پرەمەر-مينيستر ءاليحان سمايىلوۆ شىمكەنت قالاسىنىڭ 2035 جىلعا دەيىنگى جاڭا باس جوسپارىن بەكىتۋ جونىندەگى قاۋلىعا قول قويدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
«ەلىمىزدىڭ ءىرى ونەركاسىپ, ساۋدا جانە مادەني ورتالىقتارىنىڭ ءبىرىن كەشەندى دامىتۋ اياسىندا تۇرعىن ءۇي قۇرىلىسىنىڭ كولەمى ۇلعايادى, جاڭا ءوندىرىس ايماقتارى, اينالما ت/ج تارماعى جانە وتكىزۋ قابىلەتى تاۋلىگىنە 20 مىڭ جولاۋشى بولاتىن ۆوكزال اشىلماق. ونەركاسىپ اۋماقتارىن جاڭعىرتۋ ماسەلەلەرىنە كوپ كوڭىل بولىنەدى. ولاردىڭ اۋماعىن 2035 جىلعا دەيىن جاڭا يندۋستريالىق ايماقتاردى سالۋ ەسەبىنەن 5 مىڭ گەكتارعا ۇلعايتۋ جوسپارلانىپ وتىر. وندا پەرسپەكتيۆالى 14 ونەركاسىپ كلاستەرى داميتىن بولادى. قابىلدانعان شارالاردىڭ ناتيجەسىندە 2035 جىلعا قاراي قالانىڭ الەۋمەتتىك-ەكونوميكالىق سالالارىندا 1 ملن-نان استام جۇمىس ورنى بولادى», دەپ جازىلعان قاۋلىدا.
ەلىمىزدەگى ءۇشىنشى مەگاپوليستى دامىتۋ جونىندەگى باس جوسپاردا بادام, قوشقاراتا, قاراسۋ جانە سايرامسۋ وزەندەرىنىڭ سۋ قورعاۋ بەلدەۋلەرى مەن ايماقتارىنىڭ جوبالارى ازىرلەنەتىنى دە جازىلعان.
شىمكەنت قالاسىنىڭ تۇرعىندارىنا اقپاراتتىق-كوممۋنيكاتسيالىق قىزمەتتەردىڭ كەڭ سپەكترىن ۇسىنۋعا مۇمكىندىك بەرەتىن Next Generation Network تەحنولوگياسىن پايدالانا وتىرىپ, تەلەكوممۋنيكاتسيالىق جەلىلەردى كەڭەيتۋ جانە جاڭعىرتۋ ماسەلەلەرى جەكە قارالادى.