ەلوردادا ءتۇرلى ەتنوس وكىلدەرىنىڭ قاتىسۋىمەن دەبات ءوتتى. «ەل بىرلىگى» اتاۋىمەن ۇيىمداستىرىلعان پىكىرسايىسقا 20 كوماندا قاتىستى. جان-جاقتان جيىلعان جاستار ەكى كۇن بويى اسسامبلەيانىڭ كۋبوگىنە تالاستى.
ءتۋرنيردىڭ ماقساتى – جاستاردىڭ زياتكەرلىك الاڭىن قۇرۋ جانە ولاردىڭ مەملەكەت باسشىسىنىڭ جولداۋىن جۇزەگە اسىرۋدا, ناسيحاتتاۋداعى بەلسەندىلىگىن ارتتىرۋ. سونداي-اق ءىس-شارا قوعامدىق كەلىسىم مەن جالپىۇلتتىق بىرلىكتى نىعايتۋدى كوزدەدى. ىزگى ىسكە قازاقستان حالقى اسسامبلەياسى مەن «اسسامبلەيا جاستارى» رەسپۋبليكالىق قوعامدىق بىرلەستىگى جانە «ۇلتتىق پىكىرسايىس فەدەراتسياسى» رەسپۋبليكالىق قوعامدىق بىرلەستىگى ۇيىتقى بولدى.
– دەباتتا پىكىرسايىستىڭ ءتۇرلى فورماتى قولدانىلدى. اتاپ ايتساق, امەريكالىق, بريتاندىق جانە پرەزيدەنتتىك فورمات. تارتىستى باسەكەگە بارلىعى 40 ادام قاتىستى. بۇل ءتۋرنيردىڭ ەرەكشەلىگى – ءار 20 كوماندانىڭ ءبىر وكىلى باسقا ەتنوستان بولۋى مىندەتتەلدى ءارى ءىس-شارا تولىقتاي قازاق تىلىندە ءوتتى. ويىن بارىسىنا 10 ادام تورەلىك ەتتى, – دەدى ۇلتتىق پىكىرسايىس فەدەراتسياسىنىڭ پرەزيدەنتى بەك-مۇحامەد جاۋكەباەۆ.
رەسپۋبليكا كۇنىنە وراي ۇيىمداستىرىلعان پىكىرسايىسقا جاساندى ينتەللەكتىدەن كەلەتىن قاۋىپ قاتەر مەن نەيروجەلىلەردى قارجىلاندىرۋ تاقىرىپتارى نەگىز بولدى. تۋرنير اياسىندا قاتىسۋشىلار پارلامەنت سەناتىنىڭ توراعاسى ماۋلەن اشىمباەۆ جانە اسسامبلەيا توراعاسىنىڭ ورىنباسارى – حاتشىلىق مەڭگەرۋشىسى مارات ازىلحانوۆپەن كەزدەستى. پالاتا توراعاسى تالانتتى جانە ءبىلىمدى جاستاردى قولداۋدىڭ ماڭىزى زور ەكەنىن ايتتى.
– جاس بۋىن ەلدى جاڭعىرتۋ جانە ادىلەتتى قازاقستان قۇرۋ ىسىندە قوزعاۋشى كۇش رەتىندە ايرىقشا ءرول اتقارادى. سوندىقتان مەملەكەت باسشىسى ءوز جولداۋىندا ەلىمىزدە ءبىلىم بەرۋ ساپاسىن ارتتىرۋ ماسەلەسىنە ۇنەمى باسا ءمان بەرىپ كەلەدى. «ەل بىرلىگى» دەبات سايىسىن وتكىزۋ مەملەكەتتىك ءتىلدى دامىتۋعا جانە ونىڭ قولدانىلۋ اياسىن كەڭەيتۋگە ايتارلىقتاي ۇلەس قوسادى. سەنات تاراپىنان مۇنداي باستامالارعا ءاردايىم قولداۋ كورسەتەمىز. قازاقستان حالقى اسسامبلەياسىنان سايلانعان سەناتورلار دا بۇل باعىتتا بەلسەندى جۇمىس ىستەيدى. ويتكەنى ەل بىرلىگىن نىعايتۋ جانە مەملەكەتتىك ءتىلدىڭ ۇلتتى ۇيىستىرۋشى ءرولىن ارتتىرۋ ارقىلى قوعامدىق كەلىسىمدى ساقتاۋ – ءبىزدىڭ ورتاق ماقساتىمىز, – دەدى ماۋلەن اشىمباەۆ.
سونداي-اق سەنات توراعاسى پالاتانىڭ جاستاردى قولداۋ باعىتىندا اتقارىپ كەلە جاتقان جۇمىستارىنا توقتالدى. مەملەكەتتىك باسقارۋ ىسىنە جاس بۋىندى تارتۋدىڭ, ءتيىستى جوبالار مەن زاڭناماعا وزگەرىستەر ەنگىزۋ ارقىلى ولاردىڭ ازاماتتىق الەۋەتىن جانداندىرۋدىڭ ماڭىزدىلىعىنا دا نازار اۋداردى. بۇعان قوسا ول سەنات جانىنداعى جاس ساراپشىلار كلۋبىنىڭ جانە تالداۋ مەكتەبىنىڭ قىزمەتىنە شولۋ جاسادى.
جالپى, اسسامبلەيا مۇنداي پىكىرسايىس ءتۋرنيرىن العاش رەت ۇيىمداستىرعان. رەسپۋبليكالىق دەبات قورىتىندىسىندا ءى ورىن داۋلەت نۇركەن مەن ەلينا امۋرلاەۆاعا بۇيىردى. جۇلدەلى ءىى ورىندى جاقسىلىق بەكحان مەن تۋرسۋنحودجاەۆ بوحرومجان الدى. ءىىى ورىندى سلامبەك ەلەمەس پەن ديانا حابيبۋلينا مىسە تۇتتى. بۇدان بولەك اسەت احمەدوۆ «ۇزدىك مەديا» اتالىمىن جەڭسە, يساحان نۇرباقىت «ۇزدىك سپيكەر» دەپ تانىلدى. جۇزدەن جۇيرىك, مىڭنان تۇلپار اتانعاندارعا ماقتاۋ قاعازدارى مەن باعالى سىيلىقتار ۇلەستىرىلدى.