بۇل تۋرالى پرەزيدەنت قاسىم-جومارت توقاەۆ قىرعىزستاننىڭ بىشكەك قالاسىندا ءوتىپ جاتقان تمد-عا مۇشە مەملەكەتتەر باسشىلارى كەڭەسىنىڭ وتىرىسىندا ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
كەڭەس وتىرىسىندا قاسىم-جومارت توقاەۆ تۋىندايتىن سىن-قاتەرلەردى ەڭسەرۋگە, تابىستى ىنتىماقتاستىقتى نىعايتۋ ءۇشىن جاڭا سالالاردى ىزدەۋگە باعىتتالعان تمد فورماتىنداعى بەلسەندى ىقپالداستىقتى جالعاستىرۋعا ۇندەدى.
«تىعىز ساۋدا-ەكونوميكالىق بايلانىستاردى دامىتۋ نەگىزگى مىندەت بولىپ قالا بەرەدى. دوستاستىققا مۇشە ەلدەردىڭ نارىقتارى ءبىز ءۇشىن قاشاندا باسىمدىققا يە. وتكەن جىلدىڭ قورىتىندىسى بويىنشا قازاقستاننىڭ سىرتقى ساۋدا اينالىمىنىڭ تورتتەن بىرىنەن استامى تمد مەملەكەتتەرىمەن جاسالدى. بۇل وڭ ديناميكا بيىل دا ساقتالىپ وتىر. قازاقستاننىڭ ساۋدا اينالىمى 7 ايدا 4,4 پايىزعا ءوسىپ, 20,6 ميلليارد دوللاردى قۇرادى. ءبىز ساۋدا بايلانىستارىن ودان ءارى نىعايتۋ ءۇشىن قولدا بار مۇمكىندىكتەردى تولىق پايدالانۋىمىز قاجەت», دەدى ق.توقاەۆ.
مەملەكەت باسشىسى ساۋدا كەدەرگىلەرىن جويۋعا, قولايلى تاريفتىك جاعداي جاساۋعا, اكىمشىلىك راسىمدەردى جەڭىلدەتۋگە باسا ءمان بەرۋ قاجەتتىگىن دە ەسكەرتتى. دوستاستىق كەڭىستىگىندەگى كولىك دالىزدەرىن دامىتۋ ماڭىزدى ەكەنىن دە اتاپ ءوتتى.
ء«بىز ءوزىمىزدىڭ بىرەگەي گەوگرافيالىق ارتىقشىلىعىمىزدى پايدالانىپ, جاھاندىق نارىقتاردى ۇشتاستىرۋىمىز كەرەك. وسىلايشا, ايماعىمىزدى ءىرى كولىك-لوگيستيكالىق حابقا اينالدىرامىز. الەمدە جاڭا ەكونوميكالىق گەوگرافيا قالىپتاسىپ, ساۋدا اعىندارى ۇلعايا تۇسكەن قازىرگى جاعدايدا بۇل باعىت ستراتەگيالىق ماڭىزعا يە بولادى. بۇگىندە ەۋروپا مەن ازيا اراسىنداعى قۇرلىقتىق-ترانزيتتىك تاسىمالدىڭ 80 پايىزى قازاقستان ارقىلى وتەدى. ءبىز ترانسكاسپي كولىك باعىتىن, «سولتۇستىك – وڭتۇستىك» ءدالىزىن ودان ءارى دامىتۋعا, سونداي-اق «قازاقستان – تۇرىكمەنستان – يران» تەمىرجولىنىڭ مۇمكىندىكتەرىن تولىققاندى پايدالانۋعا ايرىقشا ءمان بەرەمىز. قازاقستان «دوستىق – مويىنتى», «باقتى – اياگوز», «داربازا – ماقتاارال» تەمىرجول جوبالارىن تەزىرەك ىسكە اسىرۋدى كوزدەيدى», دەدى پرەزيدەنت.