جامبىل وبلىسى جىلىتۋ ماۋسىمىنا تولىق دايىن. وبلىس اكىمدىگى تۇرعىن ءۇي-كوممۋنالدىق شارۋاشىلىعى باسقارماسىنىڭ باسشىسى قۇدايبەرگەن قورعانباەۆتىڭ ايتۋىنشا, وڭىردە نەگىزگى دەپ ەسەپتەلەتىن 9 جىلۋ ەنەرگەتيكا كەشەنى, 593 اۆتونومدى قازاندىق بار. ولاردىڭ كومەگىمەن 1 737 الەۋمەتتىك نىسان جانە 1 649 كوپقاباتتى تۇرعىن ءۇيدى جىلۋمەن قامتاماسىز ەتەتىن مۇمكىندىك قاراستىرىلعان.
باسقارما باسشىسى كەلتىرگەن دەرەككە جۇگىنسەك, قازىرگى كەزدە وڭىردە 31 نارىق سۋبەكتىسى كومىر ساتۋمەن اينالىسادى. كومىردىڭ باعاسى سۇرپىنا قاراي بەلگىلەنگەن. ءبىر سوزبەن ايتقاندا, ساپالى كومىردىڭ باعاسى البەتتە جوعارى بولادى.
«شۇباركول, قاراجىرا ماركىلى كومىردىڭ باعاسى ساپاسىنا قاراي تونناسى 16-19,5 مىڭ تەڭگەنى قۇراپ وتىر. وسى ورايدا ەلدى مەكەندەر اراسىنداعى قاشىقتىقتى دا ەسكەرگەن ءجون. تۇتىنۋشىعا جەتكىزۋ قۇنىن قوسا ەسەپتەگەندە كومىر باعاسى 20-23 مىڭ تەڭگەگە شارىقتاپ كەتەدى.
بايزاق, جامبىل, تالاس, مويىنقۇم اۋداندارىندا كومىر ساتۋمەن اينالىساتىن, تەمىرجول تۇيىقتارى بار نارىق سۋبەكتىلەرى جوق ەكەنى بەلگىلى. سوندىقتان بۇل ءتورت اۋداننىڭ تۇرعىندارى كومىردى تاراز جانە شۋ قالالارىنان ساتىپ الىپ وتىر.
قازىرگى تاڭدا وڭىرىمىزگە كومىر وتىنى تيەلگەن ۆاگوندار تۇراقتى تۇردە كەلىپ جاتىر. كومىر قويمالارىندا ەشقانداي تاپشىلىق تىركەلگەن جوق. قىسقاسى, تۇرعىنداردىڭ قاجەتتى مولشەردە كومىر ساتىپ الۋعا ەشقانداي كەدەرگى جوق ەكەنىن ايتا كەتكەن ءلازىم», دەيدى ق.قۇدايبەرگەنوۆ جاعدايدى ءتۇسىندىرىپ.