اقمولا وبلىسىنىڭ 21 جاستاعى تۇرعىنى ەسىرتكى زەرتحاناسىن ۇيىمداستىردى دەگەن كۇدىكپەن ۇستالدى, دەپ حابارلايدى Egemen.kz ىشكى ىستەر مينيسترلىگىنىڭ ءباسپاسوز قىزمەتىنە سىلتەمە جاساپ.
«اقمولا وبلىسىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى «قاراسورا – 2023» رەسپۋبليكالىق جەدەل الدىن الۋ ءىس-شاراسى اياسىندا ارنايى وپەراتسيا جۇرگىزۋ بارىسىندا بۋراباي اۋدانىنىڭ اۋماعىندا سينتەتيكالىق ەسىرتكى دايىنداۋ بويىنشا ەسىرتكى زەرتحاناسىن انىقتاپ, جويدى. جەدەل ۋاكىلدەر زەرتحانانى اۋدان ورتالىعىنا ىرگەلەس اۋىلداردىڭ بىرىندە ءۇي ساتىپ الىپ, ءوز ءوندىرىسىن جاساعان 21 جاستاعى جەرگىلىكتى تۇرعىن ۇيىمداستىرعانىن انىقتادى. ەسىرتكى زەرتحاناسىنىڭ ورنى بويىنشا رۇقسات ەتىلمەگەن ءتىنتۋ ءىس-شارالارى بارىسىندا ەسىرتكى قۇرالدارىن, 430 ليتر پرەكۋرسوردى دايىنداۋعا ارنالعان جابدىق, سونداي-اق سالماعى 755,88 گرامم a-PVP پسيحوتروپتىق زات تاركىلەندى, ولار اۋدان اۋماعىنداعى جاسىرىن ورىنداردان الىندى», دەپ جازىلعان حابارلامادا.
كۇدىكتى ءۇيلى-باراندى, ءبىر بالاسى بار. ايەلى كۇيەۋىنىڭ جاسىرىن زەرتحانادا ەسىرتكى وندىرۋمەن شۇعىلداناتىنىن بىلمەيتىن بولىپ شىقتى. بۇرىن ەسىرتكى زاتتارىن جەتكىزىپ بەرىپ, ءتيىستى ورىندارعا قويىپ كەتۋ قىزمەتىن اتقارىپ, بەرتىن كەلە «كاسىبى جوعارىلاپ» وندىرۋمەن شۇعىلدانعان. ونىڭ ۇستىنەن قر قك-ءنىڭ 297-بابى 1-بولىگى بويىنشا سوتقا دەيىنگى ءىس جۇرگىزىلىپ جاتىر, كۇدىكتى ۋاقىتشا ۇستاۋ يزولياتورىنا قامالدى.