­مان­­دىق بويىنشا جوعارى, 45 ما­­­ماندىق بو­يىنشا جوعارى وقۋ ورنىنان كەيىنگى ءبىلىم بەرەدى. 14 باعىت بويىنشا ماگيستراتۋرا, 5 باعىتتا دوكتورانتۋ­را باعدارلاماسى تاعى بار. ۋني­ۆەر­سيتەتتىڭ اسكەري كافەدراسىندا 2001 جىلدان بەرى 3114 زاپاستاعى لەيتەنانت جانە 835 زاپاستاعى سەرجانت دايارلانعان. بۇگىندە ولاردىڭ 80-نەن استامى قارۋلى كۇشتەر قاتارىندا وفيتسەرلىك لاۋازىمدا قىزمەت ەتەدى.

ارينە, وقۋ ورنىنىڭ ءار جەتىستىگى ءتيىمدى باسقارۋدىڭ جانە ساپالى وقىتۋشىلار قۇرا­مىنىڭ ەڭبەگى ەكەنى داۋسىز. ۋنيۆەرسيتەتتە 344 پروفەسسور-وقىتۋشى جەمىستى قىزمەت اتقارىپ ءجۇر. ونىڭ ىشىندە 12 پروفەسسور, 15 عىلىم دوكتورى, 25 دوتسەنت, 70 عىلىم كانديداتى, 47 PhD جانە 400-گە جۋىق قىزمەتكەر بار. ۋنيۆەرسيتەت 2010 جىلدان بەرى رەسەيدىڭ ۋفا مەملەكەتتىك مۇناي تەحنولوگيالىق ۋنيۆەرسيتەتىمەن ىنتىماقتاستىق ورناتىپ, ءوز ستۋدەنتتەرىنە قوس ديپلوم الىپ شىعۋىنا مۇمكىندىك جاسادى.

ۋنيۆەرسيتەت جانىنداعى روبوتتەحنيكا, يحتيولوگيا جانە اكۆاكۋلتۋرا زەرتحانالارى دا ەرەكشە باعىتتاعى, سۇرانىسقا يە قۇرىلىمنىڭ ءبىرى. روبوتتەحنيكا زەرتحاناسىندا ستۋدەنتتەر مەن زەرتتەۋشىلەر اگرارلىق سالاعا قاجەتتى اۆتونومدى جۇيەلەر مەن روبوت­تاردى دايىنداۋمەن اينالىسادى. ال يحتيولوگيا زەرتحاناسىندا بۇگىندە وتە وزەكتى بولىپ وتىرعان سۋ رەسۋرستارىن ساقتاۋ مەن تۇراقتى پايدالانۋ, بالىق پوپۋلياتسياسىن زەرتتەۋ, بالىق ءوسىرۋ ادىستەرىن ازىرلەۋ, اكۆاكۋلتۋرانى دامىتۋ جانە ەكولوگيالىق تەپە-تەڭدىكتى ساقتاۋ داعدىسى تەو­ريا جانە تاجىريبەمەن جىمداسا جۇرەدى.

جاڭگىر حان ۋنيۆەرسيتەتىندە ءبىلىم الۋشىلاردىڭ الەۋمەتتىك دامۋىن قامتاماسىز ەتۋگە ەرەكشە كوڭىل بولىنەدى. ۋنيۆەرسيتەت اۋماعىندا 2140 ورىندىق ءتورت ستۋدەنتتىك ءۇي بار. ياعني ستۋدەنتتەر پاتەر ىزدەپ سابىلمايدى. ستۋدەنتتىك ۇيلەر ۋنيۆەرسيتەت اۋماعىندا, ىڭعايلى جەردە ورنالاسقان. 352 ورىندىق 9 قاباتتى جاتاقحانا 1989 جىلى پايدالانۋعا بەرىلدى. ال 2011 جىلى پايدالانۋعا بەرىلگەن جاڭا ۇلگىدەگى توعىز قاباتتى ستۋدەنتتەر ۇيىندە ءبىلىم الۋشىلار ءۇشىن بارلىق جاعداي جاسالعان. جەتىم بالالار, مۇگەدەكتەر جاتاقحانادا تەگىن تۇرادى. سونداي-اق مۇندا جاتاقحانادا تۇرۋدىڭ جىلدىق قۇنى دا ەل بويىنشا ەڭ ارزان. وقۋ زالى, دەمالىس ايماعى, ەلەكتروندى وقۋلىقتارى بار كومپيۋتەرلىك سىنىپ, اسحانا, تۇرمىستىق ءۇي-جايمەن قامتىلعان جاتاقحانالاردا جايلى ءومىر ءسۇرۋ جانە ءبىلىم الۋ ءۇشىن بار جاعداي جاسالعان.

وتكەن جۇما كۇنى جاڭگىر حان ۋنيۆەرسيتەتىندە 60 جىلدىق مەرەيتويى اياسىنداعى ايتۋلى ءىس-شارانىڭ ءبىرى ءوتتى. وقۋ ورنىنىڭ تۇلەكتەرى مەن قامقورشىلار قاۋىمداستىعى باس قوستى. جيىنعا باتىس قازاقستان وبلىسىنىڭ اكىمى ناريمان تورەعاليەۆ ارنايى كەلدى.

– بۇگىنگى ءىس-شاراعا جينال­عانداردىڭ ىشىندە 40 جىل بۇرىن بىتىرگەن تۇلەكتەرىمىز دە بار ەكەن. ولاردىڭ بارلىعى دا ءتۇرلى سالادا تابىسقا جەتكەن ازاماتتار. جاڭگىر حان ۋنيۆەرسيتەتى قازىرگى ۋاقىتتا كاسىبي بىلىكتى كادرلار دايارلاۋمەن قاتار جاڭا تەحنولوگيانى, عىلىمي جاڭالىقتاردى جۇزەگە اسىرۋمەن دە تانىمال. ساپالى مامان دايارلاۋ باعىتىنداعى ءىسىمىزدى ودان ءارى جەتىلدىرۋ ءۇشىن تۇلەكتەر مەن قامقورشىلاردىڭ باسىن قوسا وتىرىپ, ارىپتەستىك بايلانىسىمىزدى ودان ءارى نىعايتساق دەيمىز, – دەدى ۋنيۆەرسيتەتتىڭ باسشىسى اسقار نامەتوۆ.

ۋنيۆەرسيتەت ۇجىمىن مەرەيتويمەن قۇتتىقتاعان وبلىس اكىمى جوعارى وقۋ ورنىنىڭ اتاۋى قازاقتىڭ التىن بەسىگى – اۋىل­مەن بايلانىستى ەكەنىن اتاپ ءوتتى. بوكەي ورداسىنىڭ سوڭعى حانى, جاڭاشىل بيلەۋشى جاڭگىر حاننىڭ ەسىمىن يەلەنگەن وقۋ ورداسى – بۇگىندە ەلىمىزدىڭ جەتەكشى ۋنيۆەرسيتەتتەرىنىڭ ءبىرى.

– ءبىلىم ساپاسىن قامتاماسىز ەتۋ جونىندەگى تاۋەلسىز اگەنتتىك 2022 جىلى جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتى ەلىمىز­دەگى جەتەكشى تەحنيكالىق ۋنيۆەرسيتەتتەر رەيتينگىندە 4-ورىن­دا دەپ جاريالادى. بۇل – ۇلكەن جەتىستىك. ۋنيۆەرسيتەت ءوز تۇلەك­تەرىمەن ماقتانادى. بۇگىنگى زالدا وتىرعان تۇلەكتەردىڭ باسىم بولىگى – ءوز سالاسىندا تابىستى, ۇلكەن جەتىستىككە جەتكەن, ومىرلىك تاجىريبەسى بار بىلىكتى تۇلعالار. قازىرگى تاڭدا اقجايىق ءوڭىرى ەكونوميكاسىنىڭ بارلىق سالاسىندا ەڭبەك ەتىپ جۇرگەن ماماندار جاڭگىر حان ۋنيۆەرسيتەتىندە ءبىلىم العانىن ماقتانىشپەن ايتىپ جۇرەمىز, – دەدى ن.تورەعاليەۆ.

ۋنيۆەرسيتەت تۇلەگى, ءماجىلىس دەپۋتاتى سەرىك ەگىزباەۆ تا وقىتۋشىلار مەن ءبىلىم الۋشىلاردى قۇتتىقتاپ, ىزگى تىلەگىن جەتكىزدى.

ايتا كەتەيىك, ۋنيۆەرسيتەت جانىنان قۇرىلعان تۇلەكتەر مەن قامقورشىلار قاۋىمداستىعى بەلسەندى جۇمىس ىستەپ تۇر. ونىڭ جەتەكشىسى, مانساپ جانە بيزنەس-سەرىكتەستىك ورتالىعىنىڭ ديرەكتورى زامزاگۇل سۇلتانوۆا تۇلەكتەرمەن جانە جۇمىس بەرۋ­شىلەرمەن ەتەنە بايلانىس ورنات­­­قان. قازىرگى ۋاقىتتا ۋنيۆەرسيتەت ءوڭىردىڭ 230-دان اسا بەيىندى كاسىپورنىمەن سەرىكتەس. تاڭداۋلى ستۋدەنتتەر وسى كومپانيالاردا تاعىلىمدامادان ءوتىپ, كەيىن تۇراقتى جۇمىسقا دا ورنالاسۋىنا مۇمكىندىك جاسالعان. بۇل ءۇردىس ەكى جاققا دا ءتيىمدى بولىپ تۇر. تۇلەكتەر فورۋمىندا ءسوز العان ورال ترانسفورماتور زاۋىتىنىڭ باسقارۋشى ديرەكتورى داۋرەن تۇرلىبەكوۆ, «Shell Kazakhstan» كومپانياسىنىڭ مەنەدجەرى رينات حۇسايىنوۆ, «بەلەس» كومپانيالار توبىنىڭ باس ديرەكتورى مۇرات جاكىباەۆ, «قازاقستان حالىق بانكىنىڭ» وبلىستىق فيليالىنىڭ ديرەكتورى يگور ستەكسوۆ جاڭگىر حان ۋنيۆەرسيتەتىنىڭ كادرلار دايارلاۋداعى الەۋەتى جوعارى ەكەنىن ايتتى.

باتىس قازاقستان وبلىسى